Ejekiel 28

Lok me nebi ma Ejekiel otito ikom rwot me Turo

1Rwot dok oloko kweda. 2En owaco ni, “Wod pa dano, wac bot rwot me Turo ni Rwot Lubanga Matwero ducu owaco kuman ni: itye ki wake i cwinyi ma omiyo iwaco ni in lubanga. Dok iwaco ni kit macalo in ibedo lubangani, ibedo iwi komker ma nam orumu woko dyere. Ento in i dano, in pe lubanga, kadi bed itamo ni in iryek calo lubanga. 3In itamo ni in iryek ikato Daniel, dok ni pe tye mung mo ma okane ki boti ma pe ingeyo. 4Ryeko madit ki niang me cat ma itye kwede, omiyo ilimo lonyo piri keni kun icoko jabu ki ryal i ot me kano lim ma meri. 5Ryeko madit me cat ma itye kwede omiyo imedo lonyoni, kun ibedo kanongo magoba teretere. Ma omiyo dong icako bedo ki wake madit i cwinyi pi lonyoni ni.”

6Pimeno an Rwot Lubanga Matwero ducu awaco ni, “Dong kit macalo itamo ni in iryek calo lubanga moni, 7pimeno, nen, abikelo lumerok ma gin lurok ka lweny ikomi. Gin jo me rok mager makato jo me rok mukene ducu. Gibiwoto pala lucwangi ci gibilweny ikomi ci gibalo beri ma inongo ki ryekoni ki gin manen mwonya ki boti woko, ci gibalo deyoni me aurani woko. 8Gin bineki woko ci gicori i poto piny i bur lyel icwiny dye nam 9Kace jo ma gibino ka neki gubino ikomi, ci in mono pud ibimede ki wacone ki inyimgi ni in lubanga? Ento pe kumeno, ki i cinggi gin jo ma ginekini in dong pe lubanga wacel kono i dano ma mwa. 10Ibito meri macalo dano ma pe kilirogi i cing lurok ma pe gingeyo Lubanga. An Rwot Lubanga Matwero ducu dong atyeko loko lok man.”

Can ma bipoto ikom rwot me Turo

11Rwot doki oloko kweda. 12En owaco ni, “Wod pa dano, kok pi rwot me Turo, kun iwace ni Rwot Lubanga Matwero ducu owaco kuman ni: in onongo yam ibedo lanen me gin maber makato ducu. Kidok onongo bene iryek dok iber ma inen mwonya mada. 13Ci dong onongo ibedo wa i Eden, ma en aye poto pa Lubanga, ci ibedo karuke ki kit kidi me wel mapatpat ducu, ma gin aye: kamelian, topaj, ki jacipa, kurocolit, ki onik, capir, kabankel, ki emeradi; ma gin ducu aye kidero komgi maber mayam onongo kitiyo ki jabu, ki gin ducu mayam itye kwede kigoro komgi woko. Kiyubugi piri inino ma kiketi iyeni kikome. 14Ka dok aketo lakerubi ma kiwiro ki moo me gwoko in. Onongo ibedo iwi got maleng pa Lubanga dok bene iwoto ki idye gang ma lyel mac. 15Cake ikare ma kicweyi iye, kiti onongo ber; onongo pe itye ki bal mo nio wa ikare madong icako timo bal. 16Ci ibedo kawilo jami teretere kun icato bene kumeno, omiyo icako timo tim bwami ci itimo bal. Ci omiyo aryemi woko ki iwi got mera maleng calo gin ma dong kipyedo, dok lakerubi ma onongo gwoki ca bene guryemi woko ki idye gweng ma lyel mac. 17Yam ibedo kawake ki i cwinyi pi beri; ki deyoni me aurani omiyo ibalo ryekoni woko. Ci areti woko i ngom, ci amiyo inen woko kamaleng inyim luker ducu, wek guneni, ci wanggi oniang woko tiktik ikomi. 18Pi bali mapol ata ma itimo i cato wil i yo ma pe atiri omiyo ipyedo kabedoni malenggu woko ducu. Ci acwinyo taun maditwu woko ki mac, ci owang woko liruk. Ci aloko taun madit meno odoko buru inyim lobo ki inyim jo ducu ma guneni. 19Ci jo ducu ma gingeyi ki ikin lwak me rok ducu gitye ki ur madit mada ikomi; in dong io i agiki ma ibito wokoni ci man bikelo lworo, dok bene ibirwenyo woko matwal.”

Lok me nebi ma kitito ikom Cidon

201

Rwot dok oloko kweda. En owaco ni, 21“Wod pa dano, cik wangi kong inen tung Cidon, ci itit lok man ikome, 22kun iwaco bot jo ma gibedo iye ni Rwot Lubanga Matwero ducu owaco kuman ni: nen, adoko merokwu, wun jo Cidon; dok abinyutu deyona woko kamaleng i dyewu. Man bimiyo jo ducu gibipaka pi gin ducu ma atiyo botwu, ci gibingeyo ni an aye a Rwot, ka anyutu kit macalo aleng kwede kun nongo aketo can ikom jo ma gibedo i taun madit man. 23Pien abicwalo two gemo i taun madit man, ki remo bimol idye gudune ducu. Kibilwenyo i komwu ki i kabedo ducu, jowu bene kibinekogi woko ki pala lucwan. Man bimiyo wungeyo ni an aye a Rwot.”

Lubanga bimiyo gum bot jo Icrael

24Rwot owaca ni, “Okutu lacar pe dong bicobo jo me ot pa Icrael matwal, nyo kadi kit okutu mo mukene pe bicobogi ma minigi ret, ikin luwotgi ma gurumugi ducuni ma ceng gutimogi maraci kun dok bene gucayogini. Man bimiyo gibingeyo ni an aye a Rwot Lubanga Matwero ducu.”

25Rwot Lubanga Matwero ducu owaco kuman ni, “Ka dong acoko jo Icrael ki ikin lurok kama yam akeyogi gucito iye, ka dok bene anyutu bot rok ducu kit macalo an aleng kwede, ci abimiyo Icrael gibibedo i lobogi kikome, en lobo mayam amiyo bot latica Yakoboni. 26Ci gibibedo i lobo meno labongo lworo mo, dok gibigero odi kun gipuru poto olok bene. Ci gibibedo labongo lworo mo, ikare ma abingolo kop ikom luwotgi ducu ma gutimogi marac kun bene gucayogini. Man bimiyo gingeyo ni an aye a Rwot Lubangagi.”