Yocwa 2

Kicwalo lukipiny i Jeriko

11

Yocwa wod pa Nun ocwalo jo aryo nia ki i Citim i mung kakiyo piny kun waco botgi ni, “Wucit kaneno lobo, tutwale wucit wukii taun madit me Jeriko.” Ka gucito, ci gucito i ot pa dako ma lakwele ma nyinge Rakab, ci gubutu kunu. 2Kitito pirgi bot rwot me Jeriko ni, “Nen, jo Icrael mogo gubino kany kakiyo piny.” 3Ci rwot me Jeriko ocwalo kwena bot Rakab kun wace ni, “Kel dano ma gubino boti kany, dano ma gudonyo i odini, pien gubino ka roto lobowa ducu.” 4Ento dakonu onongo otero jo aryonu okano gi woko, ci en ogamo ni, “Ada, jo meno obino bota, ento onongo pe angeyo kama gua ki iye. 5Ikare ma dong ki cok loro dog cel me taun madit woko, ma piny colli, jo meno gukato woko, ci kama gucito iye aye pe angeyo. Wuryem korgi oyotoyot, ci wubimakogi i yoo.” 6Ento en onongo dong oterogi iwi ot malo, ci okanogi ikin tol tworo ma ocano kikore iwi ot kunu. 7Kitmeno jonu gucako ryemo korgi i yoo nio wa iwang wat me kulu Jordan. Cutcut ka luryem korgi gukato woko, ci dog cel me taun madit kiloro woko.

8Ikare ma jo meno peya gubutu piny, en ocito botgi iwi ot, 9ci owaco botgi ni, “Angeyo ni Rwot otyeko miyowu lobo man, lworo bene otyeko makowa pirwu, ki jo ma gibedo i loboni komgi oonyo koyo woko pirwu. 102Pien wawinyo kit ma Rwot otwoyo ki pii me Nam Makwar woko inyimwu ikare ma wua woko ki i Ejipt, ki gin ma wutiyo ikom luker aryo pa jo Amor mayam gin bedo loka Jordan tung kany, gin aye Cikon ki Og, ma wujwerogi woko liwengi. 11Ikare ma wawinyo pire cwinywa ocako ngabe angaba cut, ci tipu kom dano oto woko lirut pirwu, pien Rwot Lubangawu aye Lubangawu aye matye laloc malo i polo ki piny iwi lobo bene. 12Kombedi dong wukwonga kwong ki nying Rwot ni, wubitimo jo me ot pa wora maber, kit macalo atyeko timowu maberi. Piman dong wumiya lanyut ma moko adane, 13wek wular kwo pa wora ki pa maa, ki pa omegina ki lumegina, ki jo ducu ma gin tye botgi, wek wular kwowa wek pe wa to.” 14Jo meno gugamo ni, “Rwot aye omyero onek wan, ka pe watimo gin ma wacike iye kanyi. Dong ka pe ibitito bot ngat mo gin ma wabedo katimo kany, ci wacike boti me timo in maber ka Rwot omiyo bot wa lobo man.”

15Lacen dako meno oweko gukato woko ki iwang dirica ma nongo en cwalogi piny ki tol, pien onongo ode kigero okube ikom icel murumu3 Jeriko. Man nyutu ni en yam bedo ikin cel. 16Ci en ocikogi ni, “Kong wucit wa ikin godi, wek luryem korwu pe gurwate kwedwu i yoo. Kong wukane kunu pi nino adek, nio ka luryem korwu dong gudwogo; ka lacen wun dong wucit giwu.” 17Jo meno guwaco bote ni, “Pe wabibedo ki bal mo ikom kwong man ma imiyo wakwongo botini. 18Nen ba, ka monywa obino i loboni, ci ibitweyo tol man makwari iwang dirica ma imiyo wakato woko kun wawok ki iyeni. Ci bene ibilwongo woru ki meni ki omegini ki jo ma i ot pa woru ducu, kun icokogi iot boti kany. 19Ka ngat acel mo okato gire woko ki i dogola me otti ce ocito i gudu, bal me remone bidok i wiye, wan pe wabibedo ki bal mo iye, ento ka kiwano ngat matye i ot boti, ci bale bibedo mewa. 20Ento kace itito gin ma watimo kanyi, ci pe wabibedo ki bal mo pi kwong ma imiyo wakwongoni.” 21Dakonu ogamo ni, “Dong obed kitmeno kit macalo wulokoni.” Ka ocwalogi gin ocito, ci en otweyo tol makwari iwang dirica ode.

22Ka gucito ci guwoto atir wa i godi, gubedo kunu pi nino adek, nio ka luryem korgi gudok woko; lulub korgi obedo ka yenyogi kwe i wangayo, ci pe gumedo ki onongogi. 23Ci jo aryonu gulor piny ki iwi godi, gukato loka ca ci gucito bot Yocwa wod pa Nun. Ci gutito bote lok ducu ma otime ikomgi. 24Ka dok guwaco bot Yocwa ni, “Adada Rwot dong otyeko miyo lobo meno ducu i cingwa; ki bene lworo madit opoto ikom jo ducu ma gibedo i lobo meno woko lirut ikare ma guwinyo pirwa.”