Ejekiel 33

Tic pa lakurpiny

1Rwot dok oloko kweda. 2En owaca ni, “Wod pa dano, tit bot lutuwu jo Icrael kun iwaco botgi gin ma time ka akelo lweny i lobo moni. Gin wegi lobo meno giyero dano ki ikin gi me bedo lakurpinygi. 3Kace en oneno lukwor ma gibino i lobo, ci kutu tum wek dano gunge komgi. 4Kace inen dano mo owinyo koko tum, ce pe oketo iye cwinye, ka lukwor gubino guneke, lok me tone bibedo i wiye kekene. 5Tone bene bedo bale gire, pien kadi en owinyo koko tum, ci pe oketo iye cwinye. Ka nene oketo iye cwinye, kono onongo olaro kwone. 6Ento kace lakurpiny oneno lukwor bino ce pe okutu tum, wek otit bot dano gunge komgi, ce lukwor gubino guneko ngat mo ki ikin gi; dong dano ma kitmeno bito i bale, ci man bimiyo abidwoko alii me tone iwi lakurpiny.

7Dong kombedi, in wod pa dano, aketo in me bedo lakurpiny pi rok me Icrael. Ibitito botgi lok ducu ma acikogi kwede ma an awaci. 8Kace awaco bot latim marac ni. ‘In latim marac, ibito ada,’ ento ka pe iloko bote kun icike me loke owek timo gin maracu, ci dano meno ma latim marac bito i balenu, ento alii me tone abidwoko iwii. 9Ento kace onongo ijuku en latim marac meno, kun icike ni owek yo me tim maracu, ci kace en pe oloke oweko yo me tim maracuneni, ci en bito i balenu, ento nongo in giri ilaro kwoni.”

Gin ma ngat acel acel myero otim

10Rwot owaca ni, “Dong in, wod pa dano, wac bot jo me ot pa Icrael ni: wun wuwaco kuman ni, ‘Tim aranyiwa ki balwa ducu gire tye iwiwa, dong kimiyo wato woko ata; dok watwero bedo kwo ningning?’ 11Wac botgi ni, an Rwot Lubanga makwo akwonge ni, cwinya pe bedo yom me neno ka latim marac to, ento amito ni en bene onguti owek timo bal, ci oloke odwog bota wek obed kwo. Wuloke, wudwog cen wuwek timo bal; pingo wumito ni wuto woko, wun jo me ot pa Icrael?

12Kombedi, in wod pa dano, wac bot lutuwu jo Icrael ni, ka dano ma kite atir otimo bal, ci gin mabeco ma en otiyo dong pe bitwero lare. Kace dano ma latim marac oweko time me tiyo gin marac, ci pe kibiketo can ikome, ento kace dano ma kite atir ocako timo bal, ci pe dok bimede ki bedo kwo. 13Ento kadi bed awaco bot dano ma kite atir ni en bibedo kwo ada, ento kace en ojenge ikom kite ma atiri ce dok ocako timo bal, ci pe abipo ikom gin mabeco ducu mayam en otiyo kadi ki acel. En bito pi balenu ma en otimoni. 14Doki kadi ka awaco ki dano ma latim marac ni, ‘In ibito ada,’ ento kace en oloke oweko timo bale, ce otiyo gin ma cik mito dok matye atir, 15labole tye kit man ni, kace latim marac meno okwanyo gin ma kijengo bote odwoko cen bot rwode, dok bene ka en odwoko gin mayam oyako ayaka cen, kun lubu cik ducu mamiyo kwo, ma pe dong timo kit bal mo; ci en bibedo kwo ada, pe bito gire. 16Dong abiweko bale ducu mayam en otimo pe dong abipo pirgi. En dong gire bibedo kwo ada pien otimo gin ma cik mito dok matye atir.

