Daniel 3

Nebukadnejar ociko ni Kiwor Cal me Jabu

1Rwot Nebukadnejar oyubu cal lubanga ki jabu; ma bore obedo puti pyere abongwen ki lace puti abongwen ci ocibo ocung i bar me Dura, i lobo Babilon. 2Cutcut rwot Nebukadnejar ocwalo lok me lwongo luloyo madongo, ludito pa lwak, ki luloc me dul lobo mapatpat, lumiitam, lugwoklim, lungolkop madito ki matino, ki ludito ducu me dul lobo mapatpat, ci gubin kakwero cal lubanga ma rwot Nebukadnejar oyubu ocibo ocung likungi. 3Ikare ma ludito magi ducu gucoke kacel kakwero cal lubanga ma rwot Nebukadnejar oyubu ci ocibo ocung likungi; ci gin ducu gucung inyim cal lubanga ma Nebukadnejar ociboni. 4Ci kicwalo kwena ki lok ma winye malongo bot lwak ducu ni, “Wun lwak me lobo ducu, ki rok ducu mapatpat, kicikowu ducu ni 5ka wuwinyo bila onyo obute okok, olwet ma kikutu, opuk, adungu, nanga ki nyamulere ducu, ki kit wer ducu ma kigoyo, myero wun ducu wuryebe piny wuwor cal lubanga man me jabu ma rwot Nebukadnejar oyubu ci ocibo ocung likungi. 6Dong ngat mo ma pe biryebe piny kaworo cal lubanga man, kibimake woko oyotoyot ka kibibole i rukmac mukur malyeti.” 7Pimeno, ikare ma lwak me rok ducu guwinyo koko bila, koko nyamulere, ki koko opuk, ki adungu, nanga, obute, ki kit wer ducu mapatpat ma kigoyo agoya, ci lwak me lobo mapol, rok ducu mapatpat, ki jo ma loko leb mapatpat ducu guryebe piny guworo cal lubanga me jabu ma rwot Nebukadnejar oyubu ci ocibo ocung likungi.

Kidoto lurem Daniel adeki ni gubedo lujemo

8Ikare meno jo Kaldaya mogo ma onongo gitye ki tam maracu gudyere kamaleng, gucako doto Lujudaya. 9Guwaco bot Nebukadnejar ni, “In rwot myero ibed kwo nakanaka! 10In rwot, onongo dong ityeko keto cik ni, ka dano ducu guwinyo koko bila, koko nyamulere, ki koko opuk, ki adungu, nanga, obute, ki kit wer ducu mapatpat ma kigoyo agoya, ci guryebe piny kaworo cal lubanga me jabu; 11dong ka dano mo pe biryebe piny kaworone, kibimake woko oyot kibole woko i rukmac mukur malyeti. 12Ento tye Lujudaya magi, Cadrak, Mecak ki Abednego ma iyerogi iketogi me bedo ludito maloyo lwak dok maneno lok ducu ma time i lobo Babilon. Ai rwot, jo magi adeki pe gulubu ciki wa ki acel. Pe guworo lubangani, dok bene pe guworo cal lubanga me jabu ma itiyo ci icibo ocung likungi.”

13Cutcut kiniga omako Nebukadnejar woko, omiyo cik ki kiniga ni myero kicit kikel Cadrak, Mecak ki Abednego kong bote. Ci kicito kikelo jo magi adeki inyim rwot. 14Ci cutcut Nebukadnejar openyogi ni, “Lok ma kititani mono ada, ni wun Cadrak, Mecak ki Abednego, pe wuworo lubangana, dok bene pe wuworo cal lubanga me jabu ma an aye ayubu ci acibo ocung likungi? 15Kace kombedi dong wuwinyo koko bila, ki koko nyamulere, ki koko opuk, ki adungu, nanga, obute ki kit wer mapatpat ma kigoyogi agoya, ka wuyube dok wuye me ryebe piny kaworo cal lubanga man ma an aye ayubuni, ci nongo ber adada; ento kace pe wuworo, ci kibimakowu oyotoyot labongo gale, kibolowu woko i rukmac mukur malyeti; ci lubanga mene ma bilarowu kwanyowu woko ki i cingani?”

