Daniel 7

Gin ma Daniel oneno iwang lek

7:1—12:13

Daniel oneno lee angwen i wang lek

1I mwaka mukwongo me loc pa Belcajar rwot me Babilon, an Daniel aleko lek dok bene ginanyuta obino iwiya ikare ma abutu iwi kitandana. Ci acoyo gin ma an alekoni woko piny, dok atito kit leke woko bene kore ki kore.

2I ginanyuta ma aneno i dyewor ki iwang lek; aneno yamo kodo ki itwok lobo angwen ducu kun rubu pii me nam madit. 31Ci cutcut aneno lee madito angwen gukati woko ki i nam, kun lee acel acel nen pat mada ki lawote. 42Lee mukwongo onongo nen calo labwor, dok onongo tye ki bwome macalo bwom ocur. Ikare ma abedo kaneno ci kiputu bwome woko kiilo woko ki i ngom ci kiketo ocung ki tyene aryo calo dano; ci kimiye bene cwiny pa dano.

5Dok aneno lee mukene me aryone, onongo nen calo nguu, ma ocung ki tyene tung angec. En onongo tye ki cogo ringo laknget adek idoge ikin lake. Ci kitite ni, “A malo, imwod ringo madwong.”

6Inge man, dok aneno lee mukene ma obedo calo kwac, matye ki bwome angwen macalo bwom winyo i ngeye; onongo wiye tye angwen, dok bene kimiye loc. 73

Inge man ki i dyewor aneno ginanyuta, ci aneno lee me angwene. Lee meno ger mamiyo kom dano myel marac ma lworo nongo oketo komgi woko, dok tekone dwong ma pe wace; lake ducu obedo nyonyo matek; obedo kamwodo ringo lee tyero woko lipwacpwac, ka dong onyono gin mudonge woko piny ki tyene. Onongo nen pat tutwal ki lee mukene ma gukwongo nyime ca, onongo tunge tye apar kulu. 84 Ma abedo katamo lok ikom tunge apari, ci aneno tunge mukene matidi dok otwi olot ki ikin luwote. En odongo ci oputu tunge adek ki ikin gin mukwongo twini woko pi weke kabedo, ci aneno wang tye i tung lee man ma obedo calo wang dano, ma doge onongo tye kaloko lok mogo me wake adada.

Ginanyuta ikom ngat mayam obedo kwo naka

95

Ikare ma abedo kanenone, ci aneno, kicibo komker mogo ci ngat mayam okwongo bedo kwo naka obino obedo iwi komker acel. Bongone tar calo pee, dok bene yer wiye rom ki yer romo ma kilwoko odoko matar adada. Komkere obedo leb mac malyel ki lawala tyene obedo mac matye kawang. 106Laora kulu me mac ocako mol, kun mol a ki inyime kati woko. Dano alip ki alip gitiyo bote; ki jo alip apar tyen alip apar gibedo kacung inyime, ci langolkop ocako bedo ki kot pi ngolo kop, ci omiyo en oyabo buk.

11Abedo kaneno piny i cawa meno pi lok me nyate ki me wake ma tung lee onongo tye kalokone. Ikare ma abedo kanenone, ci kineko lee meno woko, ka kiwango kome ki mac kityeko woko liweng. 12Dong lee mukeneni ducu kikwanyo loc woko ki botgi, ento kiwekogi ni kong gubed kwo i lobo pi kare mo manok. 137

I dyewor meno, aneno ginanyuta macalo magi: cutcut aneno ngat mo macalo dano, kun lor bino piny ki pol me polo. Ci obino bot ngat mayam okwongo bedo kwo waconi, ci kitere bene wa inyime. 148 Kitingo loc ducu kimiyo i cinge, kacel ki ker ducu ki deyone, wek lwak me rok ducu ki kaka ducu, ki jo maloko leb mapatpat ducu, gubed lutice. Loce aye loc ma bedo matwal, loce pe bigik, ki kere bene pe kitwero turune.

Kitito te lok me ginanyuta magi

15An Daniel, cwinya onongo obale woko pi lek ma obino iwiya ma opoyo tipu koma. 16Ci acito anyiko cok bot ngat mo acel ikin jo ma onongo gucung ka kenyo, ci apenye kun amito ni en otita telok magi ducu. En otita ci oweko angeyo te loke ducu, kun waco ni, 17“Lee tim magi angwen madito ni gin aye luker angwen ma gibia ki i lobo. 189Ento jo maleng pa Ngat Mamalo Twal aye gibicamo ker, dok gibibedo wegi ker nakanaka.”

19Dok amito tutwal me ngeyo lok ada ma dok ikom lee me angwene ma onongo nen mapat ki lee mukeneni ducu, ma onongo ger mamiyo kom dano myel marac, ma lworo onongo oketo dano wokoni. Lake ducu obedo nyonyo, ki lwete ducu obedo mola, ma obedo kamwodo ringo lee tyero cogogi woko lipwacpwac, ka dok onyono gin mudonge woko piny ki tyene. 20Abedo katamo lok ikom tunge apar ma onongo tye iwiyeni, ki ikom tunge mukene ma dok otwi olot ki ikin luwote, kun otwi ma onongo putu tunge adek ikom gin ma gukwongo twini pi weke kabedo. En tung lee ma onongo wange tye ma obedo calo wang danoni, kun doge bene tye ma obedo kaloko kwede lok me wake adada. Onongo en dit makato lee luwote mukeneni woko. 2110

Ikare ma abedo kanenone, ci aneno tung lee meno oero lweny ikom jo maleng, ci otayogi woko. 2211 Lacen ngat mayam okwongo bedo kwo nakani obino, ci ongolokop pa jo maleng pa Ngat Mamalo Twal, ka dong kare oo ci jo maleng gugamo ker woko.

23Te lok ma kimiya ikom lee me angweneni tye kit man ni, “Ker me angwen bibedo tye i lobo; kere bibedo pat ki ker mukeneni ducu. Ker man bicamo jo me lobo tyeko woko ducu, ci binyonogi woko piny ki tyene, dok nginyogi woko matinotino. 2412Dong lok ikom tung lee apari tye kit man: tye luker apar ma gibia ki ite ker man, dok rwot acel mukene bia ki ingegi: en bibedo pat mada ki luker ma gukwongo nyimeni, dok bene bituru ker pa luker adek woko. 2513En biloko lok marac ikom Ngat Mamalo Twal, biunu jo maleng pa Ngat Mamalo Twali. Bitemo loko karegi me woro Lubanga, ki cik ma en omiyogi. Kibimiyo jo maleng i cinge pi mwaka adek ki nucu. 26Lacen kibibedo ki kot pi ngolo kop ikome, ci kikwanyo loce woko ki bote, kun kibalo dok kityeko woko matwal nio wa i agikine. 2714Dong ker ki loc ki dit me ker ducu matye ite polo kibimiyo woko bot lwak pa jo maleng pa Ngat Mamalo Twal. Kergi bibedo ker ma bedo nakanaka, kun loc me lobo ducu bibedo kaworogi dok gibilubu cikgi.”

28Dong agiki me lok man tye kit man. An Daniel, tama omiyo cwinya opoto matek, ki koma bene obale woko; ento akano lok man i cwinya pira kena.