Ejekiel 17

Carolok ikom olok ki ocur

1Rwot oloko kweda. 2Owaco ni, “Wod pa dano, wac lok me koc lit, ci ilok carolok bot jo Icrael 3wek gunge gin ma an Rwot Lubanga Matwero ducu atye kawacone. Yam tye ocur mo madit matye ki bwome madito, ma oyaro woko malac. Onongo yec kome nen mwonya mada matye ki rangi mapol ma kitgi patpat. Otuk ocito i Lebanon ci oturu cwiny yat cedar me Lebanon woko. 4Oturu cwiny wi yat lano cedar me agikine, ci ocito kwede otero wa i lobo pa lucatwil, ci oketo i taun madit pa lucatwil. 5Dok okwanyo jang yat ki obokene ki i lobo Icrael ci opito i lobo mabere kama pii dwong iye wek odong. Opito kit macalo kipito kwede yat ma dongo i dog kulu, 6ci odoko yat olok ma ojany oluk lapiny. Jange ojany okemo tung bot ocur, ki lwite obedo kadonyo piny i ngom kama yat ocung iye. Kitmeno ocako doko yat olok, ci oketo jange mapol wa pote bene dong ocako lot oluk mada.

7Ento yam onongo tye ocur mo mukene madit matye ki bwome madit ki yece madwong. Nen, lwit yat olok man olot oket ki piny i ngom okemo tung bote, ci oloko jange ma pote oluk bene okemo tung bote kun geno ni bimiyo ecwiyo pii ma oromo makato pii ma en olimo ki ikabedo kama onongo en dongo iyeni. 8Ento onongo yam kipito i ngom mabere matye inget pii madwong, wek oket jange ma otegi mapol, onyak nyige, wek odok yat olok ma pire tek adada.”

9Rwot Lubanga Matwero ducu openyo kuman ni, “Yat olok man bidongo maber ci bedo kwo? Ci ocur mukwongoni pe biputu woko ki lwite ducu, ci tongo jange woko, wek pote ma pud lot alotani otwo woko? Man pe bimito dano ma kome tek nyo lwak me rok ma gitek me putune woko ki lwite ducu. 10Ada, dong kipito, ento tika twero dongo bedo kwo? Pe bitwo woko liweng kace yamo ma a tung kunyango obino okodo matek ikome ci ocoro woko piny? Pe bitwo woko ki ikabedo kama onongo tye kadongo iyeni?”

Te lok me carolok

11Rwot owaco bota ni, 121“Peny jo magi ma gin Lujemoni kace gingeyo telok me carolok man. Wac botgi ni rwot me Babilon obino i Jerucalem ci omako rwot ki rwodine ci odok kwedgi cen i Babilon. 13Ci okwanyo latin ker acel, oketo gicike kwede, kun omiye okwongo kwong ni ebigwoko cike meno. Ci omako jo madito ma ngene oterogi woko 14wek ker dong okwe woko mot, pe dok oile malo, dok bene me neno ni kigwoko gicikene wek ker ocung. 15Ento rwot me Juda ojemo woko ci ocwalo lukwena gucito i Ejipt, kakelo bote lwak aguragura ki dul mony madit. Tika en biloyo lweny? En twero loyo pi timo gin ma kitmeno? En twero turu gicike ci ringo bwot woko ma pe kong nongo kiketo can ikome?”

16Nen, “Dong adada akwonge ni,” man Rwot Lubanga Matwero ducu ma owaco, “Rwotnu bito i Babilon, pien ocayo kwonge, dok oturu gicike ma onongo en oketo ki rwot me Babilon, ma okete me bedo iwi komker. 17Kadi ki Parao ki dul monye mateki ki buca mony madit pe gibitwero konye ki lweny ka jo Babilon gutoro cel me lobo gurume kwede woko pi neko lwak jo mapol ma gibedo kenyo. 18Dong kit macalo en ocayo kwonge, kun oturu bene gicike ma onongo en oketo, dok otimo gin magi ducu, pimeno en pe bibwot.”

19Ma omiyo Rwot Lubanga Matwero ducu owaco kuman ni, “An Lubanga makwo, pimeno abiketo can ikome pi kwong ma okwongo inyima ci en ocayo ki pi gicikena bene ma en oturu wokoni. 20Abiciko obwona wek omok iye, ci en bimoko ii owicca, abitere wa i Babilon ka dong acako ngolo kop ikome ki kunu pi lok roro ma en obedo kaketone ikoma. 21Lulwenye ma kiyerogi ayera kibinekogi woko ducu ki pala lucwan, ki jo ma gudong makwo gibiket woko ata. Man bimiyo wungeyo ni an Rwot dong atyeko loko lok man.”

Cike pa Lubanga pi miyo gen

22Rwot Lubanga Matwero ducu owaco kuman ni, “An kikoma aye ma abikwanyo cwiny yat cedar ma toconeni ki i lano wiye, abituru ki malo kunu, ci an kikoma aye abipito iwi got mabor kama otene. 23Ci abipito iwi got mabor matye i lobo Icraeli; wek ojany iye mapol onyak nyige, ci odok yat madit wek kit kwayi lee ducu me tim gubin gubed i tere; ki kit kwayi winyo ducu ma gibigero odigi i tipu jange ducu. 24Dong yadi ducu me tim bingeyo ni An a Rwot aye ma ngolo yat madit ma odongo mabor, ki yat matidi amiyo doko yat madit ma odongo mabor, dok bene amiyo yat madyak two woko, ka amiyo yat ma otwo pote lot ci luk mada.

An Rwot dong atyeko loko lok man, dok bene abitiyo gin ma onongo dong awaco.”