Ejekiel 14

Lubanga ongolo kop ikom jo ma woro cal jogi

1Jo mogo ikin ludongo pa jo Icrael gubino bota ci gubedo piny inyima. 2Cutcut Rwot oloko kweda. 3En owaco ni, “Wod pa dano, jo magi dong gitye ki cwiny me woro cal jogi dok gimiyo cal jogi magi ngakogi terogi woko katimo bal. Tika gitamo ni abimiyogi lagam ma gitye kamitoneni?

4Kombedi dong lok kwedgi ci itit botgi ni Rwot Lubanga owaco kuman ni, ‘Laicrael mo matye ki cwiny me woro cal jogi dok ma bimiyo cal jogi magi ngako en tere katimo bal, ka obino bot lanebi ni okonye, ci an Rwot kikoma aye abimiye lagam. Lagam ma abimiyo bibedo lagam ma okemo lwak cal jogine ma en otiyogu. 5Cal jogi magi ducu dong oloko cwiny jo Icrael woko ki ikoma, ento ageno ni ki lagam man ma abimiyo botgi abidwoko cwinygi cen ikoma miyo dong giwora.’

6Kombedi dong itit bot jo Icrael gin ma an Rwot Lubanga Matwero ducu atye kawacone ni: wungut wudwog cen bota wuwek woro cal jogiwuni. Dok bene wuloke wuwek timo gin me kwer ducu mayam wubedo katimogini.

7Ka inen dano mo ki ikin Luicrael nyo dano mo ki ikin lurok ma gibedo ikin jo Icrael ce oloke obwota woko kun dong tye ki cwiny me woro cal jogi, ka cal jogine ongake otere katimo bal, ka obino bot lanebi ni okonye, ci an Rwot kikoma aye abimiye lagam. 8Abikwero kit timenu woko, abimiyo en doko lanen ma bigengogi me lubu kit tim meno ci abikwanye woko ki ikin jona. Dok man bimiyo wungeyo ni an aye a Rwot.

9Kace inen kibwolo lanebi mo ci en omiyo lagam gobagoba, meno nongo an Rwot aye ma abwole. Ci abiryeyo cinga ikom lanebi meno, aneko woko ki ikin jona jo Icrael. 10Dong lanebi kacel ki ngat ma bino ka nongo kony ki boteni ducu gibilimo lakit can acelu. 11Abitimo man wek jo Icrael pe gungak gubwota woko, wek bene pe gubal komgi ki balgi ducu ma gitimo. Ento amito ni gin gubed jona ki an bene abed Lubangagi.” Man Rwot Lubanga ma owaco.

Nua, Daniel ki Yubu

12Rwot oloko kweda. 13En owaco ni, “Wod pa dano, kace inen dano ma i lobo timo bal ikoma ma gituru cika kun bene pe gigena, abiryeyo cinga ci ajwiko wit cam woko ki iye. Abicwalo kec neko dano ma gibedo iye kacel wa ki lee ducu. 14Kadi bed jo adeki, Nua, Daniel ki Yubu onongo gibedo kunu, kitgi ma atiri gire kono onongo olaro kwogi gin ken gi, man Rwot Lubanga aye ma owaco.

15Nyo ka acwalo lee tim me neko dano woko ducu ki i lobo meno, ci gibimiyo lobo dong ma obale woko, doko marac ma ngat mo dong pe twero ngolo dyere kato ki iye, 16kadi bed nene jo adeki gubed kunu, kit macalo An a Rwot Lubanga atye ma kwoni, kono onongo pe gin otwero laro kadi wa lutinogi kikomgi. Onongo gitwero laro kwogi keken gigi, ento nongo lobo dong oloke doko tim ata.

17Nyo kace akelo lweny ikom lobo meno kun acwalo jami lweny maracu wek kinek ki dano kacel ki lee woko ducu, 18kadi bed onongo jo adeki, Nua, Daniel ki Yubu gibedo kunu, macalo an Rwot Lubanga Matwero ducu atye makwoni, onongo pe gitwero laro kadi wa lutinogi kono komgi keken.

19Kace acwalo two gemo i lobo meno, ma aonyo akemona kun dok arwenyo kwo pa jo mapol, ma aneko dano kacel ki lee me tim, 20kadi bed onongo Nua, Daniel ki Yubu gibedo kunu, akwonge ni, onongo pe gitwero laro kadi wa lutinogi. Onongo kitgi ma atir aye gire bilaro kwogi gin ken gi. Man Rwot Lubanga ma owaco. 211

Man aye gin ma Rwot Lubanga Matwero ducu tye kawacone ni: Atye ki can angwen ma abicwalo ikom Jerucalem, lweny, kec, lee timgu ki two gemo, wek onek dano woko ducu kacel ki lee ducu. 22Kace inen ngat mo obwot ma obedo kwo ce olaro bene lutinone, ka gubino botwu myero wunen gi. Miyo wubingeyo kitgi ki kit gin ma gitimo ducu marac, man miyo wubiye ni can ma aketo ikom Jerucalem tye kakare. 23Dok wubiye ka wuneno kitgi ki gin ma gitiyo kit ma rac kwede; ci bimiyo wungeyo ni onongo tyen lok ma atir aye omiyo atimo gin ma dong atyeko timoneni, man Rwot Lubanga ma owaco.”