Ejekiel 22

Bal pa jo Jerucalem

1Rwot dok oloko kweda. 2En owaco ni, “In wod pa dano, in tika iyube me ngolo kop ikom taun madit man ma opong ki lunek mapol tutwali? Tit bot jo Jerucalem gin me kwer ducu ma dong gutyeko timoneni. 3Wac botgi ni, Rwot Lubanga Matwero ducu owaco kuman ni: pien dong wutyeko neko jo mapol ma gubedo i taun madit man, dok bene dong wubalo komwu kekenwu pi woro cal jogi, pimeno karewu bene tye kabino. 4Dong wutingo alii pi dano ma wunekoni, dok bene komwu obale woko pi cal jogi ma wutiyogini; ma omiyo dong wudiro ninowu onyiko cok, kare me mwakawu ma kiciko pire dong oo pimeno amiyo wudoko ginacaya bot lurok ducu, ki ginanyera bot jo me lobo ducu. 5Jo ma gitye cok kwedwu ki jo ma gitye kama boco ducu kibinyerowu, wun dong olano nyingwu dok oweko kabedowu obale woko, ma jamine tye ma onywene ki koko bene tye licur iye. 6Nen, rwodi ducu me Icrael ma gitye i taun madit man, gingene pi tekogi ci gibedo kaneko dano jwi. 71Pe tye ngat mo i taun madit man ma woro lunyodone. Dok gibedo kaunu labedo matye i lobo; dok timgi ikom lutino kic ki mon to nen marac tutwal 82Gubedo bene kacayo jamina maleng, ki dok bene gupyedo ceng Cabita. 9Tye jo mogo ikinwu ma giloko lok me tongo dano wek kinek woko. Jo mukenenu ma ikinwu gucamo cam ma kityero bot cal jogi ma iwang jogi matye iwi godi. Ci gutimo tim kipyeda tutwal idye gang kun gitiyo tim me kwele ma lemo cwiny. 103Dano gibutu ki megigi ki ciwegigigu i Jerucalem; dok bene gidiyo mon gi ki tek ikare ma nongo gitwoyo two kwer ci gibutu kwedgi tetek. 11Dok gutimo gin me kwer bene kun bene gitimo abor ki mon pa luwotgi. Jo mukene gitimo tim kipyeda i kor ciwodgi, ki jo mukene gibalo kom lumegigi ma anyira pa wegigi kikome. 124Jo mogo gineko dano pi lim ma nongo kiculugi kwede, jo mukene limo magoba madwong, ki jo mukene nongo lim pi yako jami pa luwotgi tektek; ma omiyo wigi dong owil woko ikoma.” Man Rwot Lubanga Matwero ducu ma owaco.

13“Nen, pimeno dong abidongo cinga ki akemo ikom jo me Jerucalem pi magoba lim ma gulimo i yo ma pe tye atiri, ki dok bene pi lok me neko dano ma wubedo kanekogi idye gang man. 14Tika wubibedo ki tekcwiny me ciro lweny ki cingwu kono bibedo tek maromo lweny inino ma abilweny iye ikomwu? An Rwot dong atyeko loko lok man, dok bene abitiyo. 15Abikeyowu woko ikin lurok, dok abimiyo wuket iwi lobo ducu ci dong abityeko tim maracu woko liweng ki i gang man. 16Nyingwu bibale ikin lurok ducu; ci man bimiyo wun jo ma i Jerucalem wubingeyo ni an aye a Rwot.”

Ruk mac pa Lubanga

17Rwot dok owaca ni, 18“Wod pa dano, jo Icrael dong gudoko gin ma konygi peke ki tung bota. Gin ducu gudoko calo cet nyonyo me, ryal, mola, koc, nyonyo ki racac mapek ma kitye kaliyone i ruk mac. 19Pimeno Rwot Lubanga Matwero ducu owaco kuman ni: dong kit macalo wudoko cet ryali, wunge ni dok abicokowu aguruwu woko kacel idye gang me Jerucalem. 20Dong kit macalo dano coko ryal, mola, nyonyo, ki nyonyo racac mapek ki koc ci ketogi i ruk mac ci kutu mac ikome wek oleny woko, kitmeno bene an abicokowu woko ki kinigana kacel ki akemona, ci abiketowu i mac ci alenyowu woko. 21Abicokowu ci akutu mac me akemona ikomwu, ci wubileny woko idye gang. 22Kit macalo kilenyo ryal i ruk mac, wun bene kibilenyowu woko kumeno idye gang; ci wubingeyo ni an Rwot dong aonyo akemona woko ikomwu.”

Bal pa lutela pa jo Icrael

23Rwot dok oloko kweda. 24En owaco ni, “Wod pa dano, tit ki jo Icrael ni gin jo ma pe gileng, dok jo ma kot pe ocwer i ngomgi ikare me kinigana. 25Rwodigi ducu bene gicalo labwor ma kok kun tye kakilo ringo lee ma nongo en omako. Guneko dano gutyeko woko, dok guyako lonyo kacel ki jami me welgu ducu. Gumiyo mon mapol gudoko mon to idye gang me Jerucalem. 265Ajwakigi ducu gukwero lubu cika, dok bene gupyedo jamina maleng gu woko. Pe guketo apokapoka ikin jami maleng ki jami me nino ducu. Pe bene gupwonyo dano kit me ngeyo apokapoka matye ikin gin ma keni ki gin ma pe keni, dok bene pe gubedo kagwoko ceng Cabita, meno ducu omiyo gitye kapyeda ikin jona. 27Rwodigi ma gitye i Jerucalem ducu gicalo orudi matye kakilo ringo lee ma gumako, ma kun gioyo remo pa dano bene, kitmeno guneko dano mapol woko liweng wek dong gunong magoba i yo ma pe atir. 28Lunebigi bene gukano balgi woko macalo dano gibuku kor celgi woko ki rangi matar, dok bene guneno ginanyuta me gobagoba, ki dok bene gityeto tyet botgi me goba keken kun giwaco ni, ‘Rwot Lubanga Matwero ducu owaco kuman,’ ma kun nongo an Rwot gire pe oloko botgi lok mo. 29Ci jo me lobo man dong gunyebe katimo tim me buma, ci giyako jami pa dano woko. Dok guunu lucan kacel ki jo ma piny obwoyogi, kun gubumu wa lurok ma gibedo ikin gi marac tutwal. 30Onongo abedo kayenyo dano mo ma myero oger cel mupotoni kun en bicung inyima kama obarri pi lobo man, wek pe ajwergi woko; ento pe amedo ki nongo ngat mo wa ki acel. 31Pimeno omiyo aonyo kinigana woko ikomgi; ci awangogi woko ki mac me akemona, ci aculu kwor ikomgi pi gin ducu mayam gutimo.” Man an Rwot Lubanga Matwero ducu ma awaco.