Ejekiel 20

Jo Icrael gumede ki jemo

1Ludongo mogo ki ikin ludongo pa jo Icrael gubino bota kapenyo dog Rwot inino dwe apar me dwe me abic, i mwaka me abirone, ci gubino inyima. 2Ci Rwot oloko kweda kun waco ni, 3“Wod pa dano, lok ki ludongo pa Icrael, kun iwaco botgi ni, Rwot Lubanga matwero ducu owaco kuman ni, ‘Man wun wubino kapenyo doga bo? Akwonge ni, pe wubipenyo doga. Man an Rwot Lubanga Matwero ducu ma awaco.’

4Dong in wod pa dano, ibingolo kop ikomgi bo? Ka kumeno ci dong ingol kop ikomgi. Po wigi ikom gin me kwer mayam kwarigi gutiyo. 51Tit botgi lok man ma an Rwot Lubanga Matwero ducu atye kawaconeni. Ikare ma ceng ayero Icrael, akwongo kwong bot likwayo pa Yakobo. Dok anyute botgi i lobo Ejipt, kun awaco botgi ni, ‘An a Rwot Lubangawu.’ 6Inino meno bene en aye acike kwedgi ni abikwanyogi woko ki i lobo Ejipt ci aterogi i lobo ma ayero pirgi, lobo Kanaan maber dok ceko cam mabup, ma en aye lobo me deyo adada dok ber makato kun loyo mukenegu ducu. 7Ci awaco botgi bene ni gubol cal jogi me kwer ma gimarogu woko, dok ni pe myero gubal komgi ki lubanga mogo me gobagoba pa jo Ejipt, pien an aye a Rwot Lubangagi. 8Ento gin gujemo ikoma gukwero winyo loka. Gin ducu pe gubolo cal jogigi me kwer ma gimarogu woko dok bene pe gubwoto woro lubanga pa jo Ejipt me gobagobani. Pi man omiyo atamo ni onongo myero aony akemona ikomgi dok ato kinigana ikomgi ki idye lobo Ejipt. 9Ento pe dong atimo gin ma onongo atamo ni abitimoni, pien meno onongo twero miyo pe giworo nyinga, ci miyo bene gipyedo nyinga ikin lurok kama onongo jo Icrael gibedo iye; pien yam aloko bot jo Icrael ki inyim jo ma gin gibedo ikin gi ni abikwanyo jo Icrael ki i lobo Ejipt akelogi woko.

10Kitmeno akwanyogi woko ki i lobo Ejipt ci akelogi wa idye tim. 112 Ci amiyo cika botgi ka dok anyutigi gin ma aciko ducu, kun nongo ngat magwoko cika en aye bedo kwo. 123Amiyo botgi bene ceng Cabit ni gin gugwoki, ma en aye lanyut matye ikin an ki gin, wek gunge ni an Rwot aye ma alonyogi miyo gibedo maleng. 13Ento jo Icrael gujemo woko ikoma ki i tim, pe gulubu cika dok bene gukwero tiyo gin ma an aciko ducu, kun ka onongo ngat mo ogwoko cika ci en aye bedo kwo. Gupyedo wa Cabita woko marac adada. Ma omiyo atamo ni myero aony akemona ikomgi ki idye tim, wek atyekgi woko liweng matwal. 14Ento pe dong atimo gin ma onongo ceng atamo ni abitimoni, meno onongo twero miyo pe giworo nyinga, miyo bene gipyedo nyinga ikin lurok kun an akwanyo jo Icrael ki i lobo Ejipt akelogi woko ma gin bene gineno. 154Dok bene yam akwongo kwong botgi ki itim ni pe dong abiterogi i lobo ma onongo dong atyeko miyone botgi, lobo maber atika dok ceko cam mabup, ma en aye lobo me deyo adada makato lobo mukenegu ducu. 16Akwongo kwong pien onongo gukwero lubu cika, dok bene pe gubedo katiyo gin ma an aciko ducu, ci gupyedo Cabita bene. Gumaro gigi woro cal jogigi. 17Ento kica omaka ikomgi. Pe anekogi woko dok bene pe atyekogi woko ki i tim kunu, 18ci awaco bot lutinogi ni, ‘Pe wulub cik mayam kwariwu guketo; pe bene wulub kitgi, dok bene pe wubal komwu ki woro cal jogigini. 19An Rwot aye Lubangawu. Wulub cika dok bene wugwoke kun wutiyo gin ma an aciko ducu. 20Wugwok ceng Cabita obed nino maleng botwu, ci wuwek obed lanyut me cike ma waketo ikin an ki wun, ci dong wubingeyo ni an aye a Rwot Lubangawu.’

