Nwoyo Cik 33

Moses olamo gum ikom kaka pa jo Icrael

1Man aye lamo gum pa Moses ma dano pa Lubangani, mayam olamo ikom likwayo pa Icrael ma onongo peya oto.

2En owaco ni,

“Rwot yam obino oa ki iwi got Cinai,

ci otuc ki i Ceir wa ikomwa cut, kun ryeny ki iwi got Paran.

Obino ma oa ki ikin jo maleng alip apar,

ki leb mac ma lyel tung cinge ma lacuc.

3Ada, Rwot maro jone,

dok gwoko jo ma mere ducu.

Pimeno waryebe katyene kun walubu cike.

4Dong amiyo botwu cik man

me bedo me aleya pa lwak pa Yakobo.

5Kitmeno Rwot odoko rwot i Jecurun ikare ma ludito ma gitelo wi lwak gucoke,

ma kaka pa jo Icrael ducu gugure kacel.”

6Ikom kaka pa Reuben Moses olamo gum ni,

“Wek kaka pa Reuben gubed makwo, pe guto,

kadi bed jone nok.”

7Ci olamo gum ikom kaka pa Juda ni,

“Ai Rwot, winy dwon jo pa Juda,

dwokgi cen paco bot jo gi.

Wek gin gudok tek,

ikonygi kalweny ikom lumonegi.” 81

Ikom kaka pa Levi olamo ni,

“Mi ki kaka pa Levi Tumim ki Urim meri, wek guti kwede me ngeyo mit ma meri.

Gin aye jo mayam iomo igi i Maca,

gin aye jo mayam itemogi inget pii me Meriba pien gin lwori.

9Jo pa Levi yam gumako loki,

dok gulubu gicikeni bot jo Icrael;

makato paro pi kwo pa wegigi ki pa megigi,

pa omegigi ki pa lumegigi wa ki pa lutinogi bene.

10Jo pa Levi bipwonyo jo pa Yakobo ki lok ma ingolo,

gibipwonyo ciki bot jo Icrael;

dok gin aye biwango odok eceta inyimi,

gibityero gitum ma kiwango woko ducu ki bere iwi keno tyer ma meri.

11Ai Rwot, mii gum ki kaka pa Levi wek gudok tek,

dok ijol ticgi ducu ma gitiyo ki cinggi.

Nyon pyer lumonegi piny, ma gin aye jo ma dagi,

wek pe dok gutub ikomgi.”

12Ikom kaka pa Benjamin olamo ni,

“Jo ma Rwot maroni gibedo ki kuc,

Rwot Mamalo Twal gwokogi kare ducu,

tingogi i gwoke.”

13Ikom kaka pa Yucepu olamo ni,

“Rwot omii gum opot ikom lobogi,

ki mot mabeco ma a ki malo i polo,

ki ma a ki i kut matut ma oyare ite lobo.

14Omii lobogi nyig yadi mabeco ma nyak dok cek ki ceng,

ki lonyo me cam ma cek i dwene kikome.

15Omii godigi ma rii nakanaka opong ki yadi ma nyako nyiggi mabeco,

ki jami mabeco opong iwi ceregi mabedo matwal.

16Wek lobogi opong ki cam mabeco keken,

ki gum pa Lubanga ma onyute i caka ma olyel mac.

Wek gum magi ducu gupot ikom jo pa Yucepu,

pien en obedo laker ikin omegine.

17Teko pa jo pa Yocepu bibedo calo teko pa wod twon,

macalo teko pa tung twon ma i tim.

Teko pa Yocepu aye jo makato alip pa Manace ki jo alip apar pa Epraim.

Gin bilweny ikom lumerokgi,

gibiryemogi woko cen, wa i agiki piny.”

18Ikom kaka pa Jabulon ki Icakar olamo ni,

“Wek jo pa Jabulon onong gum i biacaragi i nam.

Jo pa Icakar gibinongo lonyogi i gangigi.

19Gibilwongo rok ducu wek gucit iwi godigi,

gibityero gitum ma opore kunu,

gibinongo lonyogi ki i nam,

kacel ki lonyo matye iwi tera i dog nam.”

20Ikom kaka pa Gad olamo ni,

“Kipak Lubanga, en aye ma oyabo i lobo pa jo pa Gad malac!

Jo pa Gad gibutu piny macalo min labwor,

en yeco bat lee ka dango wiye.

21Ikare ma ludito wi Icrael gucoke kacel,

gumiyogi lobo pa lawimony, lobo mabere ni obed meggi.

Gutimo gin matye atir i nying Rwot,

gucobo gin ma Rwot ociko bot jo Icrael.”

22Ikom kaka pa Dan olamo ni,

“Jo pa Dan aye calo latin labwor ma kire nia ki i Bacan.”

23Ikom kaka pa Naputali olamo ni,

“Rwot omiyo gum madwong adada ki kaka pa Naputali,

dok gum pa Rwot bene dwong ikome,

lobogi bene a ki i dog nam Galilaya cito naka wa tung kupiny.”

24Ikom kaka pa Acer olamo ni,

“Kaka pa Acer olim gum madit makato kaka pa jo Icrael ducu;

wek cwiny Lubanga omargi makato omegine ducu;

wek lobone opong ki yat Jeituni ma nyako nyiggi mapol,

wek gubed ki moo madwong adada i lobogi.

25Laceg dog taun gi obed nyonyo iron ki nyonyo mola;

bed ki tek komi nio wa iwang togi.”

26Pe tye ngat mo macalo Lubangawu, wun jo Jecurun,

ma lor piny ki i pol bino kwede kakonyowu, kun baro dye polo ki deyone.

27Lubanga ma bedo nakanakani en aye kabedowu me kanewu,

tekone mabedo nakanakani tye ma tingowu kwede malo.

En oryemo lumerok woko ki inyimwu kun waco ni,

tyekgi woko liweng.

28Kitmeno, jo Icrael yam gubedo ki kuc,

likwayo pa Yakobo gubedo ken gi labongo ayela i lobo ma opong ki ngano ki kongo bwino;

eyo, polo bene bimiyo kot ma oromo i lobogi.

29Cwinyi yom kuman, Icrael!

Anga mono macalo in ka?

In i rok mayam Rwot olaro,

Rwot aye kwotwu ma gwokowu,

ki pala lucwanwu maloyo lumerokwu!

Lumerokwu gibibino botwu kun gimwole amwola;

ento wun wubinyonogi woko piny.