Daniel 6

Kibolo Daniel i boro pa labwor

1Dario omoko tame me keto luloyo madongo miya acel ki pyere aryo me bedo luloc ite kere i kabedo ducu mapatpat. 2Ka dok oketo luloc madito adek me loyogi. Ikin gin adeki Daniel onongo bene tye iye, ma luloyo miya acel ki pyere aryoni ducu omyero guter lok ma mako ticgi bot luloc madito adeki, wek lim pa rwot pe olanye ata. 3Lacen kinongo ni Daniel dok kwiri mada makato luloc mukene madito aryoni woko, loyo wa rwodi ducu, pien cwiny maber makato onongo tye ikome; dong omiyo rwot obedo ki yub me keto en me loyo lobo ma ite kere ducu. 4Ma omiyo luloc madito kacel ki rwodi gubedo kayenyo yo ma myero kinong ki bal ikom Daniel mamako lok me loyo ker; ento gin pe gunongo kacungugi mo me dote kadi ki roc mo, pien Daniel onongo obedo dano ma lagen, ma pe tye ki kit roc mo, dok lok mo me bal bene pe kinongo ikome. 5Lacen jo meno guwaco ni, “Pe wabinongo lok me doto Daniel nio ka wayenyo kit lok malube ki cik pa Lubanganeni.”

6Ci luloc madito kacel ki rwodi magi guporo lok kacel ci guye woko lawangacel ka gua gubino bot rwot guwace ni, “Ai rwot Dario, bed kwo nakanaka! 7Luloc ducu madito me ker man, kacel ki ludito pa lwak, rwodi, lumiitam ki luloc me dul lobo mapatpat guye lawangacel ni rwot myero omok cik ki omii twero ma pe kitwero lokone. Ci kace kibinongo ngat mo kalego lubanga mo nyo kaworo dano mukene ma pe in rwot, pi nino pyere adek ci dano macalo meno kibibolo woko ikin lwak labwor. 8Pimeno kombedi in rwot myero imok cik ci iket cingi i buk ma kicoyo iye cik ma pe kiloko atata, kit macalo cik pa jo Medi ki Percia tye kwede, ma pe kiloko atatani.” 9Pimeno rwot Dario oketo cinge i buk me cik kun moko cik man.

10Ikare ma dong Daniel ongeyo ni kiketo cing i buk me cik, ci oa ocito i ode odonyo i kicikane matye malo matye ki wang dirica, ci oyabo dirica ma okemo tung Jerucalem; ci obedo karumu conge piny kalega kun miyo pwoc bot Lubangane tyen adek nino ki nino, kit macalo yam con kong obedo katimoneni.

11Lacen jonu gucako bino bot Daniel kit macalo onongo dong gutyeko yubuneni, ci gunongo Daniel tye kalega kun bako doge bot Lubangane. 12Ka gudok cen gucito inyim rwot, gunyiko cok ci gucako wace lok ma dok ikom cik ma pe loke ni, “Ai rwot, onongo mono pe iketo cingi i buk me cik ma pe loke atatani, kun iciko ni kace kibinongo ngat mo kalego lubanga mo nyo kaworo dano mo mukene ma pe in rwot, pi nino pyere adek, dano macalo meno kibibolo woko ikin lwak labwor?”

Ci rwot odok iye botgi ni, “Lok meno pud ocung matek kit macalo cik pa jo Medi ki Percia tye kwede, ma pe kitwero lokone atatani.”

13Ci gumede ki tito lok bot rwot ni, “Wanongo Daniel ma en ngat acel ikin jo mayam kiyakogi ki i Juda, pe lubu ciki, ai rwot, kadi wa cik ma pe loke ma iketo iye cingi i buki, ento bedo mere kalego Lubangane tyen adek nino ki nino.”

14Ikare ma dong rwot owinyo lok magi ducu, cwinye ocwer mada, ci obedo ki tam pi laro Daniel. Rwot oyele matek ki tam i cwinye nio ka ceng opoto, kun yenyo kit yo ma myero elar ki Daniel. 15Lacen jo magi dok gubino kacel bot rwot, kit macalo onongo dong guyubu kwede, ci guwaco bot rwot ni, “Ai rwot, myero inge ni, man aye cik pa jo Medi ki jo Percia ni, cik mo ma rwot dong omoko pe twero loke.”

16Cutcut rwot omiyo twero, ci kicito kikelo Daniel ci kibolo woko ikin lwak labwor. Ci rwot owaco bot Daniel ni, “Omyero Lubangani ma iworo jwijwini tin dong olari ba!” 17Kikelo got acel madit ci kiloro ki dog boro pa lwak labwori woko, ka rwot bene odiyo agit cinge i odok ma kimwono ki got meno kacel ki agit cing pa luditone me awora, ma moko ni myero pe kilok gin mo pi lok kom Daniel. 18Lacen rwot ocako dok i gangkal ma mere, ci obedo karii kec dyewor benebene; gin mo pe ma kitero bote me yomo cwinye, nino bene okwero mako wange woko.

19Ikare ma piny dong oyabe odiko, rwot oa malo ci okato woko ocito oyotoyot tutwal i dog boro pa labwor. 20Ka dong oo cok ki boro kama onongo Daniel tye iyeni, ci odange kun kok matek pi remcwiny, ci owaco bot Daniel ni, “Ai Daniel, latic pa Lubanga makwo, en Lubangani ma iworo jwijwini mono dong otwero lari ki i dog lwak labwor magi?”

21Ci Daniel odok ki rwot ni, “Ai rwot, bed kwo nakanaka! 22Lubangana ocwalo Lamalaika otweyo dog lwak labwor magi woko, ma omiyo pe gumwoda woko, pien gunongo ni pe atye ki bal mo inyime, kadi wa inyimi bene, ai rwot, pe atimo gin mo marac kadi ki acel.” 23Lok meno omiyo rwot obedo ki yomcwiny matek, ci omiyo twero ni kikwany Daniel woko ki i boro pa labwor kikele woko kamaleng. Pe kimedo kinongo kadi latin ret mo ikome wa ki acel, pien onongo en obedo kageno Lubangane. 24Cutcut rwot ociko ni kikel jo ma gudoto Danieli, ci kibologi woko i boro ikin lwak labwor, gin ducu kacel ki mongi wa ki lutinogi. Ento ma pud peya gupoto piny ite boro, labwor ogamogi woko lamal likapkap ci gumwodogi gutyero cogogi woko lipwacpwac.

25Lacen rwot Dario ocoyo waraga bot lwak me lobo ducu, ki rok mapatpat, kadi wa bot jo maloko leb mapatpat ma gibedo i lobo ducu kun waco ni,

“Kuc myero onya omede botwu. 26Aketo kombedi cik ni i kabedo ducu ma ite loca maditi ni dano ducu myero komgi obed ki lworo inyim Lubanga pa Daniel, pien en aye Lubanga makwo, ma bedo nakanaka; kere bene pe kituru, loce bene pe bigik.

27Lubangane laro dano dok konyogi bene, tiyo lanyut ki tango ducu i polo ki i lobo, pien en aye ma olaro Daniel ki i teko pa lwak labwor.”

28Ma omiyo Daniel olimo gum ki lonyo madwong ikare me loc pa Dario ki ikare me loc pa Ciro ma jo Percia.