Ejekiel 13

Lok pa Rwot ikom lunebi ma co ma lugoba

1Rwot oloko kweda. 2En owaco ni, “Wod pa dano, tit lok me nebi marac ikom lunebi me Icrael ma gitito lok ma gitamo atama ki wigi, tit botgi ni, ‘Wuwiny lok pa Rwot!’

3Man aye gin ma an Rwot Lubanga Matwero ducu atye kawaco ni: can iwi lunebi ma lumingi! Gin gilubu mere tam ma gitamo atama ki i cwinygi kun nongo pe guneno ginanyuta mo. 4Wun jo Icrael, lunebiwu konygi peke macalo too ma gibedo iwi obur matye i taunwu madito. 5Dok bene pe gigwoko kabedo kama kimuku cel woko ki iyeni, kadi bene pe gimito gero cel odoco; ma omiyo jo Icrael pe bicung ka lweny obino inino pa Rwot. 6Ginanyutagi ducu ma guneno obedo mere goba. Gityeto bene lok me goba. Ci giwaco ni, ‘Man lok pa Rwot’, ento an gira pe aorogi. Dok mitigi tye ni myero acob lokgi ma gutamoni kakare. 7Ci awaco botgi ni ginanyuta magi ducu ma wuneno obedo me goba, ki lok ma wutyetogu ducu obedo lok me goba keken. Kun wuwaco bene ni lok magi ducu loka, ento an gira pe aloko kwedwu.

8Ma omiyo an Rwot Lubanga Matwero ducu atye kawaco botgi kuman ni: lokwu ducu obedo me bwolo ki ginanyuta ma wunenogu goba keken. Pimeno, atye ki lok ikomwu. 9Abimiyowu pwod, wun lunebi ma wuneno ginanyuta me bwologu, dok bene wutyeto lok goba keken. Pe wubibedo tye i kacoke pa jona ma gucoke, kadi wa nyingwu bene pe kibicoyo kacel ki nying jo Icrael mukenegu; ki dok bene pe wubidok i lobowu matwal. Ci wubingeyo ni an aye a Rwot Lubanga. 101

Lunebi magi gumiyo jona gungak woko kun giwaco ni, ‘Kuc tye,’ ento nongo kuc mo peke. Ma omiyo jona gibino gigero cel ci lunebini gibino gipuyu kome woko ki rangi matar me puyu kor ot. 11Wac bot jo matye kapuyune ki rangi matari ni cel bipoto woko piny. Kot macore acora bicwer matek, ki pee madwong bicore piny ikome, ki yamo lapiru matek bikodo ikom cel meno. 12Ci cel bimuk poto woko piny, man bimiyo dano ducu gibipenyowu gin maber ma wunongo pi puyu kom cel ki rangi matari.”

13Pimeno an Rwot Lubanga atye kawaco kuman ni, “Abicwalo yamo makodo matek, ki kot macore acora bicwer, ki pee madwong bicore piny pi akemona ki kinigana, ma bimuku cel meno woko. 14Ci abimuku cel meno ma wupuyu kome ki rangi matari areto woko piny i ngom, ci dok aweko te gutine dong nono. Ka celi bipoto ci binekowu woko ducu. Man bimiyo wun ducu wungeyo ni an aye a Rwot.

15Meno aye kit ma abitoyo kwede akemona ikom cel ki ikom jo ma gupuyu cel ki rangi matari. Ci abiwaco botwu ni, ‘Cel dong pe matwal, kadi ki jo ma gupuyu kome ki rangi matari bene dong gipeke, 16kadi lunebi ma gubedo katito lok ma okemo Jerucalem ni kuc tye iye, kun kuc onongo pekeni, bene dong gipeke.’” Man Rwot Lubanga aye ma owaco.

Lok me nebi marac ma kitito ikom lunebi ma mon ma lugoba

17Rwot owaco ni, “Kombedi in wod pa dano, nen mon ma gitye ikin lutuwu ma gitito lok ma gin aye otamo atama ki i cwinygi. Juk gin ma gitye katitoneni woko, 18kun itito botgi gin ma an Rwot Lubanga Matwero ducu atye kawaco botgi ni:

Can iwiwu wun mon ma wukwoyo lwit wutweyo ingut cing dano, dok bene wukwoyo bongo laum wic ma wuboyo iye lwit pi dano ducu kun wulubu kit bor pa ngat acel acel, wutimo man ni wek gubed ki twero me rwenyo kwo pa dano woko! Wumito tic ki twero me kwo ki me to ikom jona wek wunong giwu iye magoba ma cwinywu mito. 19Dong wutyeko pyeda woko wa ikin jona pi cayiri maromo pong cingwu keken, ki pi kwon mogo matinotino, kun wuneko dano ma onongo myero pe guto, ento wubwoto dano ma onongo myero guto aye gibedo kwo, pi gobawu ma wuloko bot jona, ma guwinyo lok gobawuni.

20Man aye gin ma an Rwot Lubanga Matwero ducu atye kawacone botwu ni: Adag lwit ma wukwoyo i komwu me bedo ki twero ikom dano me kwo ki me to. Abicodo lwit menogu woko ki ingut cingwu ci abimiyo dano ma onongo wutye ki twero me loyo kwogini gibwot, gin jo ma wubedo ka dwarogi calo wudwaro winyo. 21Abiyeco bongo laum wiwu woko bene, ci alaro jona woko ki icingwu, pe dong gibibedo ite twerowu matwal. Man bimiyo wungeyo ni an aye a Rwot.

22Wun dong wubalo cwiny jona ma kitgi atir woko ki lok me bwolo, kadi bed onongo an ceng pe abalo cwinygi, ento wun wucuku cwiny jo ma gin lutim maracu, wek pe guloke ki i yo me timgi maracu gular kwogi. 23Pimeno, pe dong wubineno ginanyuta me gobagoba matwal, dok bene pe wubityeto tyet. Abilaro jona woko ki icingwu. Man bimiyo wungeyo ni an aye a Rwot.”