Daniel 4

Nebukadnejar oleko lek me aryone

1Rwot Nebukadnejar ocoyo lok man bot lwake, lwak me rok ducu mapatpat, ki jo ma loko leb mapatpat ma gibedo iwi lobo ducu: awaco botwu ni,

“Kuc omede madwong botwu! 2Onongo aneno ni ber ki tung bota ka atito lanyut mogo ki tango mogo ma Lubanga Mamalo Twal otyeko tiyo ikoma.

3Lanyut ducu ma en onyutu tye ada dok dit ma pe wace,

ki tango ma en tiyo dongo mada!

Kere en aye ker ma rii nakanaka, ki loce bene bedo ikare pa yalwak ducu.

4An Nebukadnejar onongo yam abedo mot i oda ma piny okwe, dok abedo ki gum me nongo lonyo madwong i gangkal ma mera. 5I dyewor acel aleko lek ma omiya lworo marac; dok ginanyuta mogo obino iwiya omiyo koma opo woko lirikrik. 6Pimeno omiyo aketo cik ma waco ni myero kikel luryeko ducu ma i Babilon inyima, wek gumiya ange tyen lok me lek ma alekoni. 7Cutcut lutyet ki lukor tipu, Lukaldaya ki jo matyeto lok kom lakalatwe gubino gudonyo bota; ci atito botgi lek ma alekoni, ento pe gutwero gonya te leke. 8Lacen i agikine Daniel obino odonyo ocung inyima, (en ngat ma nyinge mukene kilwongo ni Beltecajar, macalo nying lubangana), en dano ma cwiny pa lubanga maleng bedo i iye, ci atito bote lek ma aleko kun awace ni, 9‘In Beltecajar, ladit maloyo lutyet ducu, dong atyeko ngeyo ni cwiny pa lubanga maleng bedo i ii, dok aniang ni pe tye mung mo mukane ma nyutune woko kamaleng tek ki boti. Lek ma onongo alekoni en ene; gonya te loke.

10Ginanyuta ma obino iwiya ikare ma abutu en ene: nen, aneno yat mo ma ocung idye lobo; maber mukato kare woko. 11Yat meno odongo ci odoko tek, ki wiye bene ogudu polo, dok onongo nen woko liweng ki i agiki lobo ducu. 12Pote ducu onongo nen mabeco, ki nyige bene onongo pol mada, obedo cam mayam gin makwo ducu camo. Lee ducu me tim giywe ite tipune, ki winyo me polo bene gibedo i jange ducu, dong gin makwo ducu gikwo pi camo nyige.

13Ikare ma abedo katamo pi ginanyuta ca, ci aneno lamalaika ma lakurpiny mo maleng, ma olor piny oa ki i polo.’ 14Ci en odange matek kun waco ni, ‘Tong yat meno iret woko piny, ci itong jange bene woko ducu, ka ilwer pote woko ducu, dok iket nyige woko atata; wek lee gua ki i tere guring woko, ki winyi bene gua woko ki i jange. 15Ento myero iwek ajute ki lwite ma ocung i ngomi, ci itwe ajute woko ki rubota nyonyo, ki mola, obed idye lum alita i tim.

Wek toyo ma a ki i polo odyak kome woko, dok wek obed ikin lee ki ginapita ma gibedo i lum. 16Wek kilok tame woko ki i tam pa dano, ci kimiye obed ki tam pa lee; wek orii mwaka abiro. 17Lumalaika ma gin lukurpiny aye gumoko lok man, kun gulubu lok pa jo maleng, wek i agikine omii gin makwo ducu gunge ni, Ngat Mamalo Twal aye maloyo ker pa dano, dok tye ki twero me miyone bene bot ngat ma en mito, kun keto kadi wa dano ma rwomgi piny adada me loyo lwak.’

18Man aye lek ma an rwot Nebukadnejar aneno. Dong kombedi in Beltecajar, myero ituc telok me lek man, pien luryeko ducu ma gitye ite kera pe gutwero gonyo te lek man bota, ento in itwero, pien cwiny pa lubanga maleng bedo i ii.”

Daniel ogonyo te lek

19Daniel ma nyinge mukene Beltecajar kong dok cwinye obale woko pi cawa mo manok, ki tame ducu opoyo tipu kome woko. Ci rwot owace ni, “Beltecajar, pe iwek lek man nyo gonyo tere opo tipu komi.”

