Nwoyo Cik 32

1“Wucik itwu, wun jo matye i polo ki lobo,

wek wuwiny lok ma an dong abiloko maber.

2Pwony ma mera bicwer macalo kot,

dok biton i lobo macalo toyo.

Macalo kot ma ngido ikom lum alita

macalo kot ma wo ikom ginapita ma pud otwi nyen.

3Pien abipako nying Rwot,

ci an abitito pi dit pa Lubangawa!

4Rwot aye Got ma gwokowa,

tice ducu cobe kakare dok gin ducu ma en tiyo tye atir.

En Lubanga ma lagen, dok tye ki ada;

kite atir, gin ma en timo ducu tye maber.

5Ento wun lutim tim aranyi ikome;

jo ma pe gene dok bene pe gupore me bedo lutinone, pien komgi kimwonyo;

gin aye yalwak ma ongak ma ogom woko.

6Man aye kit ma wuculu ki Rwot,

wun jo maming ki rok ma pe ki ryeko?

Pe en aye wonwu ma ocweyowu?

Pe en aye lacwec ma omiyo wudoko rok madit?

7Po ikom kare mayam con ca,

tam pi lwak mwaka pa yalwak macon.

Peny woru, ci binyuti maber,

ki ludongowu bene gibitito botwu gin mayam otime con. 81

Ikare ma En Mamalo Twal yam omiyo ki rok ducu ginaleyagi,

ikare ma opoko kin lutino pa dano,

yam opoko wang lobo pa rok acel acel

kun lubu wel awobe pa Icrael.

9Pien lwak pa Rwot gin aye dulle,

jo pa Yakobo aye gipiny ma kipoko bote.

10Yam en onongo Yakobo i dye tim aroo,

i lobo kweyo marac ma dano pe iye;

okwake ki bade kun gwoke maber macalo tong wange kikome.

11Macalo ocur ma pwonyo lutinone ki tuk

kun tengo bwome ma oyaro ka wigi,

yaro bwome ka jologi kwede,

ci tingogi ki kono lacar madito.

12Rwot kene aye yam telo wi jone,

kun onongo lubanga pa lurok mo pe ma okonye.

13Omiyo guringo iwi cere ma otinge malo i lobo,

opitogi ki cam ma ocek i poto;

omiyogi doto moo kic ma nonge iwi got,

ki noto moo jeituni ma ocek i dye pata got matek.

14Omiyo guboto cak lukulu pa dyangi,

ki mato cak ma libo bene pa dyegigi;

gucamo moo lutino romi ki nyogi romi,

ki ringo dyangi me Bacan ki ringo dyegi,

kacel ki moko ngano mabecone tutwal,

gumato kongo bwino makwar me pig olok.

15Ento Jecurun2 odoko lalonyo, ci odoko lajemo;

jo pa Rwot gucwe ma komgi pek, ma olinge.

Gubwoto Lubanga ma Lacwecgi woko,

gucayo Got ma olarogini woko.

16Guworo lubanga pa rok mukene ma omiyo nyeko omake,

gungeto cwinye ki tim marac me kwer

omiyo kiniga omake. 173

Gutumu tum bot jogi ento pe bot Lubanga,

bot lubanga mogo mayam kwarigi pe gungeyo,

bot lubanga mogo manyen ma obino lacen

mayam kwarigi pe guworo.

18Gin pe guparo Got ma ocweyogini,

wigi owil woko ikom Lubanga ma Wongini.

19Rwot oneno ci ongeto cwinye,

ci omiyo en okwero awobene ki anyirane woko.

20En owaco ni, ‘Pe dong abikonyogi,

wek dong anen kit ma gibitum kwede;

pien gin yalwak ma gungak woko ata,

gin lutino ma pe lugen. 214

Gin gumiyo akemo omaka pien guworo gin ata ma pe lubanga;

gungeto cwinya ki cal jogi acweyagu.

An bene abimiyo nyeko makogi ikom ji mogo ata;

abimiyo rok mo maming ngeto cwinygi.

22Pien kinigana dong omoko mac woko,

dong tye ka wang wa ite bur matut me lyel,

kun wango lobo ki gin ma ocek iye ducu,

ka dok cwinyo mac wango wa te guti me godi.

23Abicoko can aguru i wigi;

abityeko aterona woko ikomgi.

24Kec aye bimiyo gijony lingok,

dok abiwangogi ki lyeto ki two gemo maracu,

abityekogi woko liweng; abicwalo lak nguu ikomgi,

ki kwir pa gin ma lak alaka i ngom.

