Ejekiel 24

Carolok ikom agulu me tedo ma nyal omako

1Rwot oloko kweda inino dwe apar, dwe me apar, i mwaka me abongwen. 21En owaca ni, “Wod pa dano, coo nino dwe matini piny, pien en aye nino ma laloc me Babilon obino iye ka ocako lweny ma orumu Jerucalem. 3Tuc lok man woko atyer kamaleng idye lwak man ma lujemo, i lok abola ma i carolok botgi kun iwaco ni Rwot Lubanga Matwero ducu owaco kuman ni:

Cib agulu i mac, ci ony pii iye bene;

4ci iket iye ringo ma kingolo woko matino,

ci ket ringo ducu mabecone, ringo em ki ringo akwaya gwok,

ci ket iye cogo mabeco ma iyero ayera wek opong woko.

5Kwany ringo romo mabere ki ikin romi luwotgi,

ci irwak yen ma kingunugi i dul ki dul ite agulu;

ci ited ringo ma iketo iyeni, dok bene ited cogone iye.”

6Pien Rwot Lubanga Matwero ducu dong owaco kuman ni, “Can iwi taun madit ma opong ki luneko, in ibedo calo agulu ma nyal omako, ma nyale bene pe twero kwanye ki iye! Kikwanyo ringo ma kingidoni woko ki iye ki acel acel, kun pe kiyero ayera. 7Pien remo dano ma kinekogi idye taun madit pud tye iye; remone oo wa ikom got bene, pe kineko dano i ngom kama remogi onongo kitwero umune woko ki putu. 8En gin ma omiyo aweko remo dano ma en onekogi ikom got, wek pe kium woko. Pi tugu akemona ikomgi wek acul kwor.”

9Pimeno Rwot Lubanga Matwero ducu owaco kuman ni, “Can iwi taun madit ma opong ki luneko! An kikoma aye abiduru yen me tedone. 10Dong ibican yen, ci imok mace madit, ci ited ringo woko maber, ka dok idwon pige woko, wek cogo owang. 11Ka lacen dong iket aguluni iwi lodi mac ma nongo iye tye nono, wek olyeti, wek molane olyeti makwar calo owang awanga, wek cilo matye iye bene oleny woko, ki nyale bene oware otum woko. 12Abedo kaolo koma nono, pien mace bene lyetone pe twero kwanyo nyal mapek matye iyeni ducu. 13Nyal meno matye iyeni en aye tim macol me tarwang ma wubedo katimone, wun jo Jerucalem. Onongo kono alonyowu wudoko maleng, ento pe dong kilonyowu ikom timwu macol, pe dong wubilonye matwal nio wang ma atoyo akemona mageri woko ikomwu kit macalo amito. 14An Rwot Lubanga Matwero ducu dong atyeko loko man; kace kare oromo, abitiyo. Pe abiloko tama, dok kica pe bimaka wa ki acel, ci kibipwodowu malubu kitwu ki gin ma wutimo.” Man an Rwot Lubanga Matwero ducu ma awaco.

To pa dako pa lanebi Ejekiel

15Rwot dok oloko kweda. 16En owaco ni, “Wod pa dano, nen, dong acok kwanyo ngat ma yomo cwinyi ma nenone mitini woko ki adong acel keken. Ento pe ibikumu, pe ibikok, dok bene pig wangi pe bimol cito piny lipya. 17Pe icur matek, ento cur lalingling; pe ikum pi dano ma oto. Twe kitambarani iwii, ci iruk wari i tyeni, pe ium dogi, dok pe bene icam kwon pa jo matye kakumu.”

18Kitmeno aloko bot lwak i odiko, ci oo otyeno dakona oto woko. Orwone ki odiko atiyo kit macalo onongo kicika kwede. 19Ci lwak gupenya ni, “Pe itwero tito botwa tyen lok me gin magi, ma omiyo in itiyo gin macalo man?”

20Ci awaco botgi ni, “Rwot oloko kweda kun owaca ni 21atit lok ma en elokoni botwu, wun jo Icrael. Rwot Lubanga Matwero ducu owaco kuman ni, ‘Nen, abipyedo kabedona malengi woko, ma en aye tekowu ma wutye kawake pire, ma wumaro nenone, dok ma yomo cwinywu tutwali. Dong awobewu ki anyirawu ma wuwekogi ingewu i Jerucalemi kibinekogi woko ki pala lucwan. 22Ci wubitiyo kit macalo an dong atyeko tiyoneni; pe wubiumu dogwu, dok bene pe wubicamo kwon pa jo matye kakumu. 23Wiwu bibedo atweya ki kitambara ki war bene bibedo i tyenwu; pe wubikumu, dok bene pe wubikok, ento komwu bibale woko pi balwu kun wucur kekenwu ma ngat acel acel cur bot lawote. 24Kitmeno Ejekiel dong bibedo botwu calo lanyut; ci kit gin ducu ma dong en otiyo wun bene wubitiyo. Ka man otime, ci wubingeyo ni an aye a Rwot Lubanga Matwero ducu.’”

25Rwot dok oloko kweda. En owaco ni, “Dong in wod pa dano, inino meno aye abikwanyo iye celgi mateki woko, ma yomo cwinygi ki deyogi maditi, gin ma gimaro nenone, en aye Ot mera Malengi, kin gin ducu ma yomo cwinygini. Ci bene abikwanyo awobegi ki anyiragi woko. 26Inino ma abitiyo lok man iye, ngat mo ma obwot ki i lak to bibino ci titi pi gin ducu ma otime. 27Inino meno kikome en aye dogi bingame iye me cako lok doki odoco, ci ibilok bot dano mubwoti, ci ibiloko lok ma pe dong ibibedo latelebe oto matwal. Kitmeno ibibedo lanyut botgi; ci dong gibingeyo ni an aye a Rwot.”