Beltecajar odoke iye ni, “Rwoda, onongo bedo ber ka lek man tye pi jo ma gidagi, ki ka onongo te leke bene obed pi lukwori! 20Yat ma onongo ineno ma odongo odoko matek, ma wiye ogudu polo, ma onongo nen wa ki i agiki lobo ducuni, 21ma pote ducu onongo nen mabeco ki nyige bene onongo pol mada, dok obedo cam ma gin makwo ducu camo, ma lee ducu me tim giywe ite tipune, ki winyo me polo bene gibedo i jange ducu, 22en aye in rwot ma dong idongo idoko tek. Diti bene dong odongo oo wa i polo, ki loci bene oyare oo wa i agiki lobo. 23Ikare ma in rwot itye kaneno, ci lamalaika ma lakurpiny, oa ki i polo kun lor piny ci owaco ni, ‘Tong yat meno iret woko piny, ibal woko, ento wek ajute ki lwite ma ocung i ngomi, ci itwe ajute woko ki rubota nyonyo, ki mola, wek obed idye lum alita i tim. Wek toyo ma a ki i pol odyak kom laco man, ma yat man ocung pireni, dok wek obed mere ikin lee ma gibedo i lum i lobo, nio wang ma mwaka abiro okato.’

24Man aye telok me leke, ai rwot: Man aye cik pa Ngat Mamalo Twal, ma obino ikom rwoda rwot, 25man nyutu ni kibiryemi woko ki ikin dano, dok ibibedo kacel ki lee me tim; kibimiyo icamo lum calo twon, dok toyo ma a ki i polo bene bidyako komi woko, ci ibirii mwaka abiro, nio wang ma ingeyo ni Ngat Mamalo Twal aye loyo ker pa dano, dok en tye ki twero me miyone bot ngat mo keken ma en mito. 26Kit macalo onongo kiciko ni kiwek ajut yat ki lwite, ada ker bibedo meri matwal nicake ikare ma in ibingeyo ni Lubanga aye laloc. 27Pimeno in rwot, myero iye tamani; wek ingut iwek bali woko ducu ci icak bedo ki kwo ma atir, kun iweko bali ki bedo ki kica bot jo ma kiunugi, wek kare me loci ibimede ki bedo ki kuc ki yweyo ma oromo.”

28Lok magi ducu otime ikom rwot Nebukadnejar. 29Inge dwe apar wiye aryo ma rwot onongo tye kawot iwi ot me gangkal me Babilon, 30ci en rwot owaco ni, “Nen kit ma Babilon dit kwede, ma an kikoma aye agero ki tek me twerona wek obed gangkal manyutu tekona, ki deyo me dita!”

31Ikare ma rwot pud tye kalok, ci dwon oa ki i polo ma waco ni, “Ai rwot Nebukadnejar an aye awaco boti ni: ker dong kikwanyo woko ki boti. 32Dok dong kibiryemi woko ki ikin dano, ci ibibedo kacel ki lee tim; kibimiyo icamo lum macalo twon pi mwaka abiro, nio wang ma ipwonye ni Ngat Mamalo Twal aye maloyo ker pa dano, dok tye ki twero me miyone bene bot ngat mo keken ma en mito.”

33Oyotoyot lok man ocobe kakare ikom Nebukadnejar. Ci cutcut kiryeme woko ki ikin dano, ocako camo lum calo twon, ki toyo ma a ki i polo bene odyako kome woko nio ka yer kome ducu olot maboco macalo yec kom ocur, ki lwete bene olot maboco calo lwet winyo.

Nebukadnejar opako Lubanga

34I agiki me kare meno ducu, an Nebukadnejar, ailo wanga aneno polo, ci tipu koma ocako dwogo, omiyo apwoyo En Ngat Mamalo Twal mada, ka dok apake kun aketo deyo ikom en ma bedo kwo nakanakani.

Loce bedo matwal,

ki kere bene bedo ikare pa yalwak ducu;

35jo ducu ma bedo i lobo bene gin pe gin mo;

en tiyo gin ma cwinye mito i mony me polo ki ikin jo ma bedo i lobo bene;

ngat mo peke matwero juke, nyo matwero wace ni, “Itimo ango?”

36Ikare meno kikome bene en aye tipu koma ocako dwogo kwede ki deyo me kera, ki dita ki bera ducu odwogo ikoma. Lumiitam ki luditona me awora guyenya, ci gudwoka dok i kera, ki dit mukene makato dok kimedo bota. 37Ma omiyo kombedi an, Nebukadnejar, apako, adworo dok aworo Rwot me polo; pien tice ducu tye atir, ki kwo me bedone ducu tye atir; jo ma luwake en twero kwanyogi ci dwoko rwomgi woko piny.