Ejekiel 12

Lanebi Ejekiel odoko macalo lanyut me opii

1Rwot oloko kweda. 21En owaca ni, “Wod pa dano, in itye kabedo ikin jo ma lujemo. Wanggi tye, ento pe gineno gin mo. Itgi bene tye, ento pe giwinyo lok mo, 3pien gin jo ma lujemo.

Dong kombedi, in wod pa dano, yube kun itweyo yeci macalo laring ayela, ci icak wot me cito i opii ki inyimgi ki i dyeceng. Wek gin ducu guneni ka icako wot me cito i kabedo mukene. Gwok nyo gin jo ma lujemoni gibiniang ikom gin ma itimo. 4Twe yeci woko ki i dyeceng macalo laring ayela ma tweyo yece kun gin bene gineno, wek guneni ka dong iwoto icito ki otyeno calo dong icito woko i opii. 5Tuc kor cel ma gin bene gineno, ci idony ki iye ikat icit woko. 6Ci ibitingo yeci ki inyimgi ma gin gineno, nongo iketo iwi gwoki, kun icito kwede woko i colpiny ma nongo iboyo wangi woko, wek pe inen lobo kama icito iye. Dong atyeko keto in me bedo lanyut bot jo Icrael.”

7Ci atiyo gin ducu ma Rwot nene ocika ni atii. Akwanyo yeca akelo woko ki i dyeceng, calo yec pa laring ayela; ka dong piny odoko otyeno anga makatoni ci atucu kor cel ki cinga. Ci akwanyo yeca ma atweyoni atingo iwi gwoka ma kun gin bene gineno, ci acito woko i colpiny.

8Ci orwone ki odiko Rwot dok oloko kweda. 9En owaca ni, “Wod pa dano, kombedi Luicrael ma gin lujemoni gitye kapenyi ni in itye katimo gin ango. 10Tit botgi gin ma An a Rwot Lubanga Matwero ducu atye kaloko botgi. Lok man ma pire teki okemo laker matye kaloc i Jerucalem ki jo Icrael ducu ma gibedo kunu. 11Tit botgi ni gin madong itimoni tye macalo lanyut me gin ma bitime ikomgi; kibiterogi woko i opii i lobo mukene. 12Dong laker ma loyogini bitingo yece iwi gwoke i colpiny ci bilwi donyo ki iwang cel ma kitucu ikom celi kato kwede woko gire. En biboyo wange woko, wek pe enen lobo kama ecito iye. 13Ento 2abiciko obwona pire, ci en bibino moko i owicca. Ka dong abikwanye atere woko wa i lobo Babilon, ma en lobo pa jo Kaldaya, en bito ki kunu ma nongo pe oneno lobonu. 14Abikeyo jo ducu ma onongo gurume woko dyereni, lumiine tam, ki jo magwoko en i yo ducu mapatpat; lukworgi biyenyogi mada wek kinekgi woko ki pala lucwan.

15Ka akeyogi woko ikin rok mukeneni i lobo pa lurok, ci dong gibingeyo ni an aye a Rwot. 16Ento abiweko jo manok ki ikin gi bwot ki i dog lweny, ki ikec ki itwo gemogu ma pe ginekogi, wek guniang maber ki ikin lurok kunu, ci gutuc gin me kwer ducu mayam gutimoni, wek dong gunge atir ni an aye a Rwot.”

Lanyut pa lanebi ma kome myel

17Rwot dok omede ki lok kweda 18kun owaco ni, “Wod pa dano, wek komi omyel ka itye kacam, wek komi bene obed kamyel ki lworo ka itye kamato pii. 19Tit bot wegi lobo meno ni man aye lok pa Rwot Lubanga Matwero ducu ma okemo jo Jerucalem ma pud gibedo i lobogi. Gibicamo cam ki lworo ma nongo komgi myel, ci dok bene gibimato pii ma nongo komgi ryange, ki cwinygi bene nongo obale woko. Ci kibiyako jami ducu matye i lobogi miyo lobogi dong nono, pien jo ducu ma gibedo iye lutim bwami keken. 20Taun gi madito ducu ma dano gibedo iye kibijwero woko dong obur, ci lobo meno dong bidoko tim ata. Man bimiyo wungeyo ni an aye a Rwot.”

Carolok ma dano gungiyo kwede ki lok ma dano pe mito winyone

21Rwot oloko kweda. 22En owaco bota ni, “Wod pa dano, pingo jo Icrael gimaro bolo carolok man ni, ‘Kare tye kakato, ento pingo ginanyuta ma lunebi gineno iwang leki ducu loke pe cobe kakare?’ 23Kombedi dong itit botgi gin ma an Rwot Lubanga Matwero ducu amito wacone pi lok man. Abigiko tic ki carolok meno woko. Pe dok kibibedo katic kwede i Icrael matwal. Ento tit botgi ni, ‘Kare dong oo, ki ginanyuta ducu dong bicobe kakare.’”

24Ento wac botgi ni, “Ginanyuta me gobagoba ki lok me tyet bwolobwolo ma ngako dano dong bibedo peke matwal ikin jo Icrael. 25An Rwot, dong abiloko botgi, ci gin ma awaco bitime, lok man pe dok bigale. Abitimo gin ma acikowu ni abitimoni ikare me kwowu, wun jo ma lujemoni. Man an Rwot Lubanga Matwero ducu ma awaco.”

26Rwot dok oloko kweda, 27kun waco ni, “Wod pa dano, jo Icrael giwaco ni ginanyuta ma inenoni ki lok ma ititoni tye pi kare me anyim ma pud tye bor.

28Pimeno tit botgi gin ma an Rwot Lubanga Matwero ducu atye kawacone ni, ‘Lok man pe dok bigale. Gin ma awaconi bitime.’ An Rwot Lubanga Matwero ducu dong aloko.”