Ejekiel 21

Pala lucwan pa Rwot

1Rwot oloko kweda. 2En owaco ni, “Wod pa dano, cik wangi inen Jerucalem ci itit lok me nebi me juk ikom kabedone ducu ma dano giworo iye lubangagu. Tit lok me juk bene ikom lobo Icrael. 3Wac bot dano ducu ma gibedo i lobo Icrael ni an a Rwot awaco ni, ‘Atye ki lok ikomwu. Abiwoto pala lucwana woko ki i akurane, ci anekowu woko ducu, jo ma kitgi atir ki jo ma gin lutim maracu ducu. 4Dong ka atiyo man, abitic ki pala lucwana kun anekowu woko ducu, jo ma kitgi atir ki jo ma gin lutim maracu, cake ki tung kumalo o kwede wa tung kupiny. 5Ci dano ducu gibingeyo ni an a Rwot dong awoto pala lucwana woko ki i akurane; pe doki abidwoko i akurane.’

6Wod pa dano, cur calo cwinyi mito dem woko kun nongo geni mito rwenyo woko. Cur giri ki keccwiny madit mada ki i kabedo kama jo ducu twero neni. 7Ka inen dano gupenyo in ni pingo itye kacur, ci itit botgi ni pi lok man mamito timeni. Tit botgi ni ka inen lok man bitime cwinygi bipong ki lworo. Ci cinggi bikwe woko doko goro. Tekcwiny mayam gitye kwede bitum woko. Ci conggi bene bibedo kamyel amyela calo pii ma tage. Nen, kare dong obino woko; lok man dong bicobe kakare.” Man an Rwot Lubanga Matwero ducu ma awaco.

8Ci Rwot dok owaca ni, 9“Wod pa dano, tit loka. Myero itit lok ma an atye kawaconeni bot jo ducu ni,

‘Pala lucwan, pala lucwan dong kipako lake woko mabit,

dok bene kijwayo kome olil woko maber licwic.

10Kipako lake mabit me neko dano,

ci kijwayo ni wek omeny mawil calo lutkot.

Ngat mo matwero jukune peke;

pien wun dong wucayo pwod ma amiyowu dok wukwero winyo tama ma amiyo botwu.

11Dong kimiyo pala lucwan kitye karudune,

wek dong obed maber ma kiromo makone.

Dong kipako lake woko mabit dok bene kijwayo kome woko

wek dong kimii woko i cing lanek dano.

12Wod pa dano, dange matek kun ikok kwede,

pala lucwan man kimiyo pi neko jona,

ki pi neko rwodi ducu me Icrael.

Ci kibinekogi woko

kacel ki jona ma gudongegu ducu.

Ma omiyo myero idong emi pi gen madong orwenyo woko!’

13An atye katemowu atema wun jona.

Ento ka pud wumede ki kwero winyo tama ma kimiyo botwuni, ci dong wutamo ni gin ma kit magi pe bitime i komwu?” Man an Rwot Lubanga Matwero ducu ma awaco.

14“Kombedi dong, wod pa dano, tit loka. Ci idong cingi, ci pala lucwan bibino piny kiryo nyo kidek. Man aye pala lucwan ma neko mere dano, pala lucwan mamiyo lworo dok ma neko dano tyeko woko ducu. 15Pala lucwan man miyo tekcwiny pa jona rwenyo woko, ki jo mapol gibipoto i dog taun madito ducu. Dong atyeko miyo pala lucwan ma mil amila; kijwayo meny calo lutkot ma wil, dong kityeko rudune woko pi neko dano. 16Ngol tung acuc ki tung acam, in pala lucwan mabiti! 17Ci an bene abidongo cinga, ka kinigana dong bitum woko. An Rwot dong aloko.”