21Ento lutinogi bene gujemo woko ikoma; pe bene gulubu cika dok pe gugwoke me tiyo gin ma an aciko ducu, kun kono nongo ngat ma gwoko cika aye bedo kwo. Gupyedo Cabita woko. Ma omiyo atamo ni onongo myero aony akemona ikomgi madit wek ato ki kinigana bene ikomgi ki idye tim. 22Ento ajuku cinga, pe dong atimo gin ma onongo atamo ni abitimoni, meno nongo twero miyo pe giworo nyinga, miyo bene gipyedo nyinga ikin lurok, kama an akwanyo jo Icrael ki i lobo Ejipt akelogi woko ma gin bene ginenoni. 235Dok bene akwongo kwong mukene ki i tim ni abiketogi woko ikin lurok, ci akeyogi woko iwi lobo ducu. 24Atimo man pien gukwero lubu cika dok bene gukwero tiyo gin ma aciko ducu, gupyedo Cabita, dok gubedo kaworo cal jogi mayam kwarigi guworoni. 25Lacen dok amiyo botgi cik maracu kun acikogi ki kit cik mogo ma pe twero miyo dano bedo kwo. 26Amiyo gubalo komgi ki mot mapatpat ma gityero bot cal jogi, dok bene amiyo gutyero lutino kayogi ma co calo gitum awanga. Atimo man pi miyogi lworo madwong ki pi keto can ikomgi; wek gunge ni an aye a Rwot.

27Ma omiyo kombedi dong in wod pa dano, lok ki jo Icrael kun itito lok ma an Rwot Lubanga Matwero ducu atye kawacone botgi. Man aye kit yo mukene mayam kwarigi gucaya kwede dok bene pe gubedo luwiny dok omiyo pe gin ogene ci oweko yam pe gutiyo gin matye atir inyima. 28Akelogi i lobo mayam onongo acike ni abimiyo botgi. Ci ikare ma guneno cere ki yadi ma potgi oluk mabeco ikabedo ducu, ci gutyero gitum woko ducu kunu. Gungeto cwinya oweko kiniga omaka pi gitum awangagi ma guwango, ki pi gityer amata ma gukelo guonyo kununi. 29Apenyogi ni, ‘Wang jogi magi ma wucito iyeni gin obedo gin ango?’ Ma omiyo nyinge kilwongo ni Bama nio wa onyo. 30Kombedi dong itit lok man ma an Rwot Lubanga Matwero ducu atye kawaconeni bot jo Icrael: pingo wumito ni wutim lakit bal acel mayam kwariwu gutimoni kun bene dong wungak woko wubedo kaworo cal jogi? 31Kadi bed wa ikare man pud wutyero lakit mot acelu dok bene wutyero awobewu iwi mac me gitum awanga, ma omiyo wubalo komwu kekenwu pi woro cal jogiwugu ducu. Wun jo Icrael pud dok wubibino kapenyo doga? Dong akwonge ni, pe wubipenyo doga. Man an Rwot Lubanga Matwero ducu ma awaco. 32Dong wutyeko moko tamwu woko kun wumito wubed calo jo me rok mukeneni, wumito wubed calo jo me kaka ducu matye iwi lobo ducu, wek wuwor yadi ki godi, ento meno pe bitime matwal.

