Daniel 11

1I mwaka mukwongo me loc pa Dario ma en jo Medi, an aa malo kakonye ki kamiye teko. 2Kombedi dong abinyuti lok me ada.”

Ker me Ejipt ki me Aciria

Ci lamalaikanu owaco bota ni, “Lobo Percia dok bibedo ki luker mukene adek; ento rwot me angwene ma bilubugi bibedo lalonyo makatogi ducu; ka dong inen odoko tek pi lwak lonyone ducu, ci en bitugu rok ducu pi lweny ikom ker pa jo Grik.

3Lacen rwot matek bituc, ma biloyo lobo ki loc madit kun tiyo gire gin ducu kit ma iye mito. 4Ento ka dong ineno en ocako loc kitmeno ci kere bitur woko poke i dul angwen; ker me kumalo, me kupiny, me kunyango ki me kupotoceng. Rwodi ma biloyo ker magi pe bibedo likwaye, dok pe bilubu kit loc ma onongo en loyo kwede lobo; pien kibitingo kere woko ki bere kimiyo bot jo mukene ma pe likwaye.

5Dok rwot maloyo lobo me Ejipt bibedo matek, ento ngat acel ki ikin rwodine bibedo tek makato en, dok loce bene bibedo loc madit. 6Inge mwaka mogo rwot me Ejipt biribe woko ki rwot me Ciria pi yubu lok me kelo kuc, ci bimiyo en nyomo nyare woko. Ento ribe man me kuci pe bibedo pi kare malac, ci dakonu gin ki cware, latine, kacel ki lutice ma gucito kwede ikare ma kinyome i loboneni kibinekogi woko bene.

7Ikare meno ngat acel ki ikin wadi pa dakonu aye bidoko rwot. Ci en bibino ka lweny ikom dul mony me Aciria ci donyo wa i gang ma kirumu ki cel gogo pa rwot me Aciria; en bilwenyo ikomgi ci biloyogi bene. 8En bicoko lwak lubangagi ki cal jogigi ma kiliyo aliya ki jami me wel ma kitiyo ki ryal ki jabu, ci terogi i Ejipt; ka dong pi mwaka mogo en kong dong bibedo ma pe dok lwenyo ikom rwot maloyo lobo me Aciria. 9Lacen rwot me Aciria bibino lwenyo ikom rwot me Ejipt, ento biloke dok gire i lobone kikome.

10Awobe pa rwot me Aciria gibiero mony ci gibiguru lumony mapol kacel. Ngat acel ki ikin gi bibino ikom lukworgi calo pii aluka ci lwenyo matek ma tero mony wa i cel gogone. 11Ci kiniga bimako rwot me lobo me Ejipt matek, ci miyo en bibino ka lweny ikom rwot me lobo me Aciria; biguru lwak mony madit, ci kibimiyo lukwore i cinge bene. 12Ka dong oneko acikari alip ki alip, ci bibedo ki wake i cwinye; ento pe bibedo laloyo matwal. 13Rwot me lobo me Ciria pud bimede ki coko lwak lumony mapol maloyo jo ma wiati ca; ka dong inge mwaka mogo en cako bino ki mony madit ki lwak jami me lweny mapol.

14Ikare meno ducu dul mony mapol bicako lweny ikom rwot me lobo me Ejipt; dok lutim bwami ma ikin lutuwu kikome gibingwete me cobo telok me ginanyuta, ento pe gibitwero. 15Dok rwot me lobo me Aciria bibino rumu taun madit, ci mako taun madit meno woko ma kirumu ki cel gogo maber adadani. Ento dul lulweny ma gibia ki i lobo me Ejipt pe gibicung, kadi wa twoni lweny ma kiyerogi ayera, pien teko mo me cung bibedo peke botgi. 16Dong rwot me Ciria bibino ka lweny ikome bitime kit ma cwinye mito, ci ngat mo ma bijuku en pe bibedo tye. Monye bicung i lobo me deyoni, ci lobo meno ducu dong bibedo ite twerone.

17Rwot me Ciria bibedo ki yub me bino ki tek ite kere ducu, kun tiyo ki monye. Ci iyub ma mere me tyeko ker pa meroke woko, en bibedo calo tye ki yub me kelo kuc, ci bimiyo nyare wek rwot me Ejipt onyom; ento yube pe bicung dok kadi wa mede pa kere bibedo peke. 18Lacen en biloke ka lweny ikom lobo ma gitye tung dog nam, ci biloyogi woko. Ento latel wi mony ma larok biloyo en ci bikane woko pi lewic; ada, en dok bidwoko lewice cen ikom rwot me Ciria. 19Ci biloke dok cen i cel gogo me lobone kikome; ento kibiloye woko, ci man bibedo agiki me loce.

20Lacen ngat ma leyo kakare bibino ma bicwalo lajog mucoro ma bidiyo dano kajogo mucoro pi medo lonyo me kere; ento pi kare manok keken kibineke woko, pe ki ikin dano nyo i dog lweny mo.”

Rwot ma lacira me Ciria

21Lamalaika omede ki tito loke kun waco ni, “Rwot mukene me Ciria ma bileyo katyene bibedo dano mo malam dok lacira; en bibino atura ci mayo mere ker woko ki lok bita. 22Mony ducu ma bijemo ikome kibijwerogi kiturugi woko i nyime, kadi wa Ajwaka Madit pa Lubanga bene kibineko woko. 23En bibedo katic ki lok me bwola keken me yubu cike me ribe ki rok mogo; ci bimede doko tek kadi ka tye kaloyo rok manok mo keken. 24En bimonyo dul lobo ma lonyo dwong iye, ci bitiyo gin mo ma kwarine ducu onyo wegi kwarine yam pe gutiyo, me keyo luyak woko ki ikin gi liweng, ci bipoko jami ma kiyakoni ducu bot jone. En biyube me lweny ikom gangi me cel gogo matego, ento man bibedo pi kare manok mo keken.