16Pimeno, Cadrak, Mecak ki Abednego gugamo lok gudok iye ki rwot ni, “Ai Nebukadnejar, pe wamito walok boti gin mo pi lok man. 17Ka lok dong tye kumeno, ci Lubangawa ma waworoni bitwero larowa ki i rukmac mukur malyeti; dok en bene bilarowa kwanyowa woko ki i cingi, in rwot. 18Ento kace pe, myero in rwot inge maber ni, wan pe wabiworo lubangani dok pe wabiworo cal lubanga me jabu ma iyubu ci icibo ocung likungi.”

Kingolo kop me to ikom lurem Daniel adeki

19Cutcut akemo mager omako Nebukadnejar woko, omiyo wange bene oloke woko mapat ikom Cadrak, Mecak ki Abednego. Ci oyotoyot ociko ni kimed mac olyeti tyen abiro kulu makato kit ma onongo lyet kwede wi atii ca. 20Ka dong ociko jo mogo ma gin twoni oteka ma gitye i dul monye ni gutwe Cadrak, Mecak ki Abednego woko, ci gubolgi i rukmac ma okur malyeti. 21Ci gutweyo jo meno woko ma onongo gitye ki ginaruka magi ikomgi, jor, kanyi, tok me wigi, ki bongigi mukene ducu, ci kibologi kwede woko ducu i rukmac ma okur malyeti. 22Cik pa rwot onongo obedo gwa matek, ki rukmac bene onongo dong odoko lyet matek, ma leb mace ma lyel bene oneko jo meno ma gutero Cadrak, Mecak ki Abednego kabologi woko i maci. 23Jo magi adeki, Cadrak, Mecak ki Abednego, kibologi gupoto wa idye rukmac ma dong kitweyogi woko gulugulu.

24Lacen rwot Nebukadnejar obedo ki ur madit omiyo oa malo oyotoyot, ci openyo lumiitame ni, “Wan pe wabolo jo adek i mac ma onongo dong kitweyogi woko?” Gudoke iye ni, “Ada, rwot, iloko kakare.” 25Ci rwot dok ogamo kun waco ni, “Ento kombedi atye kaneno jo angwen ma pe kitweyogi gitye kawot awota idye mac, kun mac bene pe wangogi; dok aneno dano me angweneni nen calo lubanga mo.”

Kigonyo co adeki ci kimedo rwomgi

26Ci Nebukadnejar obino onyiko cok ki dogola me kabedo kama rukmac tye kalyel iyeni, ci owaco ni, “Cadrak, Mecak ki Abednego, wun lutic pa Lubanga Mamalo Twal, wukat woko, wubin kany!” Cutcut Cadrak, Mecak ki Abednego gukati woko ki i mac. 27Ci luloyo madongo, ki ludito pa lwak, ki luloc me dul lobo mapatpat kacel ki lumiitam pa rwot gucoke kacel, ci guneno ni mac pe owango jo meno; yer wigi mo ma mac oroyo pe tye, ginarukagi bene mac pe ogudu, dok ngwec mac bene obedo peke ikomgi.

28Ma omiyo Nebukadnejar otugi waco ni, “Kipwo Lubanga pa Cadrak, Mecak ki Abednego ma ocwalo lamalaika ci olaro lutice woko, ma gigeno en, ma gukwero lubu cika an rwot woko, gudyero kwogi me to ma kaworo lubanga mo ata ma pe Lubangagi kikome.

29Pimeno dong aketo cik kombedi ni, ‘Lwak me lobo ducu nyo rok ducu mapatpat, nyo leb mo ma biloko lok mo marac ikom Lubanga pa Cadrak, Mecak ki Abednego kibingidogi woko matinotino, ki odigi bene kibimuku woko dong obur; pien dong pe tye lubanga mo mukene matwero laro dano kit man.’”

30Ma omiyo rwot ocako medo rwom me tic pa Cadrak, Mecak ki Abednego i lobo Babilon.