Ejekiel 36:26

Dwoko gum pa jo Icrael botgi ikare me anyim

1Rwot dok owaco ni, “In wod pa dano, tit ki godi me Icrael kun iwaco botgi ni guwiny lok ma an 2Rwot Lubanga Matwero ducu atye ka loko botgi ni, ‘Lukwor pa jo Icrael giwaco ni, dong wuneno, cere macongu ducu dong gudoko mewa.’

3Tit lok kun itucu gin ma an Rwot Lubanga Matwero ducu atye kawacone. Pien rok macokcok ma gurumu lobo Icrael gulwenyo ci guyako godi me Icrael woko, kun gin ducu gubedo kanywaro jo Icrael ki lok agec. 4Pimeno, wun godi me Icrael, dong wuwiny lok ma an, Rwot Lubanga Matwero ducu atye kawacone bot godi ki cere, ki bot ora kulu ki nota, ki bot gangi mayam dong kiweko gudong obur, ki taun madito mayam dong kitenyo woko, ma rok ducu ma gurumu kangetgi guyako ci dong odoko ginacayagi.

5Ma omiyo an, Rwot Lubanga Matwero ducu dong aloko woko atyer kamaleng ikom rok ma gurumu Icrael ki kinigana malyet atika, makatone atye kalok ikom Edom. Pien gin jonu gubino ki yomcwiny madit kun gitye ki cac bene, ci gumako lobona gucamo odoko meggi wek giyak jami matye iye woko ducu. 6Pimeno, tit lok ma kemo lobo Icrael, ma kun iwaco bot godi ki ceregu ducu, ki bot nota ki longogu ni Rwot Lubanga Matwero ducu owaco kuman ni: nen, atye kalok ki nyeko ki akemo bene, pien dong wuciro cac pa lurok ma omiyowu lewic mada. 7Ma omiyo an, Rwot Lubanga Matwero ducu awaco kuman ni, akwonge akwonga ni lurok ducu ma gurumuwu dyere gin kikomgi kibicayogi mada kun lewic bene makogi marac. 8Ento wun godi me Icrael, yadi dok gibidongo iwiwu ci ginyako nyiggi pi jona jo Icrael; pien gin dong cok dwogo paco. 9Pien an atye pirwu, wun jona, dok abineno ada ni lobowu kipuru dok kipito kodi iye bene. 10Ci abimiyo wunya wudoko mapol, wun jo me ot pa Icrael ducu. Wubibedo i taunwu madito doki, ki i kabedo mayam kijwerogi gudong oburri wubigerogi odoco. 11Ci abimiyo dano kadi wa lee ginya gimede. Welwu bimede wubibedo pol makato kit mayam con wutye kwede ca, kun wunywalo lutino mapol. Ci abimiyo wubedo kunu kit macalo yam kong wubedo ikare mukwongo ca ci abimiyowu lonyo mabup makato lonyo ma onongo yam wutye kwede. Man bimiyo wungeyo ni an aye a Rwot. 12Ci abikelowu wun jona jo Icrael adwokowu cen, ka dok amiyo wubiwoto idye lobowu. Dong wubileyo lobo man bedo mewu, ci dong bedowu i loboni pe dok bimiyo kec neko lutinowu wa ki acel.

13An Rwot Lubanga Matwero ducu awaco ni: rok mukeneni gilwongowu kun ginywarowu ni, ‘Lobo Icrael obedo lobo macamo jone woko’, kun bene giwaco ni lobo Icrael obedo lobo maneko lutinogi woko. 14Ento cake tin cito kwede anyim pe dong gibibedo lucam dano, ma giyako lutino ki botwu ci gimwodo woko. Man an Rwot Lubanga Matwero ducu ma awaco. 15Dok bene abimiyo pe dong wubiwinyo cac pa lurok matwal, ci pe dong wubibedo ki lewic ikin lurok, dok loboni pe dong bineko lutinoni matwal. Man an Rwot Lubanga Matwero ducu ma awaco.”