25En bitugu lweny ikom rwot me lobo me Ejipt ki mony madit; ci rwot me Ejipt bilweny ki dul mony madit matek adada; ento en pe bitwero cungu, pien kibibedo ki yub mapol tutwal ikome. 26Kadi wa lumiitame aye ma bineke ma gibijwero monye woko, ci gineko lwak jo mapol ma komgi birade piny i ngom lirat. 27Dong luker aryoni gibibedo kacamo iwi meja acel, ento tam ma icwinygi bibedo kaparo lok me kwarcwiny keken; ci ngat man bibedo kaloko lok goba bot lawote. Ci pe gibinongo gin moni ma gimitoni, pien kare me cobo lokginu peya oromo, ento bitime ikare ma kiciko. 28Rwot me Ciria bidok i lobone ki lwak lonyo madwong ma oyakogini, ento pud bibedo ki kwarcwiny ikom gicike maleng, kun nongo omoko tame me tyeko dini pa Lujudaya woko. Dok en bitiyo kit gin ducu ma cwinye mito, kadong bidok cen i lobone kikome.

29Ikare ma kiciko en biloke dwogo i Ejipt; ento man pe bibedo kit macalo yam obedo kwede wiati. 30Mony pa jo Roma gibibino ki lwak mel mapol ka lweny ikome. Lworo bimake ci juke woko kene. Ci en bidok woko cen ki ngeye, ci cako lweny ki akemo madit ikom dini pa Lujudaya. En bilubu tam pa jo ma dong gubwoto dini pa Lujudaya woko. 311Dul mony mogo ma a ki bote bibino dok pyedo Ot pa Lubanga ki cel gogo woko, ci gibikwanyo gitum awanga ma kityero nino ducu woko ci gibiketo gin me kwer malik i Ot pa Lubanga. 32En bitic ki bita kaywayo tam pa jo madong gubwoto dini pa Lujudaya woko; ento jo ma gingeyo Lubangagi gibicung liking ci gilwenyo bene matek pi niyegi. 33Dong jo mogo ma luryeko ma gitye ikin lwak gibimiyo jo mapol giniang, kadi bed kibinekogi woko ki pala lucwan, dok kiwangogi woko bene ki mac, nyo kiterogi i opii, ma kiyako jamigi woko pi kare mogo. 34Ikare ma nongo kitye kamede ki nekogi, jo pa Lubanga gibilimo kony mogo manoknok, ento pol jo ma biribe kwedgi pe gibibedo ki cwiny me ada ikomgi. 35Ci lutela ma luryeko mogo ma ikin gi kibinekogi woko, ento meno bimiyo lwak gilonye gidoko leng macalo jabu ma kiliyo maber, ci miyo gidoko maleng labongo cilo, nio ka kare me agiki oromo, ma en kare mayam Lubanga ociko. 362

Rwot me Ciria gire bitiyo gin ducu kit macalo cwinye mito; en bingwete me bedo dit makato lubangagu ducu, ka cako loko lok mogo me yet ikom Lubanga maloyo lwak lubangagu ducu. En bimede kun pud bedo ki dit wic nio katic me akemo pa Lubanga dong otum woko liweng; pien gin ma Lubanga omoko bitime. 37Rwot me Ciria pe bibedo ki woro mo liweng ikom lwak lubanga pa kwarine, nyo bot jok ma mon maro adadani; pe bimiyo kit winy mo bot lubangagu mukene, pien en bikete kene me bedo dit maloyo jami ducu. 38Ma ka worogi en bibedo kaworo lubangagu me cel gogo ma en aye lubanga mayam kwarine pe gungeyoni; en bityero bote jabu kacel ki ryal, ki kidi matino me wel, ki mot ma welgi malo adada. 39En biketo lurok ma giworo lubangagu mapat pi gwoko cel gogo mere; jo ma guye dite en biketogi i rwom me dito ki deyo. En biketogi gibedo luloc ci giloyo jo mapol, dok bipoko lobo botgi me awila.

40Ka kare me agiki pa rwot me Ciria dong cok, rwot me Ejipt bilweny ikome; ento rwot me Ciria birune bino ikome woko oyotoyot calo yamo lapiru, kun bino ki lwak gadigadi ki wegi aguragura, ki lwak mel madwong ata. En bibino ci bimonyo lobo mapol ata ci lumonye bipongo lobonu ducu macalo pii aluka. 41En bibino wa i lobo me deyo me Icrael. En bineko jo alip ki alip woko, ento jo me rok magi aye gibibwot ki i cinge: jo Edom, jo Moab ki jo mogo ma gudong ki i lobo Ammon gibibwot. 42En biryeyo cinge me lweny ikom lobo mapol, kadi ki lobo Ejipt bene pe bibwot. 43En bikwanyo lonyo me jabu ki me ryal, ki jami me wel ma i Ejipt ducu; dok en bene biloyo lobo Libya ki Etiopia woko. 44Ento lok ma biwinye kun a ki tung wokceng ki tung kumalo bimiyo cwinye poto; en bia cito kunu ki twon akeca madit kajwero dano woko ki neko jo mapol bene. 45En biguru kemane madito ikin nam ki got maleng3 me deyo; ci kibineko en kunu labongo ngat mo matwero konye.”