Ejekiel 15

Carolok ikom olok

1Rwot dok oloko kweda. 2En owaco ni, “Wod pa dano, kitwero poro yat olok ki yat mukene ningning? Dong yat olok ma kiporo ki yat matye i bungani bere rom mene? 3Itwero tongo yate itiyo ki gin mo? Dano twero tongo ci kipayo doko teke ci kiguro ikor ot me ngabo jami? 4Yate ber mere me moko mac keken. Ka mac dong owango doge ryoryo ducu ma dong oweko bilo idyere, ci pud dok itwero kwanyone itiyo ki gin mo? 5Nen, ma yat meno pud pe owang woko onongo konye dong peke. Dong kit macalo mac owango wokoni kun oweko bilo bene idyere, ci konye dong bibedo peke marom mene, tika dok kitwero kwanyone kitiyo ki gin mo?

6Man aye gin ma an Rwot Lubanga atye kawacone ni: kit macalo yat olok kikwanyo ki ikin yadi me bunga ci wang wokoni, kitmeno bene abikwanyo jo ma gibedo i Jerucalem ci abitimogi i yo acelu. 7Abiciko wanga ikomgi, kadi bed gubwot ki i mac, ci mac pud biwangogi; man miyo wungeyo ni an aye a Rwot, ka dong aciko wanga ikomgi. 8Abimiyo lobo dong doko tim ata, pien jona pe gubedo lugen gubwoto tic bota, man an Rwot Lubanga Matwero ducu aye awaco.”