Daniel 9

Daniel olego pi lutugi

1Dario wod pa Akacwero, ma en anywali pa jo Media, odoko rwot, ci oloyo ker pa jo Kaldaya. 21I mwaka mukwongo me loce, an Daniel onongo atye kakwano ki i buk maleng kun alwodo bene ikom mwaki pyere abiro ma onongo Jerucalem bidoko iye obur; malube ki lok mayam Rwot onyutu bot lanebi Jeremia.

3Ci aloko wanga bot Rwot Lubanga, kun alego dok abako doga bote, kun arii kec ma aruku bongo cola ma abuku koma ki buru bene. 4Abedo kalega inyim Rwot Lubangana ma atucu bal pa jona.

An awaco ni, “Ai Rwot Lubanga, in idit, dok wabedo ki lworo inyimi. In Lubanga me ada dok in lagen dok igwoko gicikeni kun inyutu mar meri ma pe loke bot jo ma gimari dok ma gilubu ciki. 5Watyeko timo bal, wabedo lubalo, kun watimo bene gin maracu adada. Wajemo woko ikomi, waloko ngewa woko boti, pe walubu ciki; dok bene pe watiyo gin ducu mayam iciko. 6Pe wabedo kawinyo lok pa lutici ma gin lunebi, ma gubedo katito lok ducu ki nyingi bot lukerwa, rwodiwa, ki bot kwariwa kacel ki bot lwak ducu ma gibedo i lobowa.

7Ai Rwot, kit ma atir gire tye boti keken, ento ki tung botwa lewic dong obalo wangwa woko, kit macalo otime kwede inino man ikom wan jo Juda, ikom jo ma bedo i Jerucalem, ki ikom jo Icrael ducu, jo ma bedo kamacok ki jo ma gibedo kamabor, i lobo mayam iryemogi iterogi iye ducu, pien gin onongo pe gubedo jo ma lugen inyimi. 8Ai Rwot lewic dong nen ikom wangwa ducu, kacel ki ikom lukerwa, rwodiwa, ki kwariwa, pien onongo watimo bal inyimi. 9Kica ki weko bal tye boti Rwot Lubangawa, kadi bed onongo wajemo woko ikomi. 10Pe wabedo kawinyo lok dogi Rwot Lubangawa, dok pe walubu cik ma onongo in iketo pirwa ma owok ki bot lutici ma lunebi. 11Jo Icrael ducu guturu ciki woko, ka guloko ngegi woko boti, gukwero winyo lok dogi ma ibedo kaloko botgi. Pimeno oweko lok me ceno dano ki lok me lamo dog mayam kicoyo i buk pa Moses ma en latici, kikwanyo kionyo woko ikomwa, pien dong watimo bal inyimi. 12In dong icobo gin mayam iloko ikomwa ki ikom luloc ma onongo giloyowa. Dok bene ityeko pwodo Jerucalem ki lakit pwod magwar mayam pud peya onen ikom taun madit mo matye piny ite polo. 13Kadi bed can madit man opoto ikomwa, kit macalo kicoyo i buk me cik pa Moses, ento pe walego kica bot Rwot Lubangawa, pe waweko balwa ducu, kun wamine kenwa me lubu ada ma meri. 14Meno aye gin ma omiyo in Rwot ikano can madit pirwa, ka lacen iketo ikomwa; pien in Rwot Lubangawa in ipore i gin ducu ma in itiyo, ento wan aye pe wabedo kawinyo loki. 15Kombedi dong, ai Rwot Lubangawa, yam ikwanyo joni woko ki i lobo Ejipt ki tekoni, yam imiyo nyingi oywek iye, kit macalo tye kwede ikare man, ento onongo wabalo, dok watimo gin maracu adada. 16Ai Rwot, kit macalo gin ducu ma itiyo tye atir, jwa kinigani ki akemoni woko ki ikom Jerucalem ma en aye taun madit maleng, pien pi bal mewa, ki pi bal mapol mayam kwariwa gutimo, omiyo Jerucalem kacel ki lwaki gudoko lok aboka ki ikin rok ducu ma gibedo kangetwa ma gurumuwa dyere. 17Pimeno kombedi, ai Lubangawa, winy legana an latici, ki lega me bako dog ma akelo inyimi. Dok bene ai Rwot, loke inenwa ki wangi me kica wek iroc Ot meri maleng, ma dong odoko oburri. 18Ai Lubangana, cik iti iwinywa, yab wangi ci inen topiny ma opoto ikomwa, ki ikom taun madit ma kilwongo ki nyingini. Pe wabako dogwa boti kun wageno ni kitwa tye atir, ento pi geno kica meri madwong. 19Ai Rwot, winywa ba. Ai Rwot, wek balwa. Ai Rwot, tii gin mo pirwa, pe igale, pi nyingi keni keken. Ai Lubangana, pien taun madit man kacel ki lwak ducu ma gibedo iye kilwongogi ki nyingi.”

Gabriel ogonyo te lok me Nebi

20Ikare ma abedo kamede kalok kun alego, atucu bala ki pa lutuwa jo Icrael, kun bene akelo lega me bako doga inyim Rwot Lubangana pi Ot mere maleng. 212Ikare ma atye kalok kun alego kwede, cutcut atugi neno lamalaika ma nyinge Gabriel, ma onongo dong atyeko nenone iwang lek i ginanyuta mukwongo ca. En obino bota kun ngweco madwir adada i cawa me gitum me otyeno. 22En obino ci owaca ni, “Daniel, kombedi abino kamiyo boti ryeko ki niang ma oromo. 23I acaki lega me bako dogi, Lubanga omiya lagam me legani. Kombedi dong abino katiti lagame, pien Lubanga mari matek tutwal. Pimeno dong iwiny lok man maber wek iniang itelok me ginanyuta ma inenoni.

24Mwaka miya angwen ki pyere abongwen en aye kare ma kiciko ma okemo lutuwu ki taunwu madit maleng, pi tyeko bal me kwero lubu cik, pi giko bal woko dong matwal, ki pi kwanyo bal woko ki i komwu wek dong wulim kit ma atir ma bedo nakanaka, wek ginanyuta kacel ki lok mayam lanebi oloko ocobe kakare, dok bene pi dyero kabedo maleng makato ducu odoco. 25Dong amito inge dok iniang maber ni, nia ikare ma lok man cito kwede woko pi roco ki pi gero Jerucalem odoco, nio wa ibino pa dano ma kiyero ma en laker, bibedo mwaka pyere angwen wiye abongwen. Ci Jerucalem bibedo mwaka miya angwen ki pyere adek wiye angwen ma dong kigero odoco ki dye kale ki cel lobo ma kitoro atora, ento meno bibedo ikare ma nongo ayelayela dong dwong adada. 26Inge mwaka miya angwen ki pyere adek wiye angwen, ngat ma kiyeroni kibineko woko i yo ma pe tye kakare. Laker matek adada bibalo taun madit kacel ki kabedo maleng woko. Agikine bibino macalo pii aluka, ma lweny ki bale pa jami bibedo teretere nio wa i agiki kit mayam Lubanga oyubu. Man aye topiny mayam kiciko pireni. 273Laloc meno bimoko gicike ki jo mapol pi mwaka abiro; ci ka mwaka adek ki nucu dong okato, en bijuku gitum ki gityer woko. Laloc meno bikelo gin me kwer malik me topiny ci biketone kama lamal makato matye i kabedo maleng i Ot pa Lubanga, nio ka Lubanga bityeko ngat ma oketoni woko kit mayam oyubu.”