Daniel 10

Ginanyuta ma Daniel oneno inget kulu Tigric

1(I mwaka me adek me loc pa Ciro rwot me Percia Lubanga onyutu lok mo bot Daniel, ma nyinge mukene Beltecajar. Loke obedo lok ada, ento onongo tek tutwal me niang tere. Ci Daniel oniang tere matut i ginanyuta ma en dok oneno.)

2Ikare meno ducu, onongo an Daniel abedo kakumu pi cabit adek kulu. 3Pe abedo kacamo cam mo mamit, pe acamo ringo kadi ki kongo bwino bene pe odonyo idoga, dok pe awiro koma ki moo wa ki acel, pi cabit adeki kulu. 4Inino dwe pyere aryo wiye angwen me dwe mukwongo, anongo ni acung i dog kulu madit, ma en aye Tigric. 51 Atingo wanga aneno malo ci aneno dano mo ma oruku bongo camanini, ma otweyo pyere ki del jabu me Upaj. 6Kome onongo obedo calo got berul ma mil amila, ki tur nyime nen calo lutkot ma wil, ki wange ryeny calo mac, bade ki tyene ducu onongo nen calo mola ma kirudu maleng adada, ki loke ma en loko winye calo woo pa lwak dano mapol. 7An Daniel keken aye ma aneno ginanyuta. Jo ma onongo gitye kacel kweda pe guneno, ento myelkom madit opoto ikomgi, ci guringo gukane woko. 8Guweka adong kena, ci aneno ginanyuta man madit. Ikare ma dong aneno ci teko mo pe odong ikoma; kit ber me koma oloke woko ma ngat mo keken pe romo ngeyo an. 9Ka dong awinyo dwone ki lok ma en obedo kalokone, ci apoto piny aryebaic ci anino nino to adada ma pe angeyo koma.

10Cutcut cing dano mo oguda omiyo agungu ki wi cinga ki conga ma koma myel matek. 11En dano meno owaca ni, “Daniel, in Lubanga mari adada, cik iti wek iwiny lok ducu ma atye kalokone boti. A itire icung atir, pien an kombedi kiora boti.” Ikare ma onongo en pud tye kaloko lok meno, aa malo acung ma koma myel amyela likwak kwak. 12Ka lacen en owaco ni, “Daniel, pe ilwor, pien cake inino mukwongo ma iketo kwede cwinyi kaniang ki ka mwole woko keni inyim Lubangani, loki ducu dong onongo Lubanga otyeko winyone. Nen an dong atyeko bino macalo lagam me loki. 132Lamalaika ma en laker maloyo ker me Percia onongo ogenga woko pi nino pyere aryo wiye acel kulu. Ci Mikael, ma en ngat acel madit maloyo lumalaika ducu, oa obino kakonya pien onongo kiweka adong kunu kena. 14An abino kaniangi wek inge can ma bipoto ikom rokwu ikare me lacen. Pien ginanyuta man ma inenoni bene loke bitime ikare ma pud tye anyim.”

15Ikare ma en dong oloko bota kit lok macalo magi ducu, akulu wanga piny i ngom adoko calo ladoge oto. 16Ci lamalaika ma nen calo danoni ogudu del doga; ci angamo doga aloko bene. Awaco bot en ngat ma onongo ocung inyimani ni, “Ai rwoda, pi tyen lok me ginanyuta man ma aneno, omiyo arem mapol obino ikoma, pe dong atye ki teko mo wa ki acel. 17An abedo calo opii ma ocung inyim rwode, atwero ngwete kalok kwedi ningning? Pien kombedi teko mo dong pe odong ikoma liweng, dok bene aluu mo ma odong icwinya peke.”

18Lacen dok ngat manen calo danoni oguda tyen me aryo ci omiya teko. 19Ka dong owaca ni, “In Lubanga mari adada, pe ilwor; ibibedo maber dok ki kuc. Bed ki keru dok tekcwiny.”

Ikare ma oloko kweda, alimo teko kun awaco ni, “In rwoda aye dong iloki, pien dong ityeko miya teko.”

20En openya ni, “In ingeyo tyen lok ma omiyo abino botini? Ento kombedi dong abiloke adok ka lweny ikom lamalaika ma laker maloyo ker me Percia. Ka dong atyeko lweny kwede, ci nen, lamalaika ma laker maloyo ker me Grik bibino. 21Ento an myero atit boti gin ma kicoyo i buk me lok ada. Pe tye ngat mo matye kangeta ma konya kilweny ikom jo magi kono Mikael keken, ma malaika ma gwoko jo Icrael.