Ejekiel 27

Wer lyel me koko Turo

1Rwot dok oloko kweda. 2En owaco ni, “Wod pa dano, kombedi cak wer lyel 3kun ikok kwede pi Turo, ma en taun madit ma ocung i dog nam, dok bene en lacatwil ki jo ducu ma gibedo iwangwat mapatpat ma orumu dog nam. Cit itit ki Turo ni Rwot Lubanga Matwero ducu owaco kuman ni:

In Turo, onongo iwaco ni,

‘An aber anen mwonya mada.’

4Wang apoki loboni ducu tye wa i cwiny dye nam madit;

jo ma gugeri gugeri woko maber ma inen mwonya adada calo mel.

5Gupayo bao me apeta mapol ki ikom yat odwong ma gukelo ki i got Cenir.

Gutongo bene yat cedar ki i Lebanon

ci guyubu ki yat me yaro bongo mel wek yamo okuti.

6Gutongo kworo me Bacan

ci guyubu pol me cero yeyani;

gipeto dye kabedoni ki bao me yadi mabeco

ma kikelo ki i lobo Caiprac,

kun kideyo woko bene ki lak lyec.

7Bongo me ayara malo iwi yat me mel

obedo bongo camanini ma kideyo

mabere ma gukelo ki i Ejipt,

kitwero neno ki cen ci kingeyo oyotoyot.

Kemani kiyubu ki bongo mabere,

bongo ma obedo bulu ki lamarlamar,

ma kikelo ki i cula nam me Elica.

8Jo ma gibedo i Cidon ki i Arvad

gin aye gubedo lucer yeyani,

Joni ma gikwiri aye gubedo ludwo mel.

9Ludongo me Gebal ki jone ma gikwiri onongo bene gibedo ikin joni,

ma giyubu mel me wot i nam;

mel ducu me nam ki jo ma dwoyogi gubedo ikin joni,

gubedo ka cat i dukani.

10Acikari ma gua ki i Percia, Lud ki Put onongo gitye i dul monyi macalo lulwenyi; gungabo kwot ki otangwic i gang monyi. Gin bene aye ma gumiyi deyo. 11Jo Arvad ki monygi guito malo kagwoko celi, ki jo Gamad guito malo kagwoko wi lubeleni ducu. Gungabo kwotgi ikom cel gurumu kwede woko. Gin aye ma gumiyo inen maber mamwonya tutwali.

12Ibedo kacato wil i lobo Tarcic kun igamo ryal, nyonyo koc ki racac ma kimiyi pi wilo jamini mabeco madwong ata. 13Jo Javan, Tubal, ki Mecek gubedo kacato wil ki joni kun gimiyo opiigi ki jami molagu ma kiloko ki jami ma joni gicato. 14Joni gucato jamigi woko kun guloko ki aguragura me tingo yec, ki aguragura ma gingweco kwedgi i lweny, ki kanagu ma gikelogi ki i Bet-togarma. 15Jo Rodec bene gubedo kacato wil ki joni; lobo mapol me dog nam gudoko cuk gi, kama joni giwilo iye lak lyec mapol ki poi kun kiloko ki jamigi. 16Jo Edom bene gubedo kacato wil ki joni pi jamini madwong gu; gubedo kalokogi ki emeradi ma en kidi me wel madwong, bongo ma lamarlamar, ki bongi ma kidero komgi maber, ki bongo camanini mabere, ki tiko makwar me wel. 17Jo Juda ki jo ma i lobo Icrael gubedo kacato wil ki joni; ci guloko jamigi ki ngano, nyig jeituni, ki nyig oduru me wi mwaka, moo kic, moo mukenegu ki yat ma ngwece kur. 18Jo Damaciko gubedo kacato wil ki joni pi jamigi madwong gu, pi lwak lonyoni mapatpati oweko gumini kongo bwino ma kikelo ki i Kelbon, ki yer romi matare, 19ki kongo bwino ma kikelo ki i Ujal, gukelo ki jamini mabecogu; nyonyo ma giteto, kacia ki lum ma ngwece kur guloko woko ki jami acatani. 20Jo Dedan gubedo kacato wil ki joni kun gimiyo bot joni bongi ma kitweyo inge kana me bedo pa dano. 21Jo Arab ki rwodi ducu me Kedar yam gubedo jo ma yomo cwiny mada pi cato botgi lutino romi ki nyogi romi ki dyegigu, ikare ma gubedo kacato wil kwedi. 22Lucatwil me Ceba ki Raama bene gubedo kacato wil kwedi; ci gumiyo boti kit angwece ducu mapatpat mabeco makato ducu, ki kidi me welgu ki jabu, kun giloko ki jamini. 23Jo Karan, Kane, Eden, Acur, ki Kilmad bene gubedo kacato wil kwedi. 24Jo magi gubedo kacato wil kwedi pi bongi mabeco adada, ki pi bongi ma bulu ki ma kikwoyo ki cing ma kidero komgi woko maber, ki kapet ma kideyo ki rangi mapatpat, ma kitweyo woko matek liking ki tol; ci gubedo kacato wil boti pi jami meno. 251Mel me Tarcic obedo kawot kun tingo jami acatani.

Iloke dong idoko calo mel matye idye nam

ma kicano jami mapek opongo woko ligwik.

26Ludwo meli guteri woko wa kamabor idye nam.

Dong yamo ma a yo tung kunyango

okodo omiyo meli otur woko wa icwiny dye nam.

27Lonyoni ducu, jami acatani ducu,

lutic i mel ki ludwo mel,

lumwon wang bao kama bao okube iye ki wadi,

ki lucatwili ma pirgi tego,

acikarini ducu ma gin lulweny ma gitye i mel,

gin ducu ki dul monyi ma gitye idye joni,

gumwony woko libuc icwiny dye nam

ikare ma meli otur wokoni.

28Ikare ma koko pa ludwo mel owinye,

lobo ma cokcok kenyo ducu guyenge.

29Pol wegi yeya gukati woko ki i mel

kun gumako tal me cero yeya i cinggi.

Ci lutic i mel ki ludwo mel ducu ma woto i nam

gucung iwi tura i dog nam.

30Gin gudange ki koko matek piri,

kun gikok ma cwinygi kec adada.

Guonyo putu iwigi

kun gingene bene i buru pi cwercwiny.

31Ci gulyelo wigi dong maleng piri,

dok guruku bongo cola me kumu,

kun gikok kwede piri ma cwinygi ton,

kun bene gikumu ma cwinygi kec.

32Ka gikok ci giwero wer lyel piri ma gikok piri kun giwaco ni,

‘Anga ma kitwero poro ki Turo,

ma kijwero oling woko idye nami?

33Ka yam ikelo jami acatani ki bot jo matye loka nam,

nongo icobo miti pa jo me rok ducu.

Luker ducu me lobo gudoko lulonyo

ki lonyoni ki lwak jami acatani madwong gu,

34Kombedi dong mel otur woko idye nam,

idye pii kamatut atika;

jami acatani matye iye ki jo ducu ma gitiyo i mel

gumwony woko bene i nam libuc kacel kwedi,

35Dano ducu ma gibedo i lobo ma orumu dog nam

gubedo ki ur madit mada

pi can man ma opoto ikomini;

lukergi dong gudoko lwor tutwal,

wanggi olwal woko pi lworo.

36Lucatwil ma gitye ikin lwak gujwat piri mada;

dong io i agikini ma man bikelo lworo adada,

dong bene ibirwenyo woko matwal ma pe dok ibinen.’”