Ejekiel 35

Pwod ma Lubanga biketo ikom Edom

11

Rwot dok oloko kweda. 2En owaca ni, “Wod pa dano, cik wangi inen tung got Ceir, ci itit lok man ikome. 3Wac bot jo ma gibedo kunu ni, an Rwot Lubanga Matwero ducu awaco kuman ni:

Nen, atye ki lok ikomwu, wun jo ma ikom got me Ceir.

Abiryeyo cinga i komwu ci abimiyo lobowu doko obur kama dano mo pe bedo iye.

4Ci abiweko taunwu madito ducu doko obur,

ki wun dong wubibedo i lobo ma obale woko.

Man bimiyo wungeyo ni an aye a Rwot.

5Kadi wun bene onongo wubedo ki adagadaga me mone madit ikom ot pa jo Icrael ducu, ci man oweko wumiyo kibedo kanekogi woko ki pala lucwan ikare ca ma can opoto ikomgi, ki ikare ma aketo can ikomgi me agiki. 6Pimeno, an Lubanga matwero ducu dong akwonge ni, adada dong ayube me miyo pala lucwan aye ma binekowu, ci binekowu nakanaka tyekowu woko ducu; pien wutye ki bal alii me nek, pimeno pala lucwan bibedo kanekowu nakanaka. 7Ci abimiyo got Ceir dong obur, ki lobone iye bidong nono; ci dong abimiyo jo ma gibino ki jo ma gicito gikato ki kenyo gitum woko matwal. 8Abipongo wi godiwu ki kom dano ma kinekogi; ci jo ma kinekogi ki pala lucwan gibipoto iwi cerewu ducu ki i notawu ki longowu ducu. 9Abimiyo lobowu iye dong nono kare ducu, ki taunwu madito bene ducu dano dong pe bibedo iye. Man bimiyo wungeyo ni an aye a Rwot.

10Yam wubedo kawaco ni rok magi aryo, Icrael ki Juda, ki lobogi ducu bidoko mewu, dok bene wubicamo gibedo mewu, kadi bed an Rwot aye abedo Lubangagi. 11Pimeno, an Rwot Lubanga akwonge ni, abitic kwedwu kun lubu kit kinigawu ki nyekowu ma dong wutyeko nyutugi woko kamalengi, pien wubedo ki adagadaga ikom jona. Ci abimiyo wungeya ikinwu kekenwu, ka dong acako ngolo kop i komwu pi gin ma wutimo ikom jona. 12Man bimiyo wungeyo ni an Rwot onongo awinyo lok ma wubedo kawacone ki cac ikom godi me Icrael, kun wuwaco ni dong gudong igi nono, ki dok ni dong kimiyo botwu ni wucam obed mewu. 13Dok bene wumiine kenwu me bedo dit makato an woko, kun wunyate kwede ikoma ma wuloko lok mapol; ci dong meno ducu an atyeko winyo.”

14An Rwot Lubanga Matwero ducu owaco kuman ni, “Abimiyo lobowu iye dong nono, wek jo me wi lobo ducu gubed ki yomcwiny pi can ma opoto i komwu. 15Kit macalo wun wubedo ki yomcwiny pi ginaleya pa jo me ot pa Icrael ni, pien ni lobogi dong odong nono, an bene abitimowu kitmeno, wun jo ma wubedo i got Ceir, ki jo Edom ducu. Man bimiyo gingeyo ni an aye a Rwot.”