Ejekiel 23

Lumego aryo ma gin lubalo tutwal

1Rwot dok oloko kweda. 2En owaco ni, “Wod pa dano, yam tye mon aryo, ma pud gin anyira ma megigi bene acel. 3Ikare ma onongo gin pud lutino anyira, ma gibedo i Ejipt, gubedo katimo tim me kwelekwele; ci dano gubedo kakwako korgi kun gimako tunugi ma ogulugu. 4Nyako maditeni onongo kilwongo nyinge ni Okola, ki lamine matidine onongo nyinge kilwongo ni Okoliba. Ci anyomogi gudoko mona ka gugamo ic ci gunywalo lutino co ki lutino anyira. Okola aye Camaria, ki Okoliba aye Jerucalem. 5Okola omede ki timo tim kwelekwele ma kun an dong anyome woko, dok bene onongo cwinye omaro jo Aciria tutwal, 6ma gubedo lulweny ma giruku bongo ma obedo lamarlamar, luloc me dul lobo ki ludito wi mony, gin ducu awobe mabeco ma ginen mwonya mada; gin wegi aguragura ma giringo ki aguragura. 7En omine kene katimo tim kwelekwele kwedgi, gin oyita lweny me Aciria ma kiyerogi ayera. Ci obalo kome woko kekene ki woro cal jogi pa jo ducu ma en omarogini. 8En yam pe oweko timo tim me malayaneni ma en ceng obedo katimone ki i Ejipt ikare ma pud en nyako; ci co gubutu kwede gukwako kore gunyongo wa tunune ma oguluni, kun gubedo katyeko mitigi ikome calo ngat mabedo ki malaya. 9Pimeno, amiye i cing pacoge, ki i cing jo Aciria ma en omarogini. 10Jo meno guweko en odong munero, ci gumako awobene ki anyirane woko; ento en mere guneke woko ki pala lucwan. Ci odoko lok aboka ikin mon, ki ikare ma dong kingolo kop ikome.

11Ci lamine Okoliba bene oneno time man, ento en dok onongo rac atika makato lamine Okola i mare ki i time me kwelekwele, ma dong obedo rac ma okato pa lamine woko. 12En omaro jo Aciria ma luloc me dul lobo ki ludito wi mony, lulweny ma giruke woko ki jami lwenygi ducu, wegi aguragura, ma giringo ki aguragura, dok bene gin ducu awobe mabeco ma ginen mwonya mada. 13Ci aneno en dong obale woko, gin anyiranu aryo ducu gubedo katimo tim kwele acelu. 14Ento en obedo kamede ameda ki tim kwelekweleneni; ci oneno cal co ma kigoro ikom ot, ki cal lubanga pa jo Kaldaya ma kideyo woko ki rangi makwar, 15ma gutweyo pyergi ki del, ma gin ducu guboyo wigi woko ki kitambara maboco me boyo wic; gin ducu ginen calo jo matye ki rwom me tic madito; meno obedo cal pa jo Babilon ma lobogi kikome aye Kaldaya. 16Cutcut ikare ma en onenogi ci cwinye ocako pyete ikomgi, ci ooro lukwena gucito botgi i Kaldaya. 17Ci jo Babilon gubino bote gubutu kwede iwi kitanda me mar, ma omiyo gubale woko ki tim meno me abor ma gutimo ikomeni, ci lacen ma dong kimiyo en onyobe woko ki bal, ci en otare woko ki botgi ma onongo cwinye ocido woko marac tutwal ikomgi. 18Ikare ma en omede ki kit tim kwelekweleneni kun bene dong timo atyer kamaleng ma onongo bedo kwede munero, ci an bene aloke atare woko ki bote ma cwinya ocido woko ikome, kit macalo aloke woko ki bot lamineni. 19Ento en pud omede ameda ki time me malayane, kun po pi kare ma onongo en pud nyako, ikare ma en obedo katimo tim malayane i lobo Ejiptni. 20Ci cwinye opyete ikom co ma gimaro tim kwelekwele, ma komgi me co obedo calo pa kana, ma pig komgi bene obedo calo pa aguragura. 21Kitmeno in Okoliba bene ibedo kayenyo tim me tarwang ma itimo katinoni, ikare ma jo Ejipt gukwako kori ci gunyongo tununi ma onongo pud ogulu agulani.

Lubanga ongolo kop ikom lumego aryoni

22Nen, man omiyo an Rwot Lubanga Matwero ducu awaco boti in Okoliba, kuman ni, cwinyi dong ocido woko ikom pacogi mayam imarogini, abikelogi ikomi, kun gia ki ikabedo ducu ma orumi: 23ci jo Babilon ki jo Kaldaya ducu, jo Pekod, jo Coa ki jo Koa, ki jo Aciria ducu kacel kwedgi. Gin ducu awobe mabeco ma ginen mwonya mada, luloc me dul lobo ki ludito wi mony, ludito ki lulweny, gin ducu nongo giringo ki aguraguragi. 24Ci gibibino ikomi, ki tung kumalo ki gadigadi lweny ki gadigadi ma otingo yec, ki lwak mony. Ci kibirumi woko dyere ki kwot ocal ki kwot bani ki otang nyonyo, dong abimiyogi twer me ngolo kop ikomi kit macalo ngolo kopgi tye kwede. 25Abimiyo kinigana kemi, wek kong gutwenyi malit. Ci kibingolo umi ki iti woko, ka dong i agikine kibineki woko ki pala lucwan. Kibimako lutino awobeni ki lutino anyirani ci kibiwangogi woko makwo ki mac. 26Ci gibilunyu bongo woko ki ikomi dok gibikwanyo jamini mabeco me welgu woko. 27Dong an abigiko tim kipyedani ki tim me kwelekwele ma ikelo ki i Ejiptni woko. Ci pe dong ibineno jo Ejipt ki dok bene pe dong ibipo pirgi matwal.”

