Ejekiel 25

Lok me nebi ikom jo Ammon

11

Rwot oloko kweda. 2En owaco ni, “Wod pa dano, nen piny yo tung bot jo Ammon 3ci itit lok man ikomgi kun iwaco botgini: wuwiny lok pa Rwot Lubanga: Rwot Lubanga Matwero ducu owaco kuman ni, pien wun dong wubedo ki yomcwiny ikom kabedona maleng ikare ma dong kipyedo woko, ki ikom lobo Icrael ikare ma dong kijwero woko odong obur, ki ikom jo Juda ikare ma kiterogi woko i opii. 4Pimeno an dong abimiyowu woko bot jo ma gitye yo tung kunyango gibiloyowu. Ci gibigero gonygi ikinwu, dok gibiyubu kabedogi idyewu. Dok gibicamo camwu ci gibimato cakwu bene. 5Abimiyo Raba bedo kacam pa kinaga, ki taun madito pa jo Ammon abiloko doko dwol kama romi ki dyegi gibibedo iye. Man bimiyo wungeyo ni an aye a Rwot. 6Rwot Lubanga Matwero ducu dong owaco kuman ni: pien dong wudongo cingwu dok wubedo kanyono tyenwu matek i ngom kun cwinywu obedo yom ki tim maracu ducu matye i iwu ikom lobo Icrael, 7pimeno, nen, abiryeyo cinga woko ikomwu, ci abimiyowu woko bot lurok me bedo ginayaka botgi. Abityekowu woko liweng ki ikin jo ducu ma bedo iwi lobo, abimiyo wuto woko ki iwi lobo ducu; abinekowu woko. Man bimiyo wungeyo ni an aye a Rwot.”

Lok me nebi ikom jo Moab

82

Rwot Lubanga Matwero ducu owaco kuman ni, “Jo Moab onongo yam guwaco ni, nen, jo Juda dong gicalo jo me rok mukenegu ducu. 9Pimeno abimiyo lweny poto i taun maditogi ma orumu Moab ma gikuru wang lobo pa jo Moabni, kadi wa ki deyo me lobo Moab ma en aye Bet-jecimot, Baal-meon, ki Kiriataim. 10Abimiyo lobogi woko, kacel ki jo Ammon, bot jo matye yo tung kunyango me bedo meggi, wek pe dong kipo ikome matwal ki ikin lurok. 11Dok bene abimiyo pwod ikom jo Moab. Man bimiyo gingeyo ni an aye a Rwot.”

Lok me nebi ikom jo Edom

123

Rwot Lubanga Matwero ducu owaco kuman ni, “Kit macalo jo Edom gutimo tim me culu kwor ikom jo Juda ma omiyo gutingo bal alii madit tutwal me culu kwor ikomgi, 13pimeno omiyo an Rwot Lubanga Matwero ducu atye kawaco kuman ni: abiryeyo cinga alwenyo ikom jo Edom, abineko dano ducu kacel ki lee ma gibedo i lobo Edom. Abimiyo lobogi dong doko obur, nia i Teman nio kwede wa i Dedan jone ducu kibinekogi ki pala lucwan. 14Abimiyo jona jo Icrael culu kwor ikom jo Edom ma kakara, ci gibitiyo i Edom kitmeno kun jo Edom giwinyo arem me kinigana ki akemona mageri. Ci jo Edom dong bingeyo kwor ma aculu ikomgi.” Man Rwot Lubanga Matwero ducu ma owaco.

Lok me nebi ikom jo Piliciti

154

Rwot Lubanga Matwero ducu owaco kuman ni, “Kit macalo jo Piliciti gutimo tim me culu kwor dok bene guculu kwor ki rac cwiny me neko nek ma okelo mone ma pe gik; 16pimeno an Rwot Lubanga Matwero ducu atye kawaco kuman ni: nen, abiryeyo cinga alwenyo ikom jo Piliciti, abijwero jo Ceret ki lobo mukene matye i dog namgu woko. 17Abiculu kwor madit ikomgi kun apwodogi ki akemo madwong tutwal. Man bimiyo gingeyo ni an aye a Rwot, ka dong aculu kwora ikomgi.”