Yocwa 1

Miyo tic ki Yocwa

1Ka Moses latic pa Rwot dong oto woko, ci Rwot owaco bot Yocwa wod pa Nun ma lakony pa Moses ni, 2“Latica Moses dong oto woko; pimeno in aye dong ia malo, icit ingol loka Jordan, in ki lwak man ducu, wucit wa i lobo ma abimiyo botgi ni, gin jo Icrael. 31Kabedo ducu ma tyenwu binyono abimiyo botwu, kit mayam aciko ki Moses. 4Cake wa ki i tim kany ki i Lebanon nio kwede wa i kulu madit, en aye kulu Euprate, lobo ducu pa jo Kit nio wa i nam Mediterranean ma tung kupotoceng, ducu bibedo lobowu. 52Pe tye dano mo ma bicung inyimi ikare me kwoni ducu. Kit mayam abedo ki Moses, abibedo kwedi kitmeno; pe abibwoti, pe abitenyi ata. 63Bed oteka ma cwinyi nwang, pien ibimiyo rok man leyo lobo mayam akwongo pire bot kwariwu ni abimiyo botgi. 7Ento bed oteka ma cwinye nwang, bed ma igwoke kalubu cik mayam latica Moses ociki kwede i gin ma itiyo ducu; pe ingak kun ibwoto lubu lok ma i Cik ducu ma latica Moses ociki, wek ibed ki gum maber i kabedo ducu ma ibicito iye. 8Ibikwano buk man me Cik kare ducu, dok bene ibibedo ka lwodone i cwinyi dyeceng ki dyewor, wek igwoke kalubu gin ducu ma kicoyo iyeni. Kitmeno bimiyo nyimi bedo maleng, ka dok tici ducu bicobe kakare. 9An dong atyeko ciki ba. Bed oteka ma cwinyi nwang; pe komi omyel, pe cwinyi oryange, pien Rwot Lubangani tye kwedi kama iwoto iye ducu.”

Yocwa ociko lwak

10Yocwa ociko ludito ma gin loyo lwak ni, 11“Wuwot i dye gony ka ciko lwak ni, ‘Wuyub camwu; pien odong nino adek ci wucito kangolo loka kulu Jordan, wucito iye kacamo lobo ma Rwot Lubangawu omiyo botwu me bedo mewu.’” 124

Yocwa dok owaco bot jo pa Reuben, jo pa Gad ki nucu kaka pa Manace ni, 13“Wupo lok mayam Moses latic pa Rwot ocikowu kwede kun waco ni, ‘Rwot Lubangawu dong otyeko miyowu kabedo me yweyowu, en dong omiyowu lobo man.’ 14Monwu ki lutinowu ki dyangiwu gibidong i lobo mayam Moses omiyo botwu inge Jordan kany; ento oteka lweny ma gitye ikinwu ducu bikato loka ca ki jami lwenygi ducu inyim omegigi pi konyogi, 15nio ka Rwot omiyo yweyo bot omegiwu macalo omiyo botwu ni, ci gin bene gucamo lobo ma Rwot Lubangawu omiyogi. Ka dong wubidok i lobo ma mewu ni, ci dong wubibedo iye matwal, en aye lobo mayam Moses latic pa Rwot omiyo botwu inge Jordan kany ma tung kunyango.” 16Ci gin ogamo dog Yocwa ni, “Gin ma dong iciko ducu wabitiyo, dok kama icwalowa iye ducu wabicito. 17Kit macalo yam waworo dog Moses i lok ducu, wan bene wabiworo dogi kitmeno. Rwot Lubanga keken aye obed kwedi, kit mayam obedo ki Moses! 18Dano mo ka okwero loki ce ojemo ikom ciki ki gin ducu ma iciko, kibineke woko. In aye ibed oteka ma cwinyi nwang.”