Ejekiel 34

Lok ikom lukwat me Icrael

1Rwot dok oloko kweda. 2En owaco ni, “Wod pa dano, tit lok ikom lukwat pa jo Icrael, ma gin romina. Tit botgi lok ma an Rwot Lubanga Matwero ducu atye kawacone botgi kuman ni: can iwiwu, wun lukwat me Icrael! Wugwoko komwu keken, ento pe wupito romina. 3Wumato cakgi, wuruku yer romogu, ci wuneko romi ma ocwegu me acamawu, ento pe wupito romina. 4Dok pe wubedo kagwoko jo magoro, pe wucango jo ma komgi lit, pe wutweyo tyen jo ma gulimo ret, jo mungak pe wudwogogi cen, pe wubedo kayenyo jo ma gurwenyo, ento wubedo kaloyogi ki tek dok ki gero. 51Kitmeno guket woko, pien lakwatgi mo onongo peke; ma omiyo romi gudoko cam pa nguu ducu. 6Romina guket woko gubedo kalak ata iwi godi ducu ki iwi cere mabocogu ducu. Ci romina guket woko iwi lobo ducu, ento ngat mo pe ma oyenyogi nyo ma oteme me nongogi.

7Kombedi wun lukwat, wuwiny gin ma an Rwot atye kawacone botwu. 8Adada, an Rwot Lubanga makwoni, atye kawaco kuman ni, romina dong gudoko lee me amaka, gudoko cam pa nguu, pien onongo pe gitye ki lakwat mo. Lukwat pe guyenyo romina, ento gubedo ka pito komgi keken, ma pe gubedo ka pito romina. 9Pimeno, wuwiny loka, wun lukwat. 10An Rwot Lubanga Matwero ducu atucu botwu atyer ni atye ki lok i komwu. Abikwanyo romina woko ki botwu, ci abimiyo pe dong wubedo lukwatgi matwal, dok bene pe wubimede ki pito komwu kekenwu. Abilaro romina woko ki i dogwu, pe dong wubibedo kacamogi.”

Lakwat maber

11Ci Rwot dok owaco ni, “An Rwot Lubanga matwero ducu, atito botwu ni an kikoma aye dong abiyenyo romina, dok abiketo cwinya me gwokogi. 12Kit macalo lakwat keto kwede cwinye me yenyo romine ma guket woko i kabedo matye kama bocogu, kitmeno bene an abiketo cwinya me gwoko romina, abilarogi, akwanyogi woko ki i kabedo ducu mayam guket iye inino ma can bipoto iye. 13Abikwanyogi ki ikin lurok, kun acokogi ki iwi lobo ducu, ci akelogi wa i lobogi kikome. Abimiyo gibedo kacam iwi godi me Icrael, inget wang it ma gunye agunya, ki i kabedo ducu ma i lobo kama dano bedo iye. 14Abimiyo gicamo lum mabeco i kakwat mabere, ki i kabedo matye iwi godi maboco me Icrael; ci gibibutu kunu i olet ma lobone ber me kakwat, ci dong gibicamo lum mabeco iwi godi me Icrael. 15An kikoma aye abibedo lakwat me romina, ci abimiyo gibutu piny, man an Rwot Lubanga Matwero ducu ma awaco. 16Abiyenyo romi ma gurwenyo, dok abikwanyo romi mayam gitye kalak ata adwokogi cen, abitweyo tyen romi ma ret tye iye, ki bene abimiyo romi magoro gijing gidoko tek, dok abiketo wanga me neno romi mucwe ki mategone; abipitogi ki kit yo ma atir.

17Kombedi dong, wun romina, an Rwot Lubanga Matwero ducu atitiwu ni abingolo kop ikomwu wun ducu, kun apoko kinwu woko, ci aketo jo mabeco pat, ki jo maracu bene aketogi pat kaken gi; ci apoko romi woko ki ikom dyegi. 18Lum ma wucamo i kakwat maberi mono pe romowu, ma weko dok wunyono lum mukene woko piny ki tyenwuni? Ka dok bene wumato pii malengi, ento wurubu pii mukene ki tyenwu wubalo woko! 19Wutamo ni romina mukene myero gucam lum ma dong wunyono woko piny ki tyenwu, dok wumito gumat pii ma wurubu ki tyenwu wubalo wokoni?

20Pimeno, an Rwot Lubanga Matwero ducu dong abingolo kop ikin romi mucwe ki romi mujony. 21Kit macalo wubedo kacoro romi magoro ki lakngetwu ki gwokwu, kun wutucu igi woko pil ki tungwu, wumiyo guket gucito woko wa kama boconi, 22an abilarogi, pe dong gibibedo me amaka pa nguu; ci abingolo kop ikin romi ki romi luwotgi. 232Abicimo latica ma a ki ot pa Daudi me bedo lakwatgi, lakwat acel keken; en bipitogi kun bene bedo lakwatgi. 243Dong an Rwot Lubanga abibedo Lubangagi, ki latica ma bia ki i ot pa Daudi bibedo rwot ikin gi. An Rwot dong atyeko loko man. 25Abiketo gicike me kuc kwedgi kun atyeko nguu ma yelogini woko ducu ki i lobogi, wek dong gubed idye tim labongo ayela mo, kun bene gibutu wa i bunga. 26Ci abimiyo gum ikomgi ki ikom kabedo ducu murumu got mera maleng. Dok abimiyo kot cwer botgi ikare ma nongo gimito kot kikome, ci bikelo gum botgi. 27Yadi ducu me tim binyako nyiggi, ki lobo bene bimiyo ginapita ma kipuru iye cek nya mabup, man bimiyo gibedo i lobogi labongo ayela mo. Ka dong alaro jona woko ki i cing jo mayam gulokogi gudoko opiigini, kun bene aturu rii okol mayam kitweyogi kwede woko, ci dong gibingeyo ni an aye a Rwot. 28Ci pe dok lurok biyakogi matwal, kadi ki nguu me tim bene dong pe bimwodogi; gibibedo maber labongo kit ayela mo, dok bene ngat mo pe ma bimiyo gibedo ki lworo. 29Dok abimiyogi ngom maber ma ceko cam mabup atika, man bimiyo kec dong pe binekogi matwal i lobogi, ci dong pe gibibedo ginacaya pa jo me rok ducu. 30Ci gin ducu gibingeyo ni an aye a Rwot Lubangagi, atye kagwokogi, dok bene gin jo me ot pa Icrael gin jona. Man an Rwot Lubanga Matwero ducu ma awaco. 31Dong wun romina, an aye ma akwayowu i oleta, an Lubangawu,” man Rwot Lubanga Matwero ducu ma owaco.