25Ki i dye gudugi pala lucwan bityekogi woko,

ki lworo bene binekogi woko wa i kicika otgi;

magi ducu bitime ikom lutino co ki anyira,

ikom lutino ma dot wa ki jo ma wigi ki lwar.

26Onongo amito keyogi woko kama boco,

wek nyinggi pe dong kipo iye ikin dano.

27Ento alworo lumerok wek pe gunget cwinya,

wek lumonegi pe guter marac, wek pe guwac ni

gin aye guloyogi dok cing Rwot pe otimo gin mo.’

28Pien jo Icrael gubedo jo ma wigi pe tiyo,

niang lok bene loyogi woko.

29Ka onongo nene giryek, kono onongo guniang lok man,

kono onongo gungeyo agiki me kwogi.

30Cake ningning ni dano acel keken aye ryemo jo alip kulu,

dok jo aryo twaro jo alip apar kulu,

ka pe Lubangagi aye omiyogi woko bot lukworgi,

ka pe Rwot aye otenyogi woko?

31Pien lubanga pa lumerokwa pe gitek calo Lubangawa,

wa merokwa bene giye lok man.

32Lukworwa girom ki jo Codom ki Gomora,

gical ki olok marac ma nyige kec;

girom ki kongo bwino ma kirubu ki kwir twol,

33macalo kongo bwino ma kirubu ki kwir twol golla mager.

34Rwot owaco kuman ni, ‘Man aye gin ma akano,

ma agwoko i ot kano lima. 355

An aye abiculu kwor, abiculu wange lacen.

Akuru kare ma tyen gi bicer;

pien nino me to pinygi dong cok,

bipoto ikomgi atura.’ 366

Pien Rwot bingolo kop atir pi jone,

kica bimake ikom lutice

ka oneno tekgi dong otum woko,

ma dano mo pe odong kadi opii nyo ngat ma lone kene.

37Ci Rwot bipenyogi ni, ‘Lwak lubanga pa lurok dong gitye kwene ka,

ki lubanga ma tego mayam wuringo wularo iyeni?

38Jogi mayam wupitogi ki moo me gitumwu

ki ma gumato kongo bwino me gityer amatawu dong gitye kwene?

Wek dong gua malo kakonyowu,

wek gin aye gubed jo ma gwokowu!

39Tin dong wunen ni, an aye Lubanga;

lubanga mukene ma ada dong peke.

An aye aneko dok an aye amiyo kwo;

an aye aketo ret dok acango bure,

dok pe tye ngat mo ma laro dano ki i cinga.

40Atingo cinga malo acimo polo ci akwongo kwong man ni,

Macalo an Lubanga ma abedo kwo matwal,

41kace apako pala lucwana ma mil amila,

madong ayube me miyo pwod,

ci abiculu kwor ikom lumonena,

abiketo can ikom jo ma gidaga.

42Abimiyo aterona mer ki remo,

pala lucwana bicamo ringo mabup,

biyeng ki remo pa jo ma kinekogi ki ma kimakogi,

bitongo wi lutel pa lumerok.’ 437

Wupake wun rok ducu kacel ki lwake,

pien en biculu kwor remo pa lutice; en biculu kwor ikom lumonene

pi kwanyo bal woko ki i lobo pa jone.”

44Moses okwano wer man ducu wek lwak guwiny, en kacel ki Yocwa wod pa Nun.

Moses ociko jo Icrael tyen me agiki

45Ka Moses otyeko waco lok magi ducu bot jo Icrael ducu ci owaco botgi ni, 46“Wuket i cwinywu lok ducu ma awaco botwu tin, wek wuketgi gubed cik ma mako lutinowu bene, wek gugwoke kalubu lok ducu me cik man. 47Lok magi pe lok ma tere pe; gin aye kwowu kikome. Pi gwoko cik magi miyo wubirii pi kare malac i lobo ma wucito iye loka Jordan kacamone.”

Lubanga onyutu lobo Kanaan bot Moses

488

Inino meno kikome Rwot owaco bot Moses ni, 49“It malo iwi got man me Abarim, got Nebo, matye i lobo Moab mukemo Jeriko, wek inen lobo Kanaan ma abimiyo bot jo Icrael me bedo meggi. 50Ibito iwi got kama i ito iyeni wek idok bot lutuwu, macalo omeru Aron yam oto iwi got Kor ci odok bot lutugi; 51pien yam wungayo wanga woko ki i dye jo Icrael, i dog pii me Meriba i Kadec i tim me Jin; yam pe wuwora inyim jo Icrael macalo an Lubanga maleng. 52Pimeno ibineno lobonu ki cen inyimi kuca, ento pe ibicito kunu, i lobo ma abimiyo ki jo Icrael.”