Ejekiel 18

Dano ma timo bal bito

1Rwot dok oloko kweda. 21 Owaco ni, “Man kit carolok ango ma dano gibedo kanwoyone teretere ma okemo lobo Icraeli? ‘Kwarowa gucamo nyig olok mawace, man odingo lak lutino woko.’”

3Nen, “Dong akwonge ni,” Man an Rwot Lubanga Matwero ducu ma awaco, “Pe dong wubiloko carolok man wunwoyo i Icrael matwal. 4Nen, kwo pa wego nyo pa latin ducu mera. Dano ma timo bal bito.

5Kong itam pi dano ma kite atir, ma tiyo gin ma cik mito dok matye atir. 6En pe woro cal jogi pa Luicrael dok bene pe camo lee me gitum ma gityero i wang jogi. En pe balo ikom dako pa lawote me butu kwede, dok bene pe butu ki dako mere ikare ma nongo dakonu twoyo two kwer. 7En pe unu dano mo dok bene pe yako jami pa ngat mo. En kwanyo jami ma labanyane ojengo bote dwoko cen bot labanyane; ki bene miyo kwon bot jo ma kec nekogi, ci dok bene miyo bongi me aruka bot jo matye munero. 8En pe miyo lim me den wek enong iye magoba, ki en bene kwero timo gin marac woko, ento en ngolo kop ki ada dok ki gen ikin dano. 92En Lubu cika ducu dok bene gwoke tutwal kun tiyo gin ma an aciko ducu. En bene kite atir dong pimeno adada en bibedo kwo,” man an Rwot Lubanga Matwero ducu ma awaco.

10“Pimeno ka gwok nyo en onywalo wode ma layak dok lanek dano bene, meno nongo en otimo gin mayam wone pe otimo. 11Ce en bene camo ringo lee ma kityero i wang jogi, dok bene balo dako pa lawote woko wek ecit ebut kwede. 12Ci en unu lucan ki jo ma piny obwoyogi, ki en yako jami pa dano, dok gwoko gin ma labanyane oketo bote macalo gin ajenga ma pe kwanyo dwoko cen bote. Ka dong en woro cal jogi, dok bene timo gin me kwer ma pe wace, 13en bene miyo lim me den kun nongo mito ni enong iye magoba. En tika bibedo kwo? Pe bibedo kwo. En dong otyeko timo gin me kwer magi ducu, pimeno en bito pirgi. Alii me tone bibedo i wiye gire kene.

14Ci kong dong iket ni danoni onywalo wode. Latin meno neno kit bal ducu ma wone otiyo, ci obedo ki lworo, pe timo lakodi bal ma wone otiyoni. 15En pe woro cal jogi pa Luicrael, dok bene pe ocamo ringo lee me gitum ma kityero i wang jogi. En pe balo dako pa lawote kun butu kwede, 16ci pe timo ngat mo marac, pe bene yako jami pa ngat mo. En pe kwanyo gin mo me aketa macalo kijengo kadi ki acel. Ci en miyo kwon bot jo ma kec nekogi dok bene miyo bongi me aruka bot jo matye munero. 17En kwero timo gin marac, pe miyo lim me den wek enong iye magoba. En lubu cika dok bene gwoko gin ma an aciko ducu kun tiyo bene. Pimeno en pe bito pi bal pa wone; ento adada en gire bibedo kwo. 18Ento wone bito pi bale; pien otimo tim me bura, dok oyako omine ki bene, otimo gin ma pe nen maber wacel ikin lutugi.”

19Ci dong in, “Ipenyo ni, ‘Pingo latin pe myero onen can pi bal pa wone?’ Lagam me peny man tye kit man ni, latin otiyo gin ma cik mito dok matye atir, dok bene ogwoke tutwal kun tiyo gin ma an aciko ducu. Adada en gire bibedo kwo. 203Ento dano ma timo bal bito mere. Latin pe bineno can pi bal pa wone, kadi ki wego bene pe myero olim can pi bal pa wode. Dano ma kite atir gire bilimo mot pi gin matye atir ma en otiyo, ki latim marac bene bilimo can pi gin maracu ma en otimo.

21Ento ka dano ma latim marac oloke oweko timo bal ducu mayam en otiyo, ce olubu cika kun tiyo gin ma cik mito dok matye atir, adada, ci en bibedo kwo; pe bito. 22Bale ducu mayam en otimo an abiwekogi ducu, ci en bibedo kwo, pien otiyo gin matye atir.” 23Rwot Lubanga Matwero ducu openyo ni, “Wutamo ni cwinya bedo yom me neno ka latim marac to? Pe gire, amito ni en ongut owek timo bal ci oloke odwog bota wek obed makwo.

24Ento kace dano ma kite atir oloke oweko tiyo gin matye atir woko ce ocako timo bal, kun timo bene gin me kwer kit ma latim marac timoni, tika en bibedo kwo? Dong gin matye atir ducu ma en ceng otimo pe kibipo pire kadi ki acel. En bito pi lok roro ki pi bal mapol ma en otimo.

25Ento wun jo Icrael wuwaco ni, ‘Gin ma Rwot tye ka timoneni pe atir.’ Ento pe gin ma wun wutimoni aye ma pe tye atir dok pe kakare? 26Ka dano ma kite atir oloke oweko tiyo gin matye atir ce ocako timo bal, en bito pi balenu. En bito pi bal ma dong otyeko timone. 27Ka dano ma latim marac ongut ikom tim maracu ma en otimo ce oloke ocako tiyo gin ma cik mito dok matye atir, ci en bilaro kwone. 28Dong kit macalo en obedo kalwodo lok ki i cwinye ce en ongut oloke oweko timo bal ducu mayam obedo ka timogi, i adada en bibedo kwo, pe bito. 29Ento wun jo Icrael pud wuwaco ni, ‘Gin ma Rwot tye katimoneni pe atir dok pe kakare.’ Wun wutamo ni gin ma atye katimoneni pe atir dok pe kakare? Ento gin ma wun wutimoni aye mono ma pe tye atir dok pe kakare.

30Pimeno, an Rwot Matwero ducu dong abingolo kop ikomwu, wun jo Icrael, kun angolokop pa dano acel acel lubu gin ma en otiyo. Ci dong wungut, wuloke wuweko timo bal, pe wuwek balwu otyekwu woko. 31Dong wuwek bal ducu mayam wubedo katiyone ikomani, wucak dong bedo ki tam manyen dok ki cwiny manyen bene. Pingo wun jo Icrael wumito ni wutim bal wek wuto woko?” 32An pe amito ni dano mo oto, man an Rwot Lubanga Matwero ducu ma awaco. “Wuloke wungut ci wuwek timo bal wek wubed kwo.”