Ejekiel 29

Lok marac me nebi ikom Ejipt

11

Inino dwe apar wiye aryo, idwe me apar, i mwaka me apare, Rwot dok oloko kweda kun waco ni, 2“Wod pa dano, cik wangi inen Parao rwot me Ejipt, ci itit lok ikome ki ikom lobo Ejipt ducu. 3Lok kun iwaco ni Rwot Lubanga Matwero ducu owaco kuman ni: nen, atye ki lok ikomi, in Parao rwot me Ejipt, ma ibedo calo nyang ma min kulu ma butu i laora kulugu kun iwaco ni, ‘Kulu Nail mera, en mera kikome, an aye ma atiyo.’

4Abigolo cwaki woko ki goli, ci amiyo rec ducu matye i kuluni gibimoko woko i poki; ci abiywayi ki idye kuluni atingi woko wa malo, in kacel ki rec ducu me kuluni ma gumoko ikom pokini.

5Ci dong abiboli woko wa i tim, in kacel ki rec ducu ma gitye i kuluni, wubipoto wa idye tim kamaleng, pe dok abicokowu bene kun pe kibiyikowu. Dong atyeko miyowu woko me bedo cam pa lee tim ki pa winyo me polo. 62

Man bimiyo jo ducu ma gibedo i lobo Ejipt gibingeyo ni an aye a Rwot. Pien in ibedo calo odoo lagada ki bot jo me ot pa Icrael; 7ikare ma gumaki ki cinggi ci itur ityer, ci ingolo gwokgi iyeco woko ducu. Ka dok gujenge ikomi, ci itur, imiyo pyergi ducu omyel. 8Pimeno Rwot Lubanga Matwero ducu owaco kuman ni: nen, abikelo lweny ikomwu, ci aneko dano kacel ki lee woko ducu ki ikinwu. 9Ci lobo Ejipt bidoko obur ma dong obale woko. Man bimiyo gingeyo ni an aye a Rwot.”

“Pien dong iwaco ni Nail meri in aye ma iketo, 10pimeno, nen, an dong atye ki lok ikomi, dok bene atye ki lok ikom laora kuluni ducu, ma omiyo abimiyo lobo Ejipt doko obur bale woko, iye dong nongo, cake ki i Migdol dok kwede tung Ciene nio kwede wa i wang apoki lobo Etiopia. 11Pe tye dano mo nyo lee ma biwoto kun kato ki iye, ci bibedo kumeno ma pe kibedo iye pi mwaka pyere angwen kulu. 12Abimiyo lobo Ejipt doko obur ma iye odong nono makato lobo mukenegu ducu; ki gangi murumu ducu igi bidong nono pi mwaka pyere angwen ki ikin gangi ducu ma dong kityeko balogi wokoni. Abikeyo jo Ejipt woko ikin rok ducu, ci dok bene abimiyo giket gicito i lobo ducu.”

13Rwot Lubanga Matwero ducu owaco kuman ni, “I agiki me mwaka pyere angwen abicoko jo Ejipt woko ki ikin lurok kama yam akeyogi gucito iyeni, 14ci abidwoko jo Ejipt cen ikabedo gi dok abimiyo gum pa jo Ejipt botgi, kun akelogi aketogi gibedo i lobo Patroc, con en aye lobogi macon kama kinywalogi iye kikome. Dong ki kunu gibibedo ki ker magoro. 15Ci kergi bibedo ker magoro adada ki ikin ker ducu, man miyo pe dok gibiloyo lobo mukenegu ducu. Dok abimiyo gibedo jo ma pirgi pe tek tutwal, ci dong bene pe doki gibiloyo lobo mukenegu ducu. 16Jo Icrael dong pe kibijenge ikomgi pi kit kony mo wacel. Ci dong can ma bipoto ikom jo Ejipt bipoyo wi jo Icrael ni gin onongo gitimo bal me jenge ikom jo Ejipt wek ginong kony mogo ki kunu. Man bimiyo gingeyo ni an aye a Rwot Lubanga Matwero ducu.”

Rwot Nebukadnejar bilwenyo ikom Ejipt ci tayo woko

17Inino dwe acel, me dwe me acel, mwaka pyere aryo wiye abiro ma wabedo i opii, Rwot dok oloko kweda. 18En owaco ni, “Wod pa dano, Nebukadnejar rwot me Babilon omiyo dul monye otiyo tic matek me lweny ikom Turo, ma omiyo wi dano ducu ma obedo ilweny meno wigi otal woko ki gwokgi bene ducu opwac woko, ento kadi bed kumeno, rwot Nebukadnejar ki dul monye pe gunongo kit gin mo pi tic matek ma gubedo kayele ka tiyone ikom Turoni. 19Pimeno, Rwot Lubanga Matwero ducu owaco kuman ni: nen dong, abimiyo lobo Ejipt woko bot Nebukadnejar rwot me Babilon; ci en biyakogi kun mayo jamigi woko, ci bitingo lonyo me lobo Ejipt loko doko mucara me culu jo ma i dul monye. 20Dong atyeko miyo bote lobo Ejipt me culu wang tic ma en obedo kayele me tiyoneni, pien en ki jo me dul monye gubedo katic pira. Man an Rwot Lubanga Matwero ducu ma awaco.

21Inino meno ka gin ma kitmeno otime, ci abimiyo jo Icrael gidoko jo matek, kidok bene abimiyo in Ejekiel iloko lok kamaleng atyer kama dano ducu gitwero winyo loki. Man bimiyo gingeyo ni an aye a Rwot.”