17Ento lutuwu giwaco ni, ‘Gin ma Rwot tye ka timone pe atir!’ Meno pe kakare, gin ma gin timo aye pe atir. 18Kace dano ma kite atir oloke oweko timo gin matye atir, ce ocako otimo bal, en bito pi balenu. 19Ento ka latim marac oloke oweko time maracu, ce ocako otiyo gin ma cik mito dok matye atir, ci en bibedo kwo pire. 20Ento wun wuwaco ni, ‘Gin ma Rwot tye katimone pe atir.’ Dong abingolo kop i komwu kun lubu gin ma wutimo wun jo Icrael.”

Lok ikom kit ma Jerucalem opoto kwede

211

Inino dwe abic, dwe me apar, i mwaka me apar wiye aryo, ma onongo dong kiterowa watye i opii, dano mo ma obwot ki i Jerucalem obino bota ci otita ni taun madit me Jerucalem dong opoto woko. 22I otyeno ma okatoni, ma onongo danonu pud peya obino bota, onongo dong alimo teko pa Rwot ci Rwot ogonyo te leba omiya teko me lok ci doga oyabe, pe dok abedo ma te leba okwe.

Bal pa lwak

23Rwot oloko kweda. 24En owaca ni, “Wod pa dano, jo magi ma gibedo i taun madito magi ma dong odong obur i lobo Icraeli giwaci, ‘Abraim yam obedo dano acel keken, ento kimiye lobo man, ci ocamo woko ducu obedo mere kene. Ento nen wan wapol adada loboni dong kimiyowa me bedo mewa.’

25Pimeno in myero itit botgi gin ma an Rwot Lubanga Matwero ducu atye kawacone kuman ni: wun wucamo ringo matye ki remo ikome, kun bene wuilo wangwu malo kaworo cal jogigu. Dok wuneko dano bene, ci wutamo ni loboni wubicamo bedo mewu ada? 26Ci wun dong wujenge mewu ikom pala lucwan ma i cingwu. Dok bene wutimo gin me kwer mapol kun nongo dano acel acel balo dako pa lawote; adada wun wutamo ni wubicamo loboni bedo mewu?

27Wac botgi ni Rwot Lubanga Matwero ducu owaco kuman ni: dong akwonge ni, adada jo ma gibedo i kabedo ma dong odoko wi oburri kibinekogi woko ki pala lucwan; ki jo ma kibinongogi gibedo i tim ata abimiyo nguu mwodogi woko. Dong jo ma gibedo i gangi me cel gogo, ki jo ma gibedo i boro gotgu two gemo aye binekogi woko. 28Abimiyo lobo man doko obur dok kabedo kama dano mo pe bedo iye. Man bimiyo tek ma onongo giwake pireni dong bigik woko. Godi me Icrael dong bidong nono ma ngat mo pe dok bikato ki ikin gi. 29Ka inen amiyo lobo man odoko obur, dok kama dano pe bedo iye, pi tim me kwergi ducu ma gutimo, ci bimiyo gingeyo ni an aye a Rwot.”

Adwogi me lok pa lanebi

30Rwot dok owaco ni, “In wod pa dano, lutuwu gitye kalok piri ka gurwate inget cel me gang nyo i dog odigi. Dano acel acel waco ki lawote ni, ‘Bin, waciwiny kit lok ango ma oa ki bot Rwot kombedi.’ 31Ci gibino boti kit macalo dano kare ducu gibinoni, gibedo piny inyimi macalo jona, kun giwinyo gin ducu ma in itito botgi, ento pe gibitiyo gin ma in itito botgini. Ginyutu ni gitye ki mar madwong ki lok goba ma giloko ki doggi keken, ento guketo cwinygi mere i nongo lim i yo ma pe atir. 32Ci in dong inen ki botgi calo dano mo ma wero wer me mar ma nongo winyo dwone mit, kun bene goyo agoya ki nanga. Ci giwinyo lok ducu ma iwacogu, ento pe gilubu mo kadi ki acel. 33Ikare ma loki bicobe, ci bene bicobe ada, man bimiyo gingeyo ni lanebi mo yam obedo ikin gi.”