Daniel 8

Ginanyuta me nyok romo ki nyok dyel

1I mwaka me adek me loc pa rwot Belcajar, an Daniel aneno ginanyuta iwang lek, ki inge ginanyuta mukwongo ca. 2Ikare ma aneno ginanyuta ki iwang lek anongo ni dong atye wa i gangkal madit me Cuca, matye i lobo Elam; dok bene aneno ni atye wa i dog kulu Ulai. 3Ailo wanga malo ci aneno nyok romo ocung iwi tera i dog kulu. Nyok romonu onongo tunge tye aryo; tunge aryoni ducu giboco, ento acel ma otwi laceni onongo dok bor kato lawote. 4Aneno nyok romo kawite ki tek kun loko tunge tung kupotoceng ki tung kumalo, kaloke tung kupiny bene, ma lee tim mo onongo pe twero cung inyime. Onongo lee mo peke matwero juke onyo lare ki i tekone. En yam timo gin ma iye mito kun dwore kekene.

5Ikare ma abedo kalwodo lok cutcut aneno nyok dyel obino kun oa ki tung kupotoceng ma ngolo dye lobo ducu arii, matyene pe gudu ngom; nyok dyel meno onongo tye ki tunge ikin wange manen wa ki cen. 6Nyok dyelu oa obino bot nyok romo matye ki tunge aryoni, ma onongo aneno ocung iwi tera i dog kulu ca, ci ocako ringo ka lweny ikom nyok romo ki akemo madit adada. 7Aneno obino odire cok tutwal ki nyok romo, ci kolo ocako make ikom nyok romo ci otwomo nyok romo oturu, oputu tunge aryo ca woko; nyok romo onongo peke ki teko mo liweng me cung inyim nyok dyel. Nyok dyel orete woko piny i ngom ka onyone ki tyene; onongo pe tye ngat mo matwero laro nyok romo ki i teko pa nyok dyel meno. 8Meno omiyo nyok dyelu odwore kekene mukato kare; ento ikare ma onongo en pud teki, tunge maditi otur woko. Cutcut dok aneno tunge angwen mukene gutwi ma ginen ki cen ma gukemo twok lobo angwen ducu.

9Dok aneno tunge mo matidi otwi okati ki ikom tunge acel ki ikin gi, olot mabor ci kerone okemo tung kupiny, tung kupotoceng ki tung kunyango, ma kemo kwede Lobo me Cike.1 102 En odongo odoko madit tutwal matwero lweny ikom mony me polo; ci obolo lakalatwe mogo woko piny i ngom, ci onyonogi woko ki tyene. 11Ocako dwore kekene nio kwede wa ikom Laker me mony meno; ci okwanyo gitum awanga me nino ducuni woko ki bote, ka ojwero ode malengi obalo woko. 12Dano gubedo katimo bal kunu ma ka tyero gitum awanga me nino ducu; ci gubwoto woro Lubanga woko. Gin ducu ma tung nyok dyelu obedo katiyo onongo cobe kakare.

13Ci awinyo lumalaika aryo ka giloko ma ngat acel waco bot lawote ni, “Ginanyuta magi ma kineno iwang leki mono bimede pi kare marom mene? Bal maliki mono bileyo ka gityer me nino ducuni pi kare marom mene? Pi kare marom mene mono ma mony me polo kacel ki mony me Ot pa Lubanga kibinyonogi woko piny?”

14Ci awinyo ka malaika acel wace ni, “Man birii pi nino alip aryo ki miya adek ma pe kibityero iye gitum me odiko ki me otyeno, ka lacen kibilonyo Ot pa Lubanga kidwoko ikit ma myero.”

Lamalaika Gabriel ogonyo te lok me ginanyuta

15Ikare ma onongo an Daniel aneno ginanyuta, abedo kayenyo yo me niang iye; ci cutcut aneno ngat mo ma ocung inyima manen calo dano. 163Ci awinyo dwon dano maloko oa ki i kulu Ulai, ci olwongo ni, “Gabriel, mii dano meno onge telok me ginanyuta ma en onenoni.” 17Ci ocako bino cok ki kama onongo acung iye. Ci ikare ma obino abedo ki lworo ci apoto aryebe woko piny. Ento en owaca ni, “In wod pa dano dong iniang ni, ginanyuta ma inenoni nyutu gin ma bitime kare me agiki.”

18Ikare ma en tye kalok kweda, nino omako wanga woko acako nino nino matut kun akulu wanga i ngom; ento en oguda ci ociba acung ki tyena. 19En owaco bota ni, “Nen, abinyuti gin ma bitime lacen ikare me agiki me akemo pa Lubanga; pien loke kemo nino me agiki mayam kiciko pire con.

20Dong lok ma dok ikom nyok romo ma ineno ma tunge tye aryoni, magi gin aye luker me Media ki me Percia. 21Ento nyok dyel meno ocung pi rwot pa jo Grik; dong tunge madit ma ikin wangeni aye rwot pa jo Grik mukwongo. 22Dong tunge angwen mukene ma otwi i kaka tunge ma kituruni, ocung ma ka ker angwen ma bia ki i roke, ento tekogi pe bibedo rom ki mere.

23Ento lacen ki i agiki me loc pa ker angweni, ikare ma nongo lubalo welgi onya omede, ci rwot mo ma wange ocwiny bia cako loc, ci bibedo ngat ma toke tek, lagero, dok larweny dano. 24Tekone bibedo dit tutwal, ento man pe bibedo pi gin ma en tiyo pire kene. En bitiyo gin ma tyeko piny woko mamiyo lworo, gin ma en bitiyo ducu biwot maber, en bineko jo ma gin twoni oteka kacel ki rok pa jo maleng. 25Pi diro me bwolane, miyo en bimede ameda, dok bibedo kadwore kekene ki i tame. En bineko jo mapol tyekogi woko atura; dok bene bia lwenyo kadi wa ikom Laloc madit maloyo luker ducu; ento kibiture woko ento pe ki teko pa dano. 26Ginanyuta maloko ikom gitum me odiko ki otyeno gire obedo ada; dong igwok mung me ginanyuta man, pien pud kare me cobene pud tye mabor.”

27Dong an Daniel, kerona onongo otum woko, omiyo two omaka abutu kwede piny pi nino mogo; ka lacen aa acito katiyo tic pa rwot; ento abedo kauru ginanyuta meno ma aneno iwang leki, dok pe amedo ki niang itere wa ki acel.