Ejekiel 11

Lubanga ojuku rwodi ma gin lutim maracu

1Cwiny pa Lubanga otinga malo, ci otera wa i dogola matye tung kunyango me Ot pa Rwot. Dong ikare ma atye kunu kama cok ki dogola ci aneno jo pyere aryo wiye abic, ma onongo ikin gi tye iye Jajania, wod pa Ajur, ki Pelatia wod pa Benaya, ma onongo gin rwodi ma giloyo lwak.

2Ci Lubanga owaca ni, “Wod pa dano, magi gin aye lutim maracu ma gitye kayubu lok me timo gin marac i taun madit man. 3Gin giwaco ni, ‘Kare pud bor me gero iye odi. Taun madit man obedo calo agulu me tedo, wan wabedo calo ringo matye i iye.’ 4Pimeno, wod pa dano, tit lok me nebi marac ikomgi.”

5Cwiny pa Rwot dok obino opoto ikoma, ci Rwot owaco bota ni atit lok man bot lwak ni: “Wun jo Icrael, angeyo gin ma wutye katamone, ki gin ma wutye kayubune ki i tamwu. 6Wun dong wutyeko neko jo mapol i taun madit kany. Ma omiyo yoo ma i taun madit man ducu opong ki kom dano ma oto keken.

7Ma omiyo an Rwot Lubanga Matwero ducu awaco botwu ni: taun madit man bidoko agulu me tedo, ento kom jo ma oto ma wunekogi ka wupyelogi idye taun madit gin aye ringo me ateda. Ento wun kibikwanyowu woko ki idye taun madit! 8Yam wubedo kalworo pala lucwan ce; ento dong abikelo dano ma gitye ki pala lucwan gilwenyo ikomwu. 9Abikwanyowu ki idye taun madit man akelowu woko, ci abimiyowu i cing lurok. Dong atyeko ngolo kop me to iwiwu. 10Kibinekowu woko i lweny ki pala lucwan i lobowu kikome. Man bimiyo wungeyo ni an aye a Rwot. 11Taun madit man pe bibedo agulu me tedowu ki wun bene pe wubibedo calo ringo matye i agulu. Abiketo can i komwu ki i kabedo ducu ma wubedo iye ki i lobo Icrael. 12Man bimiyo wungeyo ni an aye a Rwot, ki cik ma wuturuni meno obedo cika, ki gin ma kiciko ni wutiini, ma pe wutiyoni, onongo an gire aye ma aciko, ento wubedo mere kalubu mewu cik pa lurok ma gurumuwu.”

13I karenu ma atye katito lok, cutcut Pelatiya wod pa Benaya opoto ci oto woko. Ci apoto bene piny aryeba ic kun akok ki dwon malongo ni, “Ai do, Rwot Lubanga Matwero ducu! Ibineko jo ma onongo gudong i Icraeli woko ducu?”

Gicike pa Lubanga bot jo ma onongo gitye i opii

14Rwot oloko kweda kun waco ni, 15“Wod pa dano, jo ma gibedo i Jerucalem gitye kalok piri kadi wa Luicrael wadiwu bene ma kiterogi i opii. Gin giwaco ni, ‘Opii dong gitye kamabor ma pe gitwero woro Rwot. En omiyowa lobo man ni wacam obed mewa.’ 16Kombedi dong itit lok ma atye kawaconeni bot opii wadiwu. An Rwot Lubanga Matwero ducu aye ceng acwalogi me cito kabedo i lobo pa lurok matye kamabor, ci akeyogi woko i lobo mukeneni ducu. Dong aye ni guwora i lobo kama gucito iye ci an abibedo tye ikin gi, ento man bibedo pi tutunu.

17Pimeno tit botgi gin ma an Rwot Lubanga Matwero ducu atye kawacone ni: abicokogi woko ki i lobo kama yam akeyogi gucito iye, ci abimiyogi lobo Icrael adwoko cen botgi. 18Ka gudwogo cen ki i lobo kunu, ci gibijwero gin ducu ma obedo me cilo, ki gin me kwergu ducu. 191Abimiyogi cwiny acel dok abiketo cwiny manyen i igi; kun bene abikwanyo cwiny me dingoni ma obedo calo gotti woko ki ikomgi, ci abimiyogi cwiny me bedo luwiny. 20Dong man bimiyo gibigwoko cika dok bene gibibedo lugen kun giwinyo loka ducu ki gin ma an acikogi kwede ducu. Ci gibibedo jona, ki an bene abibedo Lubangagi. 21Ento abiketo can ikom jo ducu ma giworo gin ducu ma obedo cilo ki gin me kwergu. Ci abiculu kwor ikomgi kun poro gin ducu mayam gin gutiyo, man an Rwot Lubanga Matwero ducu aye ma awaco.”

Deyo pa Lubanga oa woko ki i Jerucalem

222

Lukerubi gucako tuk me cito malo, ci lawala bene gucito kacel kwedgi. Deyo pa Lubanga pa Icrael onongo tye ka wigi. 23Ci deyo pa Lubanga oa woko ki i taun madit man, ci ocito ocung iwi got matye tung kunyango me taun madit. 24Ci Cwiny pa Rwot otinga woko i ginanyuta, ci okela odwoka woko cen bot jowa matye i opii i lobo Kaldaya. Ci lacen ginanyuta meno ma onongo anenoni ocako rwenyo woko ki bota, 25ci dong atito gin ducu ma Rwot onyuta bot jo ma onongo gitye i opii.