Ejekiel 30

Rwot bipwodo jo Ejipt

1Rwot dok oloko kweda. 2En owaco ni, “Wod pa dano, tit lok kun iwaco gin man ma an a Rwot Lubanga Matwero ducu atye ka lokone kuman ni,

‘Wukok wunu ni:

nino makelo lworo tye kabino!

3Ninone dong onyiko cok, en nino ma Rwot bitic iyeni.

Man bibedo nino ma opong ki pol keken,

en aye bene kare ma can bipoto kwede ikom rok ducu.

4Lweny bibedo ikom i Ejipt,

ki aremcwiny madwong bene bibedo ikom Etiopia.

Jo ma gibedo i Ejipt kibinekogi woko;

kibiyako lonyone ducu kitero woko,

ci kibiweke dong obur.’

5I lweny meno kibineko acikari ma kiwilogi ki lim ma gua ki i Etiopia, Put ki Lud, Arabia, ki Libya, ki wegi lobona ki komgi.” 6Rwot dok owaco kuman ni, “Cake i Migdol o kwede tung Ciene, jo ducu ma gibikonyo jo Ejipt kibinekogi woko i lweny. Dul mony pa jo Ejipt ma giwake ni giteki kibijwerogi woko ducu. Kibinekogi woko ki pala lucwan idye taun madit. Man an Rwot Lubanga Matwero ducu ma awaco.

7Lobo Ejipt bidoko gin ma iye odong nono, gangine igi bidong nono ki ikin taun madito ducu ma dong kityeko balogi woko. 8Ka dong acwinyo Ejipt woko ki mac, dok bene abineko jo ma konyogi woko, man bimiyo gingeyo ni an aye a Rwot.

9Ka nino meno oo, ma Ejipt dong kijwero woko, abicwalo lukwena ma gikwango mel wek gumi lworo omak jo Etiopia ma cwinygi pe potoni; ci gibibedo ki remcwiny madwong inino ma can bipoto ikom jo Ejipt; pien ninone tye kabino!”

10An Rwot Lubanga Matwero ducu owaco kuman ni, “Abitic ki Nebukadnejar rwot me Babilon me giko te lonyo me Ejipt woko. 11En kacel ki jone, ma gin jo me rok mager adada, gibikelogi me balo lobo woko; ci gibilweny ikom jo Ejipt ki pala lucwan, man miyo lobo dong bipong ki kom dano ma oto keken. 12Abimiyo pii kulu Nail two woko, dok bene abicato lobo woko bot jo maracu; ci abibalo lobo kacel ki jami ducu matye iye amiyo iye dong nono. Lurok gibijwero lobo woko ducu. An Rwot dong atyeko loko.”

13An Rwot Lubanga Matwero ducu awaco kuman ni, “Abijwero cal jogi apaya ki cal lubanga mogogu me goba ki i Mempic; laker mo dong pe bibedo i lobo Ejipt. Kitmeno abimiyo lworo bedo tye i lobo Ejipt. 14Abimiyo lobo Patroc dong nono, dok bene abicwinyo mac woko ikom Joan, ci abingolo kop ikom jo Tebec kun alubu te cik kikome me ngolo kop. 15Dok bene abionyo akemona ikom jo Pelucium, ma en aye cel gogo matek pa jo Ejipt, ka dok aneko lwak me Tebec woko ducu. 16Ci abicwinyo mac woko ikom Ejipt; ki jo Pelucium gibibedo ki toncwiny madit adada. Kibimuku cel me gang Tebec kireto woko piny, ki gang bene bipong woko ki pii aluka. 17Awobe On ki awobe Pibecet kibinekogi woko i lweny, ki mon kibimakogi kiterogi woko i opii. 18Piny bicido woko i Tapanec ikare ma abituru ker me Ejipt woko, ki teke ma onongo jone giwake kwedeni bene dong bigik. Pol biumu Tapanec woko, ci jone kibiterogi woko i opii. 19Meno aye kit ma abingolo kwede kop ikom jo Ejipt kun alubu te cik me ngolo kop. Man bimiyo gingeyo ni an aye a Rwot.”

Kituru teko pa rwot me Ejipt

20Inino dwe abiro dwe me acel, i mwaka me apar wiye acel me bedowa i opii, Rwot dok oloko kweda kun waco ni, 21“Wod pa dano, dong atyeko turu bad Parao rwot me Ejipt woko. Dong inen pe tye ngat mo ma otweye ki bandej wek ocang woko, wek dok odok tek me mako pala lucwan. 22Pimeno Rwot Lubanga Matwero ducu owaco kuman ni: nen, atye ki lok ikom Parao rwot me Ejipt. Abituru bade ryoryo ducu, bade matekeni ki bade mayam oturi; ci amiyo pala lucwan poto woko piny ki i cinge. 23Abikeyo jo Ejipt woko ikin jo me rok ducu, abimiyo giket giromo wi lobo woko ducu. 24Dong abijingo bad rwot me Babilon ryoryo ducu bedo matek, ci amiyo pala lucwane i cinge en mako; ento abituru bad Parao ryoryo ducu woko, miyo en dong bibedo kacur inyim rwot me Babilon calo dano ma dong gityeko keto ret woko ikome. 25Abijingo bad rwot me Babilon me bedo matek, ento bad Parao bipoto woko; ci bimiyo gingeyo ni an aye a Rwot. Ka dong aketo pala lucwana i cing rwot me Babilon, ci en biryeyo woko ikom lobo Ejipt; 26ci abikeyo jo Ejipt woko ducu ikin lurok, kun aketogi iwi lobo ducu. Man bimiyo gingeyo ni an aye a Rwot.”