Daniel 2

Lek pa Nebukadnejar

1I mwaka me aryo me loc pa rwot Nebukadnejar, Nebukadnejar oleko lek; ci leke obedo kayelo cwinye mada ma nino bene pe mako wange. 21Ci rwot ociko ni kilwong lutyet, lukor tipu ducu ki lutal ducu kacel ki jo Kaldaya kagonyo te leke. Ci gubino gudonyo i ot gucung inyim rwot. 3Ci rwot ocako waco botgi ni, “Aleko lek, ento cwinya obedo kayela mada ma amito ni ange te leke.”

4Cutcut jo Kaldaya guwaco ki rwot ni, “In rwot bed kwo nakanaka! Dong itit lek meno botwa wan lutici ci wabigonyo tere boti.”

5Ento rwot odok iye bot jo Kaldaya ni, “Lok ma aloko bedo me ada. Kace pe wumiyo angeyo lek man, kacel ki tyen loke, ci kibingidowu woko matinotino, dok bene kibimuku odiwu woko ducu doko wi obur. 6Ento ka wumiyo angeyo lek man kacel ki tyen loke, ci wubigamo mot ki pwoc ki bota kun wulimo bene woro madwong. Pimeno myero wunyuta lek man ki tyen loke.”

7Gudok iye tyen me aryone ni, “Wek rwot kong onyut botwa leke wan lutice, ci wabinyutu tyen lok me leke bene.”

8Ci rwot ogamo ni, “Angeyo adada ma pe akalo akala ni wun wumito medo kare ameda, pien wungeyo atir ni lok ma aloko bedo me ada. 9Ka pe wumiyo angeyo lek man, tye mere cik acel keken ma makowu. Wun dong wutyeko ye me loko bota lok goba ma nyayo tim me bal keken nio wang ma kare oloke. Pimeno wutita lek man, ci miyo abingeyo ni wun kara wutwero nyuta tyen lok me leke.”

10Jo Kaldaya gudok iye ki rwot ni, “Pe tye dano mo kadi ki acel i lobo matwero tucu gin ma rwot mito ngeyoni; dok bene pe tye rwot mo madit nyo matek tutwal ma openyo lutyet, lukor tipu nyo jo Kaldaya mo ki kit peny macalo meno. 11Lok ma in rwot ipenyoni loke tek, pe tye ngat mo matwero nyutu boti in rwot kono lubangagu ma kabedogi pat ki pa dano.”

12Lok man omiyo kiniga omako rwot, odoko ger marac; cutcut ociko ni kinek co maryek ma gibedo i Babilon woko liweng. 13Ci kitito pi cik man oromo i lobo ducu ni myero kinek co maryek woko, ci guyenyo Daniel ki lureme bene wek kinekgi woko.

Lubanga onyutu te lek meno bot Daniel

14Lacen Daniel oloko lok ki ryeko ki tam maber bot Ariok, ma onongo en aye ladit maloyo acikari ma gin lunek, ma dong onongo okato woko me cito kaneko luryeko ma i Babilon. 15Daniel openyo Ariok ni, “Pingo cik pa rwot bedo magwa kit man?” Ci Ariok otito lok meno bot Daniel.

16Lacen Daniel ocito odonyo bot rwot olege me miye kare mo wek enyut telok me lek meno bot rwot.

17Ci Daniel odok cen i ode ci ocako tito loke bot luwote Anania, Micael ki Ajaria. 18En otito botgi ni guleg kica ki bot Lubanga me polo mamako lok me mung man, wek en Daniel ki luwote bene pe kinekgi woko kacel ki luryeko mukene me Babilon. 19Ki i dyewor meno Lubanga onyutu lok me mung man bot Daniel. Ma omiyo Daniel opwoyo Lubanga me polo mada kun waco ni,

20“Kipwo Lubanga ki nyinge bene nakanaka, pien ryeko ki tek tye bote.

21En aye ma loko cawa ki kare me cwir nyo me oro,

en aye ma kwanyo luker woko ki i kergi ci keto luker manyen me leyo katyen gi;

en miyo ryeko bot jo maryek

dok miyo ngec bot jo matwero niang maber.

22En nyutu gin matye kamatut

ki gin mukane i mung en nyutu woko kamaleng;

dok ngeyo gin matye i colpiny, ki dero bene bedo bote.

23Ai Lubanga pa kwariwa, amiyo pwoc ki pak boti,

pien in aye ma imiya ryeko ki kero, dok kombedi dong imiyo wangeyo gin

ma onongo wapenyo pire boti, pien dong imiyo wangeyo lok pa rwot.”

Daniel otucu lek pa rwot ka ogonyo tere

24Lacen Daniel ocito bot Ariok, ma en dano ma rwot oyero ni onek luryeko me Babilon otyek woko ducuni; ci owaco bote ni, “Pe inek luryeko me Babilon ityekgi woko; tera i ot inyim rwot, ci abinyutu bot rwot telok me leke.”

25Ariok orune oyotoyot ki myelkom otero Daniel i ot inyim rwot, ci owaco bot rwot ni, “Anongo dano mo ki ikin opii ma kikelogi ki i Juda matwero gonyo telok me lekini.”

26Ci rwot openyo Daniel (ma onongo kilwongo bene ni Beltecajar) ni, “Itwero nyuta gin ma aneno i lek, dok itwero gonyo telok me leka meno?”

