Yocwa 3

Jo Icrael gukato loka Jordan

1Yocwa oa malo odiko con ci ocako wot kun a ki i Citim, kacel ki jo Icrael ducu, gucito wa i dog kulu Jordan. Ci gubutu kenyo ma peya gukato loka tung ca. 2Ka gutyeko kunu nino adek, ci ludito owoto i dye gony 3kun giciko lwak ni, “Ka dong wuneno ajwaki ma Lulevi dong gutingo Canduk me Gicike pa Rwot Lubangawu, ci wun bene dong wubicako wot, wua ki i kabedowu wulubu kore, 4wek wunge yoo ma wubilubu ni, pien yam peya wulubu yoo meno. Ento kinwu ki Canduk pa Rwot aye obed ma oyute; ber kinwu opoke maromo kilomita acel kulu ingegi, pe wunyik cok ki Canduk.” 5Ci Yocwa ociko lwak ni, “Wulonye kekenwu wek wubed maleng, pien diki Rwot bitiyo jami tango ikinwu.” 6Yocwa owaco bot ajwaki ni, “Dong wuting Canduk me Gicike, wukat kwede inyim lwak.” Ci gin gutingo Canduk me Gicike, gucito kwede wa inyim lwak.

7Ci Rwot owaco bot Yocwa ni, “Tin dong abitiyo gin madit mamiyo ibedo dano madit ki inyim jo Icrael ducu, wek gunge ni, kit mayam abedo ki Moses, abibedo kwedi bene kitmeno. 8Ibiciko ajwaki ma gitingo Canduk me Gicike ni, ‘Ka dong wuo i dog pii me Jordan, ci wubicung mot i kulu Jordan.’” 9Ci Yocwa owaco bot lwak ni, “Dong wubin kany ka winyo lok pa Rwot Lubangawu.” 10Ka dok owaco ni, “Kombedi dong wubingeyo ni Lubanga makwo tye ikinwu, dok ni en biryemo jo magi woko ki inyimwu ada, jo Kanaan, jo Kit, jo Kiv, jo Periji, jo Girgac, jo Amor ki jo Jebuc. 11Ka Canduk me Gicike pa Rwot me lobo ducu dong bingolo kulu Jordan ki inyimwu. 12Ci koni dong wukwany dano apar wiye aryo ki ikin kaka pa jo Icrael, dano acel pi kaka acel acel. 13Ikare ma tyen ajwaki ma gutingo Canduk me Gicike pa Rwot Lubanga, ma en Rwot me lobo ducuni, bicung i pii me Jordan, ci pii me Jordan bingol woko ma pe dong mol; ci pii ma mol a ki malo tung celi bigut gure kacel.”

14Kitmeno lwak gua ki i kemagi gucako wot pi ngolo loka Jordan kacel ki ajwaki ma gutingo Canduk me Gicike ma gutelo kwede nyim lwak. 15Nongo pii me kulu Jordan pong woko libyeny oo wa iwi tura mwaka ki mwaka pi kare malac ikare me kac. Ka dong ajwaki ma gutingo Canduk me Gicikeni guo i dog kulu Jordan, ci gulutu tyen gi i pii ma i dogeni, 16ci pii ma mol piny ma a ki tung maloni ogut ocung woko ma opong otinge malo likung ma ojer wa i Adam, en taun madit macok ki Jaretan. Pii mogo ma mol kemo nam me Araba, ma en aye Nam me Kadoni, kin gi ducu ongol woko, ci lwak gukato loka tungcel, mukemo Jeriko. 17Ikare ma jo Icrael ducu gimol gikato ki i lobo mutwoni, onongo ajwaki ma gutingo Canduk me Gicike pa Rwoti ocung i dye Jordan, nio ka rok ducu otyeko kato loka Jordan.