Nwoyo Cik 34

To pa Moses

1Moses oa ki i lobo aroo me Moab, ocito iwi got Nebo, oito wa iwi lacol me got Piciga ma okemo Jeriko, ci Rwot onyute lobo ducu. Onyute lobo Gilead ducu nio kwede wa i Dan, 2ki lobo Naputali ducu, ki lobo pa jo Epraim ki Manace, ki lobo Juda ducu nio kwede wa tung kupotoceng me Nam Mediterranean, 3ki Negeb kacel ki lobo barbar, ma en aye nota me Jeriko, ma en aye taun madit me yadi otit, nio kwede wa i Joar. 41Rwot owaco bot Moses ni, “Man aye lobo mayam akwongo pire bot Abraim ki Icaka ki Yakobo, ni abimiyone bot likwayogi. Dong aweko in ineno lobone ki wangi, ento pe ibikato loka ca.”

5Moses latic pa Rwot oto kitmeno ki i lobo Moab, kit mayam Rwot owaconi. 6Ci Rwot oyike kunu i nota ma i lobo Moab ma okemo Bet-peor; ento pe tye dano mo ma ongeyo kabedo ma Rwot oyike iye nio wa onyo. 7Moses onongo mwaka me dite romo miya acel ki pyere aryo ka oto. Onongo wange peya ocor, ki kome bene onongo pud tek. 8Jo Icrael gukoko Moses ki i lobo aroo me Moab pi nino pyere adek, ci dong kare me koko ki kumu pi Moses otum woko.

9Yocwa wod pa Nun yam opong ki cwiny me ryeko, pien onongo yam Moses oketo cinge ikome; ma omiyo jo Icrael gubedo ka woro doge, kun gilubu kit mayam Rwot ociko ki Moses. 102Lanebi mo mukene pe dok onen macalo Moses, mayam Rwot loko kwede wang ki wang. 11Pe tye ngat mo marom kwede ma obedo katiyo lwak lanyut ki tango ducu ma Rwot ocwale kwede i lobo Ejipt, ma otiyo ikom Parao ki lutice ducu ki lobone ducu. 12Pe tye lanebi mo mukene ma obedo ki twer madwong marom ki mere pi tiyo kit tic madito ki makelo lworo madwong kit mayam Moses obedo katiyone ki inyim jo Icrael ducu.