27Ci Daniel odok iye ki rwot ni, “Pe tye luryeko mo, lukor tipu, nyo lutyet, kadi wa jo ma gingiyo lok kom lakalatwe ma gitwero nyutu kit mung mukane macalo man bot rwot ma onongo rwot openyo pireni. 28Ento tye Lubanga mo i polo ma nyutu kit mung ducu ma okane, en aye ma omiyo rwot ongeyo lok ducu ma bitime ikare ma pud tye anyim. Dong lek ma ilekoni ki ginanyuta ma obino iwii ikare ma ibutu piny iwi kitanda gin ene: 29Ikare ma ibutu iwi kitanda, ai rwot, tam obino iwii ma nyuti gin ma bitime ikare me anyim, dong en ngat ma yabo mung ducu ma okane woko kamalengi, onyutu boti omiyo ingeyo gin ma bitime. 30Ento ki tung bota kinyuta mung man ma okane, pe tyen loke ni an aryek akato gin makwo ducu, ento wek agony telok me lek man wek in rwot inge, ki dok bene wek inge tam matye i cwinyi.

31Ai rwot, yam ineno cal mo ma kitiyo ki cing. Cal man dit dok ryeny matek ma okato kare. Ocung inyimi; dok kit manen kwede miyo lworo mako dano. 32Wi cal man kitiyo ki jabu ma kiliyo maber adada, kore ki bade ducu kitiyo ki ryal, ki dong iye ki eme kitiyo ki mola. 33Oloto tyene kitiyo ki nyonyo, ki tyene ma kicibo kwede piny kitiyo dule mogo ki nyonyo kamukene kicweyo ki lobo. 34Ikare ma ineno, got obar ci otyer woko kekene ma pe dano aye otyero ki cinge, ci cutcut ocelo cal meno woko ityene kama kitiyo ki nyonyo ki ma kicweyo ki lobo, ci ongidogi woko matinotino. 35Meno omiyo nyonyo, lobo, mola, ryal ki jabu ducu gunginye woko matinotino, ci gudoko calo cungkal ma i laro moyo me oro, ci yamo dong otingogi oterogi woko, ma pe dok kitwero yenyo yoogi kinongo. Ento got meno ma ocelo cali, oloke odoko twon got madit mada ma opongo lobo woko ducu.

36Meno aye leke; kombedi dong abigonyo te lek boti in rwot. 37Dong in rwot, in aye rwot maloyo luker ducu, dok Lubanga me polo aye ma omiyo icamo ker, en ma omiyi twero ki tek, wa ki deyo bene, 38dok en omiyi twero me loyo dano, lee tim ki winyi me polo ducu, wa ki kama gibedo iye ducu. In aye iwic me jabuni. 39Lacen inge loci, ker mo matidi tutwal bicake, ma rwote tidi dok in iloye ki dit, ka lacen bibedo ker me adek me mola, ma biloyo lobo ducu. 40Ka dok ker me angwene bicake ma bibedo matek calo nyonyo, pien nyonyo turu jami ducu, dok ngidogi woko matinotino, ci tyekogi woko liweng; kit macalo nyonyo nginyo kwede jami, en bene bituru ci nginyo ker mukwongo woko ducu. 41Kit macalo ibedo kaneno dule, tyene ki lwete mogo kiyubu ki lobo pa lacwe agulu, ki dule mogo kiyubu ki nyonyo, meno nyutu ker ma opoke; ento nyonyo mogo mamiyo cung matek bibedo ikine, kit macalo ineno nyonyo ma orube ki lobo dabani. 42Kit macalo lwet tyene dule mukene kiyubu ki nyonyo ki mukene kiyubu ki lobo, kitmeno bene ker man bibedo matek ikare mogo ki dok bibedo goro adada ci tur woko ikare mukene. 43Kit macalo ineno nyonyo orube woko ki lobo dabani, kibirube woko bene kitmeno kun ginyome ikin gi keken gi, ento bedo maber kacel pe bibedo tye ikin gi, kit macalo nyonyo bene pe rube ki loboni. 44Dok ikare pa luker meno Lubanga me polo biketo ker mukene ma rii nakanaka ma pe kitwero balone, kadi dit me loce bene pe kibiweko i cing rok mukene. Ker meno manyeni bituru ker magi ducu ngidogi woko matinotino, ci tyekogi woko ducu, en aye dong bicung bedo matwal, 45kit macalo ineno maca obar otyer woko ki ikom got madit ma pe dano aye otyero ki cinge, ci oturu nyonyo, mola, lobo, ryal ki jabu ongidogi woko ducu matinotino. Lubanga madit dong otyeko nyutu bot rwot gin ma bitime ikare me anyim. Leke obedo ada ki te loke bene tye atir.”

Nebukadnejar omiyo mot bot Daniel

46Cutcut rwot Nebukadnejar oryebe piny, omiyo woro bot Daniel, ka dong ociko ni myero kikel gityer ki odok eceta wek kityer bot Daniel. 47Ci rwot owaco bot Daniel ni, “Ada, Lubangani aye Lubanga maloyo lwak lubanga mukene ducu, dok en bene Rwot maloyo luker ducu, en ngat ma nyutu mung ducu ma okane woko kamaleng, pien in bene ibedo ki twer me nyutu mung man ma okaneni.” 48Lacen rwot omiyo deyo mamalo ki mot madwong bot Daniel, ka okete me bedo laloc i lobo ducu me Babilon, dok bene me bedo ladit maloyo luryeko ducu matye i Babilon. 49Daniel olego rwot, ci rwot bene oye legane omiyo en oyero Cadrak, Mecak ki Abednego, oketogi me bedo ludito maloyo lwak ki neno lok ducu ma time i lobo Babilon. Ento Daniel obedo mere i gangkal pa rwot.