Ejekiel 16

Jerucalem taun ma pe gene

1Rwot doki oloko kweda. 2En owaco ni, “Mii Jerucalem onen gin me kwer ducu ma en otimo. 3Tit ki Jerucalem gin ma Rwot Lubanga Matwero ducu tye kawacone bote ni:

In yam kinywali i lobo pa jo Kanaan; woru obedo jo Amor, ki meni obedo anyira Kit. 4Dong kit macalo kinywali kwede ene aye ni, inino ma kinywali iye kikome tol peni bene pe kingolo, ki komi bene pe kilwoko ki pii wek komi obed maleng, dok pe kiwiro kado ikomi, ci pe bene kiboyi woko ki bongo. 5Ngat mo ma kono obedo ki kica ma oromo ikomi obedo peke, onyo me tiyo gin macalo magi ducu ikomi. Ikare ma kinywali dano gubedo ki mar manok tutwal ikomi ma omiyo guboli woko idye bar kamaleng.

6Ikare ma akato ki kangeti, ci aneni ibedo kakwite i remo ma kinywali kwede, ci awaco ki in ma onongo pud itye i remoni ni, ‘Bed kwo, 7ci idongo malo giri ma komi yot calo ginapita ma i poto.’ Ci idongo ipute nyako mabor wa malo idongo calo yat manyak madit ma kome opire maber. Tununi opong maber, ki yer wii bene olot maboco, ento onongo itye munero labongo bongo mo ikomi.

8Ka doki akato ki kangeti ci aneni anongo ni mwakani dong oromo me mito co; ci ayaro bongo ma onongo atye kwede woko ikomi, omiyo pe dong ibedo munero. Ada, aketo gicike me nyom kwedi, ci in dong idoko mera. Acike mada ni abimari.” Man an Rwot Lubanga Matwero ducu ma awaco.

9“Ci akwanyo pii alwoko remo woko ki ikomi, ka dong awiro komi woko ki moo. 10Aruki woko ki bongo mabor ma kideyo maber, ci dok amini war ma dele ber makato ducu, ki bongo camanini me boyo wii ki bongo aridi me umi. 11Dok aruki bene ki ruk me deyo, ci arwako ogul i cingi, kun arwako nyor bene i nguti. 12Dok arwako agit um bene i umi, ka arwako agit me it i iti ryoryo ducu, ka dong arwako lalukana maber mada iwii. 13Onongo yam kiruki ki ruk ma obedo jabu ki ryal, ginarukani onongo obedo bongo camanini mabecone, ki bongo aridi ki bongo ma kideyo maber. Ibedo kacamo kwon ma mokone pwot mada, ki moo kic kacel ki moo jeituni. Ci idongo ma inen mwonya mada, ci idoko daker. 14Ci beri oywek mada i rok ducu. Onongo ibedo mwonya maber mada pi deyo ma aketo ikomi, pien aketi ma inen mwonya mada.” Man an Rwot Lubanga Matwero ducu ma awaco.

15“Ento in giri ibedo ka geno beri ki ywekani, ci ibedo katimo abor ki jo ducu ma gikato ki kama in itye iye. 16Ikwanyo bongini mogo ci iyubu odi jogi ci ideyo komgi woko maber, ka dong imiyo komi woko bot jo ducu i tim me abor calo malaya. Kit tim macalo man pud pe onen, dok bene pe dong binen matwal. 17Dok bene ikwanyo jami me wel me jabu ki ryal mayam amiyo boti, ci itiyo cal dano ma laco ka dong icako timo abor kwedgi. 18Ikwanyo bongini ma kideyo maberi iumu ki kom cal danogu, ci ityero moona woko ki odok ecetana botgi. 19Yam amini cam, amiyo icamo kwon ma mokone pwot adada, moo jeituni kacel ki moo kic, ento in dok ityero woko bot cal jogi macalo gin ma ngwece kur ma yomo cwinygi.” Man an Rwot Lubanga Matwero ducu ma awaco.

20“Lacen dok ikwanyo awobeni ki anyirani mayam inywalogi kweda, ci ityerogi woko bot cal jogi me bedo gitum awanga. In itamo ni tim me abor ma itimo obedo lok matidi mo ki tung bota 21ma omiyo ineko lutinona ci ityerogi woko bot cal jogigu me bedo gitum awangani? 22Ikom tim me kweri ducu ki tim abori ducu ma itimo wii pe opo ikom kare me tinoni, en aye kare ma onongo itye munero ma ginaruka mo pe ikomi, ma onongo itye kakwite iremo ma kinywali kwedeni.”