Kwo manyen pa jo Icrael

16Rwot dok oloko kweda. 17En owaca ni, “Wod pa dano, ikare ma jo Icrael gubedo i lobogi gubalo woko ki kitgi ki gin ducu ma gubedo katimone. Aneno kitgi obedo calo gin ma keni calo two kwer ma dako twoyo ka karene oromo. 18Ma omiyo aonyo akemona gira ikomgi pi dano ma gubedo kanekone i lobo, ki dok bene pi cal jogi ma gutiyo ci gubalo kwede lobo wokoni. 19Yam akeyogi woko ikin lurok, ci guket guromo wi lobo ducu. Yam angolo kop ikomgi kun onongo alubu kitgi ki gin ducu ma onongo gutiyo. 20Ento ikare ma gucito ikin lurok, ki i kabedo ducu ma gubedo kacito iye, gupyedo nyinga malengi matek, pien dano gubedo kaloko lok ikomgi ni, ‘Magi dano pa Rwot, ento kiketogi woko ki i lobo mayam Rwot omiyogini.’ 21Ento an onongo abedo kaparo pi nyinga malengi mada, ma jona jo Icrael gumiyo gibedo kapyedone ikin lurok ma gin gucito gubedo ikin gi ni.

22Pimeno, wac bot jo Icrael lok ma an Rwot Lubanga Matwero ducu amito waco botgi ni, ‘Gin ma aecito ka timoneni pe pi wun jo Icrael, ento abitimo pi nyinga malengi, ma dong wun wupyedo woko ikin lurok kama wucito iyeni. 23Ci abinyutu kit ma nyinga leng kwede, ma dong kityeko pyedone woko ikin lurok, ma wun wupyedo ikin gi ni. Ka anyutu kit ma aleng kwedeni i komwu ma lurok bene gineno, ci bimiyo gingeyo ni an aye a Rwot. Man an Rwot Lubanga Matwero ducu ma awaco. 24Ci abikwanyowu ki i rok ducu, dok abicokowu woko liweng ki iwi lobo ducu, ci akelowu i lobowu kikome. 25Ci abikiro pii maleng i komwu miyo wulonye woko ikom gin ma keni ducu, ki i woro cal jogiwu ducu, ci dong alonyowu miyo wubedo leng. 261Abimiyowu cwiny manyen dok aketo cwiny manyen i iwu; ci abikwanyo cwiny matek calo gotti woko ki i komwu, ci amiyowu cwiny me bedo lawiny. 27Dok abiketo cwiny mera aye i iwu, kun amiyo wubedo ka lubu cika kun wugwoke katiyo gin ducu ma an aciko. 28Ci wubibedo i lobo mayam amiyo bot kwariwu. Ci dong wun wubibedo jona, ki an abibedo Lubangawu. 29Dok abilarowu ki i gin ducu ma keni mayam wutiyo; ci abimiyo bel cek botwu mabup atika, dong pe abimiyo kec bedo kanekowu. 30Abimiyo yadi nyako nyiggi mabup kidok bene amedo cam ma i potiwu cek mabup, wek pe dong wubed ki lewic ikin lurok pi kec. 31Man bimiyo wupo ikom kitwu maracu, ki ikom gin maracu ducu ma wutimo; mamiyo wubibedo ki keco i cwinywu i komwu kekenwu pi balwu me lewic ki pi gin ducu me kwer ma ceng wutimo. 32Ci myero wunge atir ni gin ma abitimoni pe atimo pirwu. Myero lewic omakwu dok alee bene myero otwodwu pi timwu maracu. Man an Rwot Lubanga Matwero ducu ma awaco.”

33Rwot Lubanga Matwero ducu owaco kuman ni, “Inino ma abilonyowu kwede ki ikom balwu ducu, abimiyo dano dong gibedo i taunwu madito, ki kabedo ducu mayam gudong oburgu kibigerogi odoco. 34Dong lobo mayam onongo iye odong nononi kibicako purune, miyo pe dong nen macalo lobo ma kibalo woko bot jo ma gikato ki kangete. 35Ci gibiwaco ni lobo man mayam odoko tim atani, dong oloke odoko calo poto Eden, dok taun madito mayam kijwerogi gudong nononi ma gudoko oburri kombedi dong dano gibedo i igi dok bene kigero cel gogo orumugi woko dyere. 36Dong man bimiyo lurok ma gudong ma gibedo kangetwu ma gurumuwu gingeyo ni an Rwot dong agero kabedo magi ducu mayam odoko oburri odoco, ka dok amiyo gipuru kama yam odoko tim atani woko. An Rwot dong atyeko loko ni abitimo man, ci dong bene abitimo.”

37Rwot Lubanga Matwero ducu owaco kuman ni, “Abitiyo gin makato maca mayam atiyoni. Ci abiweko jo Icrael gilega ni akonygi. Abimiyo ginya welgi mede calo lwak romi. 38Ci gangi magi ducu ma kombedi dong gudoko oburri dong bipong ki lwak dano mapol ata calo Jerucalem mayam opong ki lwak romi ma onongo giterogi me atyera me gitum inino madito ma kiciko. Man bimiyo gibingeyo ni an aye a Rwot.”