28Rwot Lubanga Matwero ducu owaco kuman ni, “Nen, abimiyi woko i cing jo ma idaggini, i cing jo ma iloke ki botgi ma cwinyi ocido woko. 29Kit macalo gidagini gibimayo jamini ma itiyo tic piregu ducu woko, ci gibiweki idong munero, nono labongo gin mo; ci gibinyuti woko kamaleng iwang dano ma nongo itye munero calo malaya. Ci tim kipyedani ki tim kwelekweleni 30aye ma okelo can man ikomi, pien itimo abor ki lurok, ci inyubu komi woko ki cal jogigi. 31In dong ilubu kit lameru, pimeno abiketo can acelu ma ceng aketo ikomeni ikomi.” 32Rwot Lubanga Matwero ducu owaco kuman ni,

“Ibimato ki i kikopo pa lameru kikopone lac dok iye tut.

Ci dano binyeri kun gicayi bene acaya, pien kikoponi dong opong woko ligwik.

33Ci ibimer woko kun ibedo ki cwercwiny, pien kikopo me lworo ki bale pa piny, en aye kikopo pa lameru Camaria.

34Ibimato gin ma i ikikopo ka dok ibicwiyone ducu, ci ibityero kikoponu woko, ka dong ibingolo tununi ki nginyinginyi me kikopo ma otoni pi cwercwiny.

Pien an Rwot Lubanga Matwero ducu dong atyeko loko.” 35Pimeno Rwot Lubanga Matwero ducu owaco kuman ni, “Kit macalo wii bene dong owil woko ikoma, dok bene dong ityeko bola woko ingeyi, pimeno in dong omyero icir gin ma oa ki i tim kipyedani ki tim kwelekweleni.”

36Rwot dok owaco bota ni, “Wod pa dano, tika ibingolo kop ikom Okola ki Okoliba? Cit i tuc botgi gin me kwer ducu ma gin gutimo. 37Gubedo katimo abor dok bene guneko wa dano, gutimo abor pi woro cal jogigini, dok bene lutino awobegi ma gin kikomgi gunywalo kwedani, gin gutyero bot cal jogi me bedo camgi. 38Medo ikom meno gin dok gutimo gin magigu: gubalo kabedona maleng inino acelu, dok bene gupyedo ceng Cabita. 39Ka dong gutyero lutinogi ma guneko me gitum bot cal jogigi, ci dong en inino acelu bene aye gua gubino kwede i kabedona maleng ci gupyedo woko. Dong inen, man aye gin ma gutimo i oda.

40Ci gin bene gucwalo lukwena bot co matye kamabor ni gubin, ci nen, gubino. Ci gulwoko komgi woko pirgi, ka guwiro wanggi, dok bene gudeyo komgi woko ki ruk me deyo. 41Ci gubedo iwi kitanda ma kideyo, ki meja ma dong kiketo kangete ma kipeto kitambara maber woko iwiye, ci bene guketo iye odok ecetana ki moona.

42Woo pa lwak dano ma gutoyo tokgi ata onongo owinye botgi, co ma gubedo kawooni onongo lumero me nino ducuni ma kikelogi ki i tim aroo. Ci gin guketo ogul i ngut cing mon aryoni ducu, ki lalukana mabeco atika bene gurwako iwigi. 43Ka dong awaco ki i cwinya ni, mon magi komgi dong oloc woko ki tim kwelegini, ento co magi pud gimito butu kwedgi gire! 44Pien gucito botgi ci gubutu kwedgi, kit macalo co gicito bot mon ma malaya ci gibutu kwedgini. Kitmeno bene gucito bot Okola ki Okoliba katimo tim kwelekweleni, gin mon ma lukweleni. 45Ento jo ma kitgi atir bingolo kop ikom gin mon ma lutim abor ki mon ma lunek danogu, pien gutimo abor kun dok gineko dano bene.”

46Rwot Lubanga Matwero ducu owaco kuman ni, “Kel mony obin olweny ikomgi wek komgi omyel ki lworo madwong ka dok kiyakgi woko. 47Ci mony bicelogi ki gweng dok kibitongogi woko ki pala lucwan, kibineko awobegi ki anyiragi woko, kun bene kiwango odigi woko ki mac. 48Dong abijwiko kit tim man me tarwang woko ki i lobo man, wek ka mon ducu guwinyo cik ma acikowu kwede, ci pe dok gutim tim me tarwang kit macalo gin dong gutimoni. 49Dok abiketo can i komwu wun lumego aryoni pi timwu me tarwang, dok bene wubilimo can malit pi balwu maracu atika ki pi woro cal jogi. Ci dong wubingeyo ni an aye a Rwot Lubanga Matwero ducu.”