Jerucalem kwo calo malaya

23Rwot Lubanga Matwero ducu owaco ni, “Can iwii! Can iwii! Lacen ma dong ityeko timo tim maracu, 24ci igero kicika piri keni, ka igero dok kabedo ma otinge malo me woro cal jogi inget yoo ducu.” 25I agiki yoo ducu igero iye kabedo ma otinge malo ka dong icako nyutu beri kunu calo malaya. Ci imiyo jo ducu ma gikato ki kenyo gibutu kwedi, ma imiyo tim me malayani onya omede tutwal. 26Dok bene iweko luwoti ma gin lutarwang ma gin jo Ejipt, gutimo abor kwedi, kun ingeto ki cwinya ni wek kiniga omaka, ci imiyo timi me abori onya omede.

27Nen, kombedi dong aryeyo cinga woko ikomi me keto can, ki dok me kwanyo dul me gum ma onongo yam apoko botini woko. Dong atyeko miyi woko i cing lukwori jo Piliciti, ma gidagi tutwal ma lewic bene makogi mada pi timi me abor ma ibedo katimoneni.

28Dok bene itimo abor ki jo Aciria, pien onongo abor ma itimo ki jo mukeneni pe oromi. Idoko malayagi, ento man ducu mwa, dok gin ma gutimo ikomi bene pud pe oromi. 29Imede giri ki tim abori ci itimo abor bene ki lucatwil ma i lobo pa jo Kaldaya, ento kadi bed gubutu kwedi ci gin ma gutimo ikomi bene pud pe oromi.

30Man aye gin ma an Rwot Lubanga Matwero ducu atye kawacone ni, “Cwinyi dong odoko goro woko ki mar, aneno itimo gin magi ducu calo malaya ma lewic pe mako. 31Igero kicika i agiki yoo ducu ka dok igero kabedo ma otinge malo inget yoo ducu. Ento in onongo pe ibedo calo malaya, pien onongo pe itimo abor pi nongo lim. 32Ibedo calo dako ma timo abor ki lurok ma gin welo ma ka maro cware. 33Co aye ma gimiyo mot bot mon ma malaya, ento in aye doki imiyo mot bot co ma gimarini, kun iwilogi ki lim i mung ni gua ki i kabedo ducu gubin gubut kwedi. 34In dok ibedo malaya ma kite pat mada ki kit mon mukene ma gin malayagu. Ngat mo ma onongo odiyo in me bedo malaya pe. Pe giculu gin mo boti, ento in aye dok iculu co ma onongo gimarini. Pimeno, in giri kiti pat.”

Kop ma Lubanga ogolo ikom Jerucalem

35Pimeno dong, in malaya ni, winy lok ma an Rwot atye kawacone. 36Man aye gin ma Rwot Lubanga Matwero ducu owaco ikom in ni, “Ilunyu bongini woko ki ikomi ci imiyo co ma imarogini gubutu kwedi, ci dok ineko lutinoni bene ci ityerogi woko bot cal jogi me bedo gitum. 37Dong pi lok man omiyo abicoko jo ducu mayam gimari, mayam ibedo kwedgi ki yomcwiny, jo ducu ma onongo imarogi ki jo ducu ma onongo idaggi. Abicokogi ki i kabedo ducu ci amiyo gicung girumi woko dyere, ka dong alunyu bongo woko ki ikomi idong munero, wek guneni nongo dong itye munero. 38Dok abingolokop ikomi calo angolokop ikom mon ma giketo nyom woko kun bene gineko dano. Ci abingolokop ikomi ki akemo ki nyeko madit ma omiyo ito woko. 39Ci abimiyo ibedo ite twero pa co ma gimaro in, ci gibicoro kicikani gireto woko piny, dok bene kibimuku kabedo ma otinge malo ma igero me woro cal jogini woko. Gibilunyu bongo woko ki ikomi ci gikwanyo jami me welgu woko ki boti, ka dong giweki idong munero labongo bongo mo ikomi.

40Dok gibikelo dul mony ka lweny ikomi, gibiceli ki got ci gingoli gingidi woko matinotino ki pala lucwan gi. 41Ci gibiwango odinigu woko ducu, dok bene gibicobo kop ma angolo ikomi ki inyim mon mapol. Ci abijuki woko wek pe dong ibedo malaya, ka dong abimiyo igiko miyo mot bot co ma gimarini woko matwal. 42Abitoyo akemona woko ikomi kitmeno, ci nyeko ma onongo atye kwede bene dong bia woko ki ikomi. Ci abibedo dong mamwol, kiniga bene pe dong bimaka ikomi matwal. 43Onongo wii owil woko ma pe ipo kit macalo abedo katimi kwede ikare ma onongo in pud itidi, dong imiyo kiniga omaka pi gin magi ducu ma itimoni. Pimeno, abiculu kwor ikomi ki gin ma itimo. Pingo itimo tim me tarwang imedo ki tim me kwergu ducu?” Man an Rwot Lubanga Matwero ducu ma awaco.

