Ejekiel 26

Lok me nebi ikom Turo

11

Ikom nino dwe mukwongo i mwaka me apar wiye acel ma dong watye i opii, Rwot dok oloko kweda. 2En owaco ni, “Wod pa dano, kit macalo jo Turo guloko lok ikom jo me Jerucalem ki yomcwiny ni, ‘Dogcelgi dong kituru woko, ma dong owire oyabe woko botwani, dong abidoko lalonyo, pien dong kityeko balone woko’, 3pimeno Rwot Lubanga Matwero ducu owaco kuman ni: nen dong, atye ki lok ikomwu, wun jo Turo, abikelo jo me rok mapol ka lweny i komwu, kit macalo pii biamwonyi me nam twage kwedeni. 4Ci kibimuku cel ma orumu Turo kireto woko piny, ki lubelene bene kibituru kireto woko piny. Ka dong abiyweyo ngome woko ducu ci aweko got keken aye dong. 5En bibedo wa idye nam macalo kabedo kama lumakrec gimoyo iye obwogi. Pien an Rwot Lubanga Matwero ducu dong atyeko loko. Lurok dong gibiyako Turo woko, 6dok bene kibineko jone ma gibedo i lobone kikome woko liweng ki pala lucwan. Man bimiyo gingeyo ni an aye a Rwot.”

7Rwot Lubanga Matwero ducu owaco kuman ni, “Abikelo rwot matek makato luker ducu, en aye Nebukadnejar rwot me Babilon, ka lweny ikom Turo. En bibino ki lwak aguragura, gadigadi lweny, wegi aguragura, ki dul mony matye iye acikari mapol. 8Jo ma bedo i taun gi matye iwi tura kibinekogi woko i lweny. Ci lumerok dong gibigero cel girumuwu kwede woko, dok bene gibitoro cel lobo inyimwu, ka dong gibibino ma gutingo kwotgi ci giumu komgi kwede woko. 9En bitworo celwu ki twor latwom cel, ci bityengo lubele ki latonge reto woko piny. 10Aguragurane bibedo pol atikatika ma apwa tyen gi biboyowu woko. Dong woo pa wegi aguragura ki mor pa gadigadi ma otingo yec, ki lwak gadigadi lweny biyengo celwu ikare ma nongo gidonyo i dogcelwu macalo ngat mo ma donyo i gang madong mony oturu cele woko. 11Wegi aguragura biringo ki aguragura ki i yoowu ducu, gibineko danowu woko ki pala lucwan. Gibireto wirwu matekgu poto woko piny wa i ngom. 12Gibiyako lonyowu ka gicoko jami acatawu. Ci gibimuku celwu gireto woko piny, dok bene gibibalo odiwu mabeco ma yomo cwinywuni woko. Ci gibikwanyo gwengwu, baowu ki ngom kama wuyubu iye gedowu, ci gibolo woko i pii wa idye namgu. 132 Ci abijuku wer ducu ma kigoyogi agoya, ki dwon opuk mamit ma kigoyo bene dong pe biwinye matwal! 14Abimiyo in Turo dong ibidoko kabedo me moyo obwo pa lumakrec madong abiyweyo ngome woko ducu ci aweko gote keken aye dong. Taun madit man dong pe kibigerone odoco matwal. An Rwot dong atyeko loko.” Man Rwot Lubanga Matwero ducu ma owaco.

15Rwot Lubanga Matwero ducu owaco lok ikom taun madit me Turo kuman ni, “Ikare ma nongo kitye kamonyo in, jo ducu ma gibedo i dog nam gibibedo ki lworo madwong pi cur pa joni ma gunongo ret ka dong kinekogi. 163Ci rwodi ducu me dog nam gibilor woko piny ki iwi komkergi, ci gibilunyu jorgi ki bongigi ma kideyo maber, ka dong gibibedo wa piny i ngom ki myelkom. Gibibange woko ki lworo pi can ma opoto ikomgi, ci bimiyo komgi bedo kamyel amyela i cawa ducu. 17Gibicako wer lyel ikomi kun kiwero ni,

‘In dong irwenyo woko matwal ki i nam ningning!

In taun madit mayam iywek tutwali,

ma onongo itek tutwal kun ibedo ki loc ikom jo matye i nami,

in kacel ki jo ma gubedo i ii,

ma con gukelo lworo madwong

ikom jo ducu ma gibedo i dog nami!

18Inino ma i poto kwede iyeni kikome,

cula nam ducu guyenge;

ada, gin cula ma gitye idye nami,

ci jo ma gibedo i igi cwinygi obale woko.’”

19Rwot Lubanga Matwero ducu owaco kuman ni, “Abimiyo in Turo ibale woko calo taun madito ma dano pe bedo i igi. ‘Ka dok bene abikelo pii aumi woko kwede ma bimiyo imwony woko ki kamatut i nam. 20Ci abiboli woko piny i bur lyel kacel ki jo ma cito i lobo pa jo ma oto, me bedo kunu kacel ki jo mayam gubedo i lobo ikare ma con tutwal. Ci abimiyo ibibedo i lobo ma ite ngom ikin obur ma orii tutwal, kun nongo itye kabedo kacel ki jo ma oto. Dano pe dok bibedo i ii dok bene pe ibinongo kabedo mo i lobo pa jo makwo. 214Abimiyo itum woko i yo makelo lworo, ci ibirwenyo woko matwal; kadi bed kiyenyi, ci pe kibinongi.’” Man an Rwot Lubanga Matwero ducu ma awaco.