Yocwa 4

Kiketo godi apar wiye aryo me lapowic

1Ka lwak ducu dong gutyeko kato loka Jordan, ci Rwot owaco bot Yocwa ni, 2“Kwany dano apar wiye aryo ki ikin lwak, dano acel pi kaka acel acel, 3ci icikgi ni, ‘Wukwany godi apar wiye aryo ki kany ki i dye Jordan, ki i kabedo ma tyen ajwaki ocung iyeni, wuting wukat kwedgi wa loka ca, ci wuketgi piny i kabedo ma tin wucito kabutu iyeni.’” 4Yocwa olwongo dano apar wiye aryo ki ikin jo Icrael ma nene en oyerogi, ma laco acel oa ki i kaka acel acel. 5Ci owaco botgi ni, “Wukat wucit wa inyim Canduk me Gicike pa Rwot Lubangawu ma i dye Jordan ni, dano acel acel oting iye got oket iwi gwoke, ma oporo wel kaka pa jo Icrael ducu, 6wek gubed me lanyut ikinwu. Ikare me anyim ka wang mo lutinowu bipenyowu ni, ‘Godi magi kono nyutu gin ango?’ 7Wun wubitito botgi ni, pii me Jordan yam iye opoke ongol woko ki inyim Canduk me Gicike pa Rwot, ikare ma canduk ngolo Jordan kato kwede loka ca. Kitmeno godi magi bibedo gin me nipo matwal bot jo Icrael.”

8Jo Icrael gutimo kit ma Yocwa ocikogi kwede. Gin gutingo godi apar wiye aryo ki i dye Jordan, ma oporo wel kaka pa jo Icrael, kit ma nene Rwot otito bot Yocwa ni gin guting gucit kwedgi loka ca, wa i kabedo ma gicito kabutu iyeni, ci gin guketogi piny kunu. 9(Yocwa bene ocibo godi apar wiye aryo i dye Jordan, i kabedo kama tyen ajwaki ma gutingo Canduk me Gicike ocung iye. Pud gitye kunu wa onyo.) 10Pien onongo ajwaki ma gutingo canduki ocung kenyo i dye Jordan nio ka gin ducu ma nene Rwot ociko ki Yocwa ni otit bot lwak otum, marom ki cik mayam Moses ociko ki Yocwa ni.

Lwak ducu gumol oyotoyot wa loka ca. 11Ka lwak ducu gumol gukato loka ca, ci Canduk pa Rwot ki ajwaki bene gukato loka inyim lwak. 12Jo pa Reuben ki pa Gad ki nucu kaka pa Manace onongo guruku jami lwenygi gutelo kwede nyim lwak jo Icrael kit mayam Moses ocikogi kwedeni. 13Onongo jo gi ma guruke me lweny guromo alip pyere angwen, ci gukato loka ca inyim Rwot Lubanga kalweny i lobo bar matye cok ki Jeriko. 14Rwot omiyo Yocwa obedo dano madit inyim jo Icrael ducu; ci lwak guworo Yocwa wa ikare me kwone ducu kit mayam gin guworo kwede ki Moses.

15Rwot owaco bot Yocwa ni, 16“Cik ajwaki ma gutingo Canduk me Gicike dong gua woko ki i Jordan.” 17Yocwa ociko ajwaki ni, “Dong wua woko ki i Jordan.” 18Ka ajwaki ma gutingo Canduk me Gicike pa Rwot gua woko ki i dye Jordan gukato wi tura; ma tyen gi ocako nyono lobo ma wi tura mutwo ni, ci pii me Jordan ocore odwogo