Ejekiel 19

Wer me kumu

1Wucak wer me kumu pi rwodi me Icrael, 2kun wuwero ni,

Meni nene obedo macalo min labwor

ikin lwak labwor!

Obutu ikin lutino labwor, kun pito lutinone.

3Opito latine acel ci opwonyo ki dwar;

odoko wod labwor madit,

obedo kamako dano kun neko ci camogi woko.

4Rok mapol guwinyo pire ci gudongo oduru ikome;

ci gukwinyo bur me make ci guweko en opoto iye.

Gugole woko ki goli ci gukete i canduk ka gutere wa i lobo Ejipt,

5Ka mine dong oneno ni kibodo wiye nono,

ma gene dong orwenyo woko,

ci okwanyo latine mukene opwonyo oloko odoko twon wod labwor madit.

6Ikare ma dong odongo,

obedo kawot kacel ki labwor mukenegu.

Ka dong opwonyo dwar kit me mako lee;

obedo kamako dano kun nekogi ci camogi woko.

7Oturu cel gogogi otyeko woko,

ci oketo taun gi woko ducu ma omiyo odoko wi obur;

ma omiyo jo ma gibedo i lobo meno gubedo ki ur dok ki lworo madwong,

ikare ma nongo en kok.

8Jo me rok ducu gucoke ka lweny ikome;

guciko owic woko ikabedo ducu me make,

kadok guciko obwogi gurume kwede woko;

ci opoto woko i bur ma gin gukwinyo.

9Gugole woko ki goli ci gukete i canduk,

ci gutere woko wa bot rwot me Babilon.

Gutere gukete i ot mabuc,

wek pe dong kiwiny kokone matwal iwi godi me Icrael.

Yat olok ma otwo

10Meni yam obedo calo yat olok

ma kipito i poto olok matye inget pii.

Pi pii madwong ma onongo tye,

omiyo oketo jange mapol dok onyako nyige mabup.

11Jang olok man onongo gitego mada,

ma omiyo odongo ci odoko odoo ker pa luloc.

Olok man odongo mabor adada ma wiye mito gudu polo.

Dano ducu guneno kit ma pote oluk kwede

ki kit ma bore onongo tye kwede.

12Ento kiputu olok ni woko ki lwite ducu ki kiniga,

ci kibolo woko wa i ngom.

Yamo oa ki kunyango, okodo, ci otwoyo nyige woko.

Kituru jangegu woko ducu;

ma gutwo ci kiwango woko ki mac.

13Kombedi dok kinako dok kipito itim aroo,

i lobo ma otwo ma pii peke iye.

14Mac omoko ci olyel ikor yat oloki;

ci mac owango jange ki nyigegu woko ducu liweng,

Jange ducu dong pe bibedo tek doki,

odoo ker pa laloc pe dong bibedo iye.

Man wer me kumu ma kibedo kawerone kare ki kare.