Pala lucwan pa rwot me Babilon

18Rwot dok oloko kweda. 19En owaco ni, “Wod pa dano, ket alama ma nyutu yoo aryo kama rwot me Babilon bibino ki iye ki pala lucwane. Ci icib lanyut yoo kama yoo ma cito kadonyo i taun madit poke kwede ki iye. 20Ci inyut kamaleng kama yoo aryonu gicito iye. Yoo acel cito i Raba ma en aye gang pa jo Ammon, ki mukeneneni binyutu yoo ma cito i Juda, ma cito donyo wa idye Jerucalem kikome ma kirumu woko litik ki cel gogo mateki. 21Ci laloc me Babilon bicung i angaka ngaka yoo aryo kama kicibo iye lanyut yooni. Ci en bicung kenyo katyeto tyet, wek enen yoo mene ma myero elubi; biyengo aterogu, ka bipenyo cal lubangane, ci bingiyo acwiny me lee ma kityero me gitum. 22Dong kwir ma en omako i cinge lacuc aye binyutu Jerucalem. Man tito bote me ngamo doge me koko, ki me dange ki dwon me mony ki woo malongo, ki me keto yat latwom cel orum gang meno woko bene; ci bitoro cel lobo rumu gang woko. 23Man binen macalo tyet me goba ki tung bot jo ma i Jerucalem, ki pi kwong gi maleng madong gukwongoni. Ento lok man tye me poyo wigi ikom balgi ci binyutu ni kibimakogi woko amaka. 24Man aye gin ma an Rwot Lubanga Matwero ducu atye kawacone: wumiyo kipo ikom balwu, ma omiyo balwu kinyutu kun kiyarogi kamaleng. Ci dano ducu gingeyo ni wubalo. Dok bene wunyutu balwu woko ducu ma wutiyo. Dong atyeko ngolo kop woko i komwu, pimeno abimiyowu woko i cing lukworwu.

25Nen, ninoni tye kabino, in latim marac, in rwot marac maloyo Icrael, ma en aye dong nino ma kibiketo iye can malit ki pwod ikomi me agiki. 26An Rwot Lubanga Matwero ducu dong aloko. Kwany lalukana ki kitambara labo wic woko ki iwii. Pe tye gin mo ducu ma bibedo kit macalo gitye kwedeni. Abitingo lucan ailo malo kama ber! Ci jo ma gitye ki twero me loc ikare man kibidwokogi woko piny! 27Ka dong abimiyo taun madit man doko wi obur, wi obur, wi obur! Ento gin man pud pe bitime nio wang ma ngat ma dong ayero me keto can magi ki me miyo pwod ikom taun maditi obino.

Lubanga bingolokop ikom jo Ammon

281

In wod pa dano, tit lok kun iwaco ni, Rwot Lubanga Matwero ducu dong owaco lok ma okemo jo Ammon, ki kit ma gitye kwede kayeto jo Icrael. Wac botgi ni,

‘Pala lucwan, pala lucwan dong kiyubu woko me neko dano;

dong kijwayo woko tye kameny amenya calo lutkot mawil.’

29Tit bot jo Ammon ni ginanyuta ki gin anena ma gineno iwang lekgu ducu goba, dok bene gin jo ma gityeto tyet me goba me bwologi. Ci dong ninogi tye kabino, gin jo maracu, en aye nino ma kibiketo iye can malit ki pwod ikomgi me agiki. Kibingolo ngutgi woko ki pala lucwan.

30Dwok pala lucwan i akurane kakare. Abingolo kop ikomi i kabedo kama yam kwoni ocake iye, wa i lobo kama yam kinywali iye. 31Ci abionyo kinigana ikomi; dok bene abikutu mac me akemona ikomi man miyo ibiwinyo lwak arem malit tutwal. Abimiyi bene woko i cing jo mager ma gin lutim bwami marac ma gingeyo neko dano tutwal, ci gibineki woko. 32Kibiwangi woko ki mac. Kibineki woko i lobowu kikome, pimeno ngat mo ma bipo piri dong bedo pe matwal. Pien an Rwot dong atyeko loko.”