Ejekiel 32

Kiporo rwot me Ejipt ki Nyang

1Inino dwe acel, me dwe me apar wiye aryo, i mwaka me apar wiye aryone me bedowa i opii, Rwot dok oloko kweda. 2En owaco ni, “Wod pa dano, dange ki koko pi Parao rwot me Ejipt, kun iwace ni: in itamo ni ibedo calo labwor ikin rok ducu, ento in dong ibedo meri calo nyang ma min kulu ma bedo i nam, kun baro dye pii ki i kulu. Irubu i pii woko ki coto tyeni, ma omiyo ibalo pii ma i kulugu woko ducu. 3Ka rok ducu gucoke kacel, ci abiciko obwona ci amaki kwede woko, ka dong amiyo kiywayi kwede iwi tura. 4Ci abiboli woko piny wa i ngom, ka dong abimiyo winyo ducu gipye ikomi ki lee ducu ma i lobo gibino ci gibicami woko. 5Abipongo wi godi ki notagu ducu ki komi ma otop. 6Abidyako lobo kadi wa wi godi bene ki remoni ma moli, ma ora kulu ducu bene bipong woko ki remoni keken. 71Ka dong atyeko neki woko, ci abiumu pol woko, kun amiyo lakalatwene ducu gicido macol licuc; ki dok abimiyo pol umu ceng woko, ki dwe bene dong pe biryeny mamiyo deyone caro piny. 8Abikwanyo dero me gin maryeny ducu ma tye i polo woko ci amiyo loboni dong i colpiny.” Man an Rwot Lubanga Matwero ducu ma awaco.

9“Abiryango cwiny jo me rok mapol, ka aterowu i opii ikin lurok iwi lobo ducu kama yam onongo pe wungeyo. 10Abimiyo lwak me rok mapol gibedo ki ur tutwal ikomi, ki lukergi bene komgi bimyel ki lworo piri. Ka atingo pala lucwana inyimgi ikare ma ibilimo iye can, lurok kacel ki lukergi komgi bibedo kamyel amyela cawa ducu, kun nongo dano acel acel paro pi kwone keken.”

11An Rwot Lubanga Matwero ducu awaco kuman ni, “Laloc me Babilon bibino ci lwenyo ikomi ki pala lucwane. 12Ci abiweko acikari ma gua ki i rok mager ducu giwoto pala lucwangi ci gineko ki lwaki woko. Gibijwero jami ducu ma itye ka wake pirgini, ci gibineko lwaki woko. 13Abineko dyangini woko ducu ki iwang pii ikabedo ducu mapatpat. Dong dano nyo lee mo bibedo pe matwal ma birubu pii kun balo woko ki coto doki. 14Abimiyo piine pye mot ci doko maleng, dok abimiyo pii ma i kuluni ducu mol mot calo moo ma mol. Man an Rwot Lubanga Matwero ducu ma awaco. 15Ikare ma abimiyo lobo Ejipt doko obur, ma iye dong nono, dok ka jami ducu mayam opongo loboni dong kijwero woko, ka bene aneko jo ducu ma gibedo iye, man bimiyo gingeyo ni an aye a Rwot. 16Man bene biloke doko wer lyel. Mon me rok ducu gibiwero wer man me lyeli, kun gikok kwede pi Ejipt ki lwake ducu; gibigoyo wer lyel man ki jami agoyagu. Man an Rwot Lubanga Matwero ducu ma awaco.”

Lobo pa jo ma oto

17Inino dwe apar wiye abic, dwe me acel, i mwaka me apar wiye aryo me bedowa i opii, Rwot dok oloko kweda. 18En owaca ni, “Wod pa dano kok pi lwak ma gibedo i Ejipt, ci icwalgi kacel ki jo me rok matego gudony piny i lobo pa jo ma oto, karibe ki jo mayam dong guto ma kiyikogi i lyel kununi. 19Wac botgi ni,

‘Wun mono dok wubeco wunen mwonya wukato jo mukene woko?

Wucit, wudonyu piny wubut i lyel pa jo ma pe gilirogi.’

