Ejekiel 39

Kiloyo Gog woko i lweny

1Rwot Lubanga Matwero ducu owaco ni, “In wod pa dano, tit lok ikom Gog, ma en laker madit maloyo lobo Mecek ki Tubal, cit itite ni atye ki lok ikome. 2Abimiyo en loke neno kamukene ci akwanye woko wa ki i lobo ma en tye iye ca kamabor i tung kumalo, ci en biwot ki kunu nio ka en obino wa i godi me Icrael. 3Ci abigoyo atume ki i cinge ma lacam poto woko, dok bene amiyo aterone poto woko ki i cinge ma lacuc. 4Gog ki dul monye ki lwak me rok mapatpat ma gitye kacel kwede gibipoto gito woko iwi godi me Icrael, ci dong abimiyo komgi doko cam pa kwayi winyo ducu ma camo ringo ki pa nguugu. 5Gibipoto idye bar kamaleng ci gito woko. An Rwot Lubanga Matwero ducu dong aloko man. 6Abicwalo mac i Magog dok ikom jo ma gibedo mot labongo ayela i lobo murumu dog nam, man bimiyo gingeyo ni an aye a Rwot. 7Abimiyo jona jo Icrael gingeyo nyinga malengi, dong pe abimiyo gipyedo nyinga malengi matwal. Ci rok ducu dong gibingeyo ni an aye a Rwot Lubanga Maleng pa Icrael.”

8An Rwot Lubanga Matwero ducu awaco kuman ni, “Nino ma aloko pireni ada dong tye kabino. 9Jo ma gibedo i taun madito me Icrael gibicito woko gicoko jami lweny ma kiwekogu giobo ki mac calo yen. Gibiobo mac ikom kwot, atum, atero, odoo madito ki tonggi, ma gibibedo ka obogi pi mwaka abiro kulu. 10Man dong pe bimiyo gibedo kacoko yen ki i tim, dok bene pe dong gibitongo yen ki i bunga, pien dong gibimoko mac ki jami lweny ma kiwekogu. Gibiyako jami pa jo mayam guyako jamigi gucito kwede.” Man an Rwot Lubanga Matwero ducu ma awaco.

Kiyiko Gog woko

11Rwot Lubanga dok owaco ni, “Inino meno abimiyo kabedo me yik bot Gog i lobo Icrael, i Nota pa Luwot, matye yo tung kunyango me nam me Kado. Gog ki jo me dul monye ducu kibiyikogi kunu, ci notane dong kibilwongo ni Nota me Mony pa Gog. 12Jo Icrael gibibedo kayiko kom jo ma otoni pi dwe abiro kulu, pi lonyo lobogi wek obed maleng kit mayam con. 13Wegi lobo ducu gibibedo kayiko kom jonu, man bimiyo giworogi pi gin ma gutimo inino ma abimiyo iye locani. An Rwot Lubanga Matwero ducu dong aloko. 14Gibiyero jo mogo ki ikin gi me bedo kawot kun giwok gikato ki i lobogi teretere me yiko kom jo mogo mayam nongo pud gudong ma onongo pe kiyikogi, pi lonyo lobogi wek dok obed maleng kit mayam tye kwede con. Dong inge dwe abiro gibibedo kangiyo piny i kabedo ducu me neno ka dong kiyiko jo ma oto ducu ki i lobo. 15Ci ikare ma nongo jo ma kiyerogini tye kawot i lobo, kace ngat mo ikin gi onongo cogo dano, ci keto lanyut mo kanget cogonu, nio ka luyik dano guyikogi woko i Nota me Kamon-Gog. 16(Taun mo tye kunu ma kibilwongo ni Kamona.) Meno aye kit macalo gibilonyo ki lobo wek obed maleng kit mayam con.” 171

Rwot Lubanga Matwero ducu owaco bota kuman ni, “In wod pa dano, lwong kwayi winyo ducu mapatpat ki lee tim ducu me coke kacamo gitum ma atye kayubune pirgi. Man bibedo karama madit iwi godi me Icrael, kama gibicamo iye ringo dok bene gimato iye remo. 18Gibicamo kom acikari ma gin cogi oteka, dok gibimato remo pa luloc me lobo, remo nyogi romi ki pa lutino romi, ki pa dyegi ki pa twoni, ma gin ducu lim makwo me Bacan ma gucwe. 19Ka aneko jo magi macalo lee me gitum, ci winyo kacel ki lee gibicamo kit moo ducu ma giromo nongone, dok bene gibimato remo nio wang ma omerogi woko. 20Ci gibicamo gin ducu ma ginongo iwi mejana ma giromo camone, ki aguragura ki jo ma gingweco kwedgi, wa ringo kom acikari ki pa oteka lweny.” Man an Rwot Lubanga Matwero ducu ma awaco.

Lubanga bidwoko gum bot jo Icrael

21Rwot Lubanga dok owaco ni, “Abinyutu deyona ikin lurok wek gunen, dok bene abinyutu botgi kit macalo atiyo ki twerona me ngolo kop atir, ma nongo aketo cinga me pwod ikomgi. 22Cake inino meno cito kwede anyim, jo Icrael gibingeyo ni an aye a Rwot Lubangagi. 23Lurok dong gibingeyo ni jo Icrael yam kiterogi i opii pi balgi, pien onongo gutimo bal maracu atika ikoma, ma omiyo aloko ngeya woko botgi ci amiyo lukworgi gumakogi ka gunekogi woko bene ducu ki pala lucwan. 24Ci atimogi muporo balgi ki rocgi ma gutimo, ci nongo aloke woko ki botgi.”

25An Rwot Lubanga Matwero ducu awaco ni, “Pimeno kombedi, kica bimaka ikom likwayo pa Yakobo, ma gin aye jo Icrael, ci abidwoko gumgi botgi. Ci abibedo ki nyeko kun agwoko nyinga malengi. 26Ci wigi biwil woko ikom lewic mayam gibedo kwede, pi bal me tim roro ma gubedo ka timone ikoma, ka dong gibibedo i lobogi mot ma ngat mo pe bimiyo gibedo ki lworo. 27Abikwanyogi ki iwi lobo ducu kama lukworgi gibedo iye ci adwokogi cen, kun anyutu bot rok mapol ni an aleng. 28Man bimiyo jona gingeyo ni an aye a Rwot Lubangagi, pien yam amiyo kiterogi i opii ikin lurok, ka dok acokogi adwokogi cen i lobogi kikome. Pe dong kibibwoto dano mo ikin gi dong ikin lurok wacel. 29Pe dong abiloke woko ki botgi doki, ka dong atyeko onyo Cwiny mera ikomgi gin jo Icrael.” Man an Rwot Lubanga Matwero ducu ma awaco.