Lubanga keto can pi bal dok weko bal pa dano

33Dong akwonge ni, abilweny ikomwu ki tekona ducu, ci akemona bene abionyo ikomwu ducu, ci dong abibedo Rwot ma loyowu. Man an Rwot Lubanga ma awaco. 34Ci abinyutu twerona botwu kun aonyo akemona woko ikomwu ka acokowu woko ducu ki ikin lurok ma iwi lobo ducu kama yam gikeyowu wucito iye, ci akelowu aketowu kacel. 35Abikelowu i tim pa lurok, ka dong abingolo kop ikomwu ki kunu wang ki wang. 36Kit macalo yam apwodo kwariwu idye tim i lobo Ejipt, ci abipwodowu bene kitmeno. Man an Rwot Lubanga Matwero ducu ma awaco.

37Abidiyowu ki tek nio ka wubilubu gicike ma aketo kwedwu. 38Abikwanyo jo ma gin lujemoni ki jo ma gin lutim bal ikoma woko ki ikinwu. Abikwanyogi akelogi woko wa i lobo kama yam gubedo kawot iye macalo welo, ento pe gibidonyo i lobo pa jo Icrael. Man bimiyo wungeyo ni an aye a Rwot.”

39Rwot Lubanga Matwero ducu awaco ni, “Kombedi dong wun jo Icrael, wun ducu wucit wutii giwu bot cal jogiwu. Ento acikowu matek mada ni lacen inge man omyero dong wuwiny loka, ma pe dong wupyedo nyinga malengi matwal, dok pe dong wutyero motwu bot cal jogi bene.”

40Dok an Rwot Lubanga awaco ni, “Wun jo Icrael ducu wubiwora ki kunu i lobo meno, iwi got mera maleng, ki iwi got me lobo Icrael mabori. Ci dong cwinya bibedo yom i komwu ki kunu, ci abimito motwu, kit motwu mabeco makato ducu me gityer, ki gityerwu maleng. 41Lacen ka dong acokowu woko ducu ki ikin lurok ma iwi lobo ducu kama yam kikeyowu wucito iye ci akelowu aketowu kacel, abijolowu macalo gitum awanga ma ngwece kur me lakwe cwiny. Ci dong abinyute botwu ni an aleng dok rok ducu gibineno man ki wanggi. 42Ka dong akwanyowu adwokowu cen i lobo Icrael, en lobo mayam akwongo pire ni abimiyo bot kwariwuni, ci wubingeyo ni an aye a Rwot. 43Ci wubipo pi balwu ki gin ducu me kwer ma wutimo ma omiyo wubalo komwu woko kekenwu. Wubibedo ki kec cwiny i komwu kekenwu pi gin ducu maracu me lewic ma wutimoni. 44Wun jo Icrael wubingeyo ni an aye a Rwot, pien pe atiyo kwedwu kun lubu gin maracu ma wutimo, nyo ma oporo kitwu maraci, ento atiyo kwedwu kun agwoko deyo me nyinga wek kiwora.” Man an Rwot Lubanga Matwero ducu aye ma awaco.

Mac olyel tung kupiny

45Rwot Lubanga dok oloko kweda. 46En owaco ni, “Wod pa dano, nen tung kupiny. Wac lok ikom kabedo matye tung kupiny, dok bene itit lok ikom lobo bunga me Negeb. 47Tit lok marac me nebi ikom bunga me Negeb wek owiny gin ma Rwot Lubanga Matwero ducu tye kawaconeni: nen, abimoko mac, ci abiwango yadi ma otwo ki yadi madyak ducu woko ki i in! Gin mo ma bineko leb mac man ma lyeli bibedo peke. Mac man biwang nya cake ki tung kupiny o kwede wa tung kumalo ci wango kabedo ducu. 48Ci Dano ducu gibineno ni an Rwot aye ma acwinyo mac man wek ngat mo pe onek woko.”

49Ci awaco ni, “Rwot Lubanga Matwero ducu, dano ducu giwaco lok ikoma ni, ‘An pe abedo ngat ma kalok loko kwedgi ci alok i carolok me koclit kare ducu?’”