20Ci jo me Ejipt gibito kacel ki jo ma kibinekogi i lweny. Dok bene lweny matyeni kiyubu pi neko jo Ejipt ducu. 21Rwodi ma gin cogi oteka kibiloko pirgi ki pi jo mayam konyogi, ma nongo dong gitye idye lyel, kun giwaco ni, ‘Dong gutyeko donyo woko piny kany, kun gibutu mot, gin jo ma pe kilirogi ma kinekogi ki i lwenyi.’

22Aciria dong tye kunu, ki lyel pa acikari me monye bene orume woko dyere. Gin acikari magi ducu kinekogi ki pala lucwan. 23Lyelgi tye piny wa idye bur kamatut adada, ki acikari dul monye bene gurumu lyele woko; gin ducu dong kinekogi woko ki pala lucwan, gin jo mayam nyayo lworo maracu i lobo pa jo makwoni.

24Elam bene tye kunu, kun lwake ducu gurumu lyele woko; gin ducu kinekogi woko ki pala lucwan. Ci gudonyo woko piny i lyel ma i lobo pa jo ma oto kun pe kilirogi. Gin aye jo ma ginyayo lworo maracu i lobo pa jo makwo, ento gibedo ki lewic kacel ki jo ma gidonyo piny i bur. 25Kipeto kitanda pi jo Elam ikin jo ma kinekogi kacel ki lwake ducu, dok lyel pa acikarine orume woko dyere. Gin ducu pe kilirogi, gin gubedo jo ma kinekogi woko ki pala lucwan. Yam lworo pi komgi onya oromo i lobo pa jo makwo ducu, ento koni dong gibedo ki lewic kacel ki jo ma gidonyo piny i bur; ci kiketogi ikin jo ma kinekogi.

26Mecek ki Tubal bene gitye kunu, kacel ki lwakgi ducu, ki lyel pa acikari monygi bene orumugi woko dyere. Gin ducu jo ma pe kilirogi kinekogi woko i lweny ki pala lucwan; pien gubedo kanyayo lworo maracu i lobo pa jo makwo. 27Dano pe dok bimiyo botgi woro ikare ma kiyikogi, kit macalo kimiyo woro kwede ikare ma kiyiko twoni oteka lweny macon, ma dong kiketogi i lyel ma guruke woko ki jami lwenygi, kiteno wigi ki pala lucwan gi dok kiumu komgi ki kwotgi. Gin twoni oteka magi onongo yam gitego mada ma gubedo kamiyo lworo maracu omako jo makwo.

28Meno aye kit macalo jo Ejipt bibutu kwede ma nongo dong kinyotogi woko ikin jo ma pe kilirogi, kacel ki jo ma kinekogi ki pala lucwan.

29Edom tye kunu kacel ki lukerne ki rwodine ducu. Gin onongo gubedo acikari matego mada, ento kombedi dong kiyikogi kacel ki jo ma pe kilirogi mayam kinekogi i lweny.

30Dong rwodi me lobo ma yo tung kumalo ducu gitye kunu, ki jo Cidon ducu bene tye kunu. Tekogi mayam gitye kwedeni onongo onyayo lworo mada, ento kombedi dong gudonyo i lyel, ki lewic kacel ki jo ma kinekogi i lweny, gubutu dong ma pe kilirogi. Dong gibedo ki lewic kacel ki jo ma gidonyo wa piny i bur.

31Ka Parao rwot me Ejipt onenogi ducu, cwinye bikwe pi tone kekene ki pi to pa acikari me monye ma kinekogi woko i lweny meno. Man an Rwot Lubanga Matwero ducu ma awaco.

32An aye ma amiyo rwot me Ejipt onyayo lworo ikom jo makwo, ento kombedi dong en kacel ki acikari me monye kibinekogi woko ci kibipyelogi i lyel ikin jo ma pe kilirogi, ma kinekogi i lweny, Parao kacel ki lwake ducu.” Man an Rwot Lubanga Matwero ducu ma owaco.