Daniel 5

Belcajar otedo karama madit

1Rwot Belcajar otedo karama madit pi luditone me awora ma welgi romo alip acel, ci en omato kongo bwino kacel kwedgi.

2Ikare ma dong kongo okato woko iwiye, Belcajar omiyo cik ni kikel kikopo jabu ki me ryal ducu mayam wone Nebukadnejar ocokogi woko ki i Ot pa Lubanga matye i Jerucalem, wek en rwot ki luditone me awora, kacel ki mone ki mon angecane ducu gutii kwede me mato kongo. 3Ci kikelo jami magi me ryal ki me jabu mayam kiyakogi ki i Ot pa Lubanga matye i Jerucalem; ci rwot ki lwak luditone me awora, ki mone, ki mon angecane gumato kwede. 4Gumato kongo bwino, kun gipako lwak lubangagu me jabu ki me ryal, me mola, me nyonyo, me yat ki me got.

5Cutcut kineno cing dano ka tye kacoyo coc i kor ot ma i gangkal pa rwot, ma okeme ki lacib mac; ci rwot oneno ka cing dano tye ka coc. 6Man omiyo wang rwot oloke woko ki tame bene obale woko ci omiyo cwinye opoto niling; pyere otonge woko, ki conge aryo ducu gubedo kagone kacel. 7Omiyo rwot okok ki dwon malongo ni kikel lukor tipu ki jo Kaldaya ki jo ma gingiyo lok kom lakalatwe. Rwot owaco bot luryeko ducu ma i Babilon ni, “Ngat mo ma bikwano coc man, ki gonya te loke, kibiruku ki bongo ma obedo lamarlamar, kibirwako nyor me jabu bene i ngute, ci dok bibedo laloc me adek ite ker man.” 8Ci luryeko pa rwot ducu gubino gudonyo i ot bote, ento pe gutwero kwano coc ma i kor ot kadi ki gonyo te loke bot rwot bene oloyogi. 9Man omiyo cwiny rwot Belcajar opoto niling, wa kome ducu obale woko, ci luditone me awora guuru dok gungeng woko ata.

10Ikare ma min rwot Belcajar owinyo lok pa rwot ki pa luditone me awora ducu, obino odonyo i ot kama gitye iye kacamo karama; ci owaco ni, “Ai rwot, bed kwo nakanaka! Pe myero iwek tami omii cwinyi obed kapoto, dok pe iwek komi obale. 11Tye dano mo ite keri kany ma cwiny pa lubanga maleng bedo i iye. Ikare pa woru onongo yam ginanyuta me mung ducu ki niang wa ryeko, macalo ryeko pa lubangagu ducu, kinongo ni en tye kwede, ma omiyo woru, rwot Nebukadnejar, oketo en me bedo dano maloyo lutyet, lukor tipu, jo Kaldaya ki luryeko ducu ma ngiyo lok ikom lakalatwe. 12Dano man Daniel, yam rwot ocako nyinge ni Beltecajar, onongo tye ki cwiny maber makato, dok onongo bene tye ki ngec wa ki niang ma oromo me gonyo telok me lek ducu, kun gonyo wa telok macalo koc lit woko bene, dok cobo lok me peko mogo ma dano tye kwede. Kombedi myero ilwong Daniel obin, ci en aye bigonyo te coc man.”

Daniel ogonyo te lok me coc

13Cutcut kikelo Daniel inyim rwot. Ci rwot ocako lok ki Daniel kun penye ni, “In aye Daniel, ngat acel ikin jo Juda mayam wora omakogi ki i Juda ci okelogi kanyi? 14Awinyo lok ikomi ni cwiny pa lubanga maleng tye ikomi, dok bene ni itye ki ryeko me nyutu mung mogo, ki niang wa ki ryeko makato pa jo mukene. 15Kombedi onongo kikelo luryeko ki lukor tipu inyima ni gukwan coc man dok gumiya ange te loke; ento pe gutwero nyuta te loke. 16Ento onongo awinyo ni itwero gonyo te lok mapol, dok bene icobo lok me peko ma dano tye kwede. Dong kombedi kace itwero kwano coc man ki gonyo te loke wek ange, ci kibiruki ki bongo ma lamarlamar, kibirwako nyor me jabu bene i nguti, dok bene ibibedo laloc me adek ite ker man.”

17Ci Daniel odok iye bot rwot ni, “Gwok moti ducu obed piri giri, dok imii pwoc ma imito miya bot ngat mukene; kadibed pe agamo gin mo ma imiya pud abikwano coc man boti rwot, dok bene abigonyo te loke ingeyo.

18Ai rwot, Lubanga ma En Ngat Mamalo Twali yam omiyo woru obedo rwot maloyo lobo, omiye bene dit ki deyo wa ki twero ducu. 19Pi dit mayam kimiye, oweko lwak me rok ducu ki rok mapatpat ducu ki jo maloko leb mapatpat komgi omyel dok gubedo ki lworo inyime. Ka yam cwinye omito ni enek dano mo ci neko mere aneka, ka omito ni ewek dano moni obed kwo, ci weko bedo kwo; ka omito ni emii dit bot ngat mo ci miyo, ka omito ni edwok rwom pa dano moni piny ci dwoko bene. 20Ento ikare ma dong en ocako kete malo kekene ki i cwinye, omiyo cwinye odoko nwang ci ocako loc ki wake marac, omiyo kikwanye woko ki iwi komkere, wa ki deyone bene kikwanyo woko ki ikome. 21Ci kiryeme woko ki ikin dano ki bene kiloko tame odoko macalo tam pa lee tim, ci obedo kacamo lum calo twon, dok toyo ma a ki i polo obedo kadyako kome, nio ka ongeyo ni Lubanga Mamalo Twal aye maloyo ker pa dano, dok en bene aye ma keto ngat mo keken ma cwinye mito me bedo laloc iye.

22Dong in Belcajar, in i wode kikome, ento pe ibedo mwol i cwinyi, kadi bed onongo ingeyo lok man ducu. 23Ento ikete malo kekeni ci iete giri ikom Rwot me polo; dok jami mayam kitiyo kwede i ode ducu kikelogi ci kiketogi inyimi, ci in kacel ki ludito me aworani, moni, ki mon angecani ducu wutiyo kwede me mato kongo bwino. Wubedo bene kapako lwak lubanga me jabu, me ryal, me mola, me nyonyo, me yat ki me godi ducu, ma pe gineno piny, pe giwinyo lok, dok ma pe gingeyo gin mo kadi ki acel. Ento in pe ibedo kaworo Lubanga ma omiyo kwo ki yweyo botini, kun en bene aye ma gwoki ikit bedoni ducu.

24Dong kicwalo cing dano ki inyime, ci ocoyo coc man.

25Coc ma kicoyoni tye kit man: MENE MENE TEKEL PARCIN. 26Dong telok man tye kit man: MENE, Lubanga dong otyeko kwano wel nino me keri woko, dok onyutu bene ni agikine dong cok. 27TEKEL, dong kipimi i mijan, ci kinongo ni in iyot tutwal; 28PEREC, keri kipoko iye woko ci kimiyo bot jo Medi ki bot jo Percia.” 291

Cutcut Belcajar omiyo twero, ci kiruku Daniel ki bongo ma lamarlamar, ka kirwako nyor me jabu i ngute, ci gitito lok ikome oromo piny ducu ni en aye dong bibedo laloc me adeke ite ker me Babilon.

30I dyewor me nino meno kikome kineko rwot Belcajar woko. 31Ci Dario ma jo Medi oleyo ker, ma dong mwaka me dite oromo pyere abicel wiye aryo.