Ejekiel 37

Nota ma opong ki cogo ma otwo

1Rwot onongo odiya matek ki cinge, ci okela woko ki Cwiny mere, ci ociba piny wa idye nota ma opong ki cogo keken. 2Ci en otela awoto arumu nota woko adunu ikin cogo; ci aneno lwak cogo mapol ata matye kunu, dok onongo dong gutwo woko adada. 3Ci Rwot dok owaca ni, “Wod pa dano, cogo magi doki gitwero bedo kwo?” An adok iye ni, “Ai Rwot Lubanga Matwero ducu, in giri aye ingeyo.” 4Rwot dok owaca ni, “Tit lok bot cogo magi, kun iwaco botgi ni, Wun cogo mutwo, wuwiny lok pa Rwot. 5Wac botgi ni an, Rwot Lubanga Matwero ducu, abiwaco botgi kuman ni, ‘Abiketo yweyo me kwo i iwu ci amiyo doki wubedo kwo. 6Dok bene abiketo ler i komwu, ci amiyo ringo bino i komwu, ci dok amiyo del kom umu komwu woko. Ci abiketo yweyo me kwo i iwu, ci wubibedo kwo doki. Man bimiyo wungeyo ni an aye a Rwot.’”

7Kitmeno atito lok kit macalo onongo kiwaca ni atit. Ikare ma atye katito lok, awinyo woo, ci cogo gucako coke guribe woko kacel, ci cogo magi gucako moko ikom wadi. 8Ikare meno abedo kanenogi, ci aneno ler komgi, ki ringo komgi bene dong obino ikomgi, ka dok del komgi dong oumugi woko. Ento yweyo aye onongo peke i igi. 9Rwot Lubanga owaca ni, “Wod pa dano, tit lok bot yamo. Cit itit ki yamo ni an aciko en ni, omyero yamo obin kun oa ki tungi ki tungi ducu, me kelo yweyo ikom dano magi ma gutoni wek doki gucak bedo ma kwo.” 101Ci atito lok kitmeno kit macalo Rwot ocika kwede, ci yweyo me kwo odonyo i igi, ci gucako bedo kwo, kun gucung ki tyen gi. Dok onongo gin tye lwak dano maromo dul mony madit tutwal.

11Lubanga dok owaca ni, “Wod pa dano, cogo magi gin aye jo me ot pa Icrael. Giwaco ni cogogi dong otwo woko; ki gen gi bene dong peke matwal pi kwogi me kare me anyim. 12Pimeno, tit lok bot jona jo Icrael ni an, Rwot Lubanga Matwero ducu, abiyabo lyel woko. Ci abicero jonani woko matye i lyeli, ci dong adwokogi cen paco i lobo Icrael. 13Ci gin jona dong gibingeyo ni an aye a Rwot, ka dong atyeko yabo lyelgi, ma acerogi woko ki i lyel. 14Dok abiketo Cwiny mera i igi, ci bimiyo gibedo kwo, ki bene abiketogi gibedo i lobogi kikome. Man bimiyo gingeyo ni an aye a Rwot. Yam acike ni abitimo man, ci dong atyeko timone. Man an Rwot ma awaco.”

Jo Juda ki Icrael gibibedo ite ker acel

15Rwot dok oloko kweda. 16En owaco ni, “Wod pa dano, kwany odoo yat mo ci ico coc ikome ni, ‘Pi Juda, ki dok pi jo Icrael mayam guribe kwede.’ Ka dok ikwany odoo yat mukene ci ico ikome ni, ‘Pi Yucepu ma koni dong tye i cing Epraim dok ki pi jo Icrael ducu mayam guribe kwede.’ 17Ci dong irib odoo aryoni woko kacel wek dong gudok odoo acel ki i cingi. 18Ento lutuwu gibipenyi ni itit botgi pi odoo magi aryoni. 19Ci in itit botgi ni an, Rwot Lubanga Matwero ducu, abikwanyo odoo ma ocung pi Icrael, ci aketo ikom odoo ma ocung pi Judani. Gin odoo magi aryoni abimiyo gidoko odoo acel kun amako i cinga bene. 20Ka dong inen imako odoo magi aryo ma icoyo coc ikomgini i cingi ma gin gineno, 21ci dong itit botgi kuman ni an, Rwot Lubanga Matwero ducu, abikwanyo jo Icrael woko ki ikin lurok kama yam gucito gubedo ikin gi ni, ci abicokogi woko ki i kabedo ducu, akelogi aketogi i lobogi kikome. 22Abiribogi ci gidoko rok acel keken i lobogi, iwi godi me Icrael. Dong gibibedo ki rwot acel keken maloyo gin ducu, pe gibipoke gibedo rok aryo, dok bene pe gibipoke me bedo ki ker aryo. 23Pe dok gibibalo komgi keken gi ki cal lubangagi ki gin me kwer mogo maracu mayam gutiyo, pe bene gibibalo komgi ki kit balgi ducu. Ci abilarogi ki i yo ducu ma weko gingak gidok kwede katimo bal, ma omiyo gungayo wanga woko, ci abilonyogi gibedo leng; gin dong gibibedo jona, ki an bene abibedo Lubangagi, 242Latica Daudi aye dong bibedo rwot ma loyogi. Gin ducu dong gibibedo ki lakwat acel. Ci gibilubu cika dok bene gibigwoko gin ma an aciko ducu kun gitiyo bene. 25Dong gibibedo i lobo mayam kwariwu gubedo iye, ma onongo amiyo bot latica Yakobo. Ci gibibedo kunu matwal kacel ki lutinogi wa ki likwayogi ducu bene. Ci latica Daudi biloyogi matwal. 26Dong abiketo gicikena kwedgi; ci gicike man ma aketo kwedgini bedo gicike me kuc ma rii matwal. Abimiyo gum botgi dok abimiyo ginya gimede, ci dong abiketo kabedona maleng i dyegi matwal. 273Abibedo kunu kacel kwedgi kun abedo Lubangagi, ki gin bene gibedo jona. 28Ci man bimiyo lurok dong gingeyo ni an Rwot dong alonyo Icrael woko, ka guneno kabedona maleng ma bedo matwali tye idyegi.”