Mego ki nyare ma gitye ki lakit kwo acel

44Rwot owaco kitman ni, “Jerucalem, nen dano ducu ma loko ki carolok gibiloko carolok ikomi ni, ‘Nyako cal ki mine.’ 45In giri i nya pa meni kikome. En okwero cware ki lutinone woko. Inen calo lumegini ma gukwero coggi ki lutinogini. Meni yam Lakit ki woru mere onongo en Laamor. 46Lameru ma okwongo nyimi en aye Camaria, matye tung kumalo ki gangine. Lameru matidine matye ki gangine tung kupiny en aye Codom. 47In yam pe ibedo kalubu kitgi keken, kadi ki timo kit gin me kwergu bene macalo gin, ento pi kare manok mo keken in kiti ocako bale woko marac makato kitgi ikit yo ducu.

48Dong kit macalo an atye kwoni, man an Rwot Lubanga ma awaco, lameru Codom ki gangi ma ingete pe gutimo kit gin maracu ma in kacel ki gangini wutimoni. 49Nen, man aye obedo bal pa lameru Codom. En kacel ki anyirane gubedo luwake mada, pien onongo gitye ki cam madwong ma gicamo, ci camone oloyogi kun gibedo mot ki kuc, ento pe gumiyo kit kony mo bot lucan ki jo ma piny obwoyogi. 50Onongo gubedo jo ma lulyere ma okato kare, ci gutimo gin me kwer mapol inyima; pimeno, ikare ma aneno gin ma gutimo, ci atyekogi woko.

51Ci Camaria pe otimo kit tim me bal maromo nucu bal ma in dong itimo. Itimo gin me kwer mapol makato gin me kwer ma en otimo. Dok bene imiyo lumegini ginen calo jo ma kitgi atir ka kiporogi kwedi, ki kit gin me kwer ducu ma dong ityeko timogini. 52Dong kombedi, in myero icir lewic. Bali dong rac atikatika makato bal pa lumegini ducu ma omiyo ginen calo jo ma gipeke ki bal mo ni. Gin lokgi tye atir ma okato loki. Kitmeno in bene myero lewic omaki, dok myero icir cac ma kicayi kwede pien imiyo lumegini ginen calo jo ma kitgi atir.”

Rwot bidwoko gum pa Codom ki Camaria

53Rwot otito lok man bot Jerucalem ni, “Abidwoko gumi boti, ki gum pa Codom ki gangi ma ingete, ki gum pa Camaria ki gangi ma ingete. Abidwoko lonyoni bene boti. 54Lewic bimaki ikomi kekeni, dok bene cac ma kibicayi kwede bikweyo cwiny lumegini ni, gin kara gitye maber ada. 55Gibibedo maber ki lonyo doki, ci in bene kacel ki gangi ma ingeti ducu wubibedo maber kit mayam con. 56Itamoni ikare ca ma iwakeni onongo pe ibedo kabolo ongon ki nying lameru Codom macalo i lok abokani kun ipong ki awaka ki cac, 57ikare ma timi maracu pud peya onen kamalengi? Kombedi dong iloke idoko calo en, ginacaya pa jo Edom ki luwotgi ducu, ki pa jo Piliciti, ki pa jo ma gibedo cokcok ma gurumi kun gidagini. 58Ci dong ibiciro can malit pi bali ma itimo me lewic ki gin me kwer mapol ma itimo.” Man an Rwot ma awaco.

Gicike ma bedo nakanaka

59Ci Rwot Lubanga Matwero ducu owaco ni, “Abitimi ma oporo gin mayam itimo, pien icayo kwong meri dok bene ituru gicikeni woko. 60Ento pud abipo ikom gicikena ma aketo kwedi cake ikare me tinoni. Ci dong abiketo gicikena kwedi ma bedo rii nakanaka. 61Ibipo kit macalo ibedo kwede ducu, ci lewic bimaki ka akwanyo lameru madit ki lameru matidi adwokogi cen boti. Ci abimiyo dong gibedo macalo anyirani, ento pe pi gicike macon ma aketo kwedini. 62Dok abimoko gicikena kwedi, ci ibingeyoni an aye a Rwot. 63Ikare ma abiweko ki bal ducu mayam itiyo, ci ibipo ikomgi ci lewic bimaki matek mada ma pe dong bene ibingamo dogi kalok.” Man an Rwot Lubanga Matwero ducu ma awaco.