Ejekiel 38

Lok ma kitito ikom Gog

1Rwot dok oloko kweda. 21En owaca ni, “Wod pa dano, cik wangi inen Gog matye i lobo Magog. En aye laker madit me lobo Mecek ki Tubal. Tit loki ikome, 3kun iwace ni Rwot Lubanga Matwero ducu owaco kuman ni: nen, atye ki lok ikomi, in Gog, laker madit maloyo Mecek ki Tubal. 4Abimiyo iloke ineno kamukene, ci agolo cwaki woko ki goli, ka apeyi kwede akeli kamaleng kacel ki monyi ducu, ki aguragura ni ki jo ma gingweco kwedgi, ma gin ducu guruke woko ki jami lweny. Gin lwak ma gitye i dul mony madit, ma gin ducu giwoto nongo guteno kwot, ma guyube ki gin lweny ducu dok gumako kwot ocal ki kwot kikome, ki pala lucwan. 5Jo Percia ki Kuc, ki jo Put bene gitye kacel kwedgi, ma gin ducu gumako kwot kun bene guruku tok me lweny. 6Jo Gomer ki dul monygi ducu, ki jo Bet-togarma ma gua ki kamabor i lobo matye tung kumalo, ci gubino ki dul monygi ducu, ki lwak me rok mukene bene ducu gubino ma gitye kacel kwedgi. 7Tit bote ni en myero oyube woko kacel ki dul monye ducu ma gucoke bote pi winyo cike. 8Ci inge mwaka mapol kare bibino ma abicwale ni ocit olweny ikom lobo mo ma dano dong gubedo iye labongo lworo mo me lweny, en lobo kama yam kikelo iye dano ma kicokogi ki ikin rok mapol, wek gubed iwi godi me Icrael ma onongo yam odoko tim atani. Jone kikelogi woko ki ikin lurok ci kombedi gin ducu dong gibedo maber labongo ayela mo. 9Dong en kacel ki dul monyeni, ki lwak me rok mapol ma gitye kacel kwede, gibibino calo yamo lapiru ka lweny, ma nongo giumu lobo woko lipuk calo pol ma oumu piny.”

10An Rwot Lubanga Matwero ducu awaco kuman bot Gog ni, “Inino meno ibicako yubu tam i cwinyi me tiyo gin marac. 11Ci ibimoko tami giri me cito ka lweny ikom lobo ma jone gibedo mot maber labongo ayela mo i taun gi ma pe kirumugi ki cel, rii nyonyo bene pe iye, kadiwa dog gangigigu bene peke. 12Ci dok ibiyako jami pa dano ma gubedo i taun madito mayam odoko oburri ci itero woko. Gin yam kicokogi ki ikin lurok mapatpat ci kombedi dong gitye ki lwak dyangi, ki jami mapol, kun bene gubedo wa idye lobo kikome. 13Ci jo Ceba, jo Dedan ki lucatwil ma i taun matye i Tarcic gibipenyi ni, ‘In ibino kara ka yako jami bo? Dong ityeko guru dul monyi me tingo jami ma kiyako, ki dok ibino pi coko ryal ki jabu, ki me coko dyangi ki lwak jami mapolgu, nyo me coko jami mapol ma kiyako?’”

14Pimeno, Rwot Lubanga Matwero ducu oora ni atit ki Gog ni etye kawaco loke boti kuman ni, “Inino meno ka jona jo Icrael dong gubedo maber labongo ayela mo, ci in cwinyi bituge kekeni 15kun ia ki i kabedoni matye kamabor i lobo matye tung kumalo me lobo Icrael. Ci ibibino kun itelo wi dul mony madit dok matek ma acikari ma gitye iye gua ki i rok ducu, gin ducu jo ma ngweco ki aguragura. 16In Gog ibibino ilwenyo ikom jona jo Icrael calo pol ma umu lobo. Lacen ka kare oromo, abicwali icito ka lweny ikom lobona, wek omii lurok gungeya, dok pi nyutu ni an aleng pi gin ma atiyo ki cinga ikom in Gog, kun gin rok ducu bene gineno. 17In aye ngat mayam abedo kalok pire ikare mukato con ca, ikare ma amiyo loka bot lutica lunebi me Icrael, ma gutito lok ni ikare ma pud tye anyim abikeli me lweny ikomgi.” Man an Rwot Lubanga Matwero ducu ma awaco.

Pwod ma Lubanga biketo ikom Gog

18An Rwot Lubanga Matwero ducu awaco ni, “Inino ma Gog bibino ka lweny iye ikom Icrael, abidoko ger ma nongo akemo omaka ma pe wace. 19Atucu loke kamaleng ki nyeko me akemona ma lyel alyela. Inino meno oyengyeng biyengo lobo Icrael matek. 20Man bimiyo rec me nam ducu, ki winyi, ki lee tim, ki gin ducu malak alaka i ngomgu, ki jo ducu ma gibedo i lobo komgi bimyel pi lworo an. Ci godigu ducu gibicore gipoto woko piny, ki longogu bene bipoto woko, dok cel bene ducu gibicore gipoto woko i nam. 21Ci abimiyo Gog bibedo ki lworo madwong atika, kun nongo akelo kit pwod ducu mapatpat aketo ikome. An Rwot Lubanga Matwero ducu dong aloko. Ci jone ducu gibineke woko keken gi ki pala lucwan kun dano acel acel neko lawote. 22Dong abiketo can ikome kun bene abikelo two gemo ikome ci neko dano. Ka dok abicoro kot ma cwer ki yamo matek, pee ma core, ki gweng calfa ma mac oliyo woko, ma cwer ikome kacel ki ikom lwak me rok mapatpat ma onongo gitye kacel kwede. 23Kitmeno abinyutu bot lwak me rok ducu ni an adit dok aleng, kun anyute inyimgi ni wek gungeya. Man bimiyo gingeyo ni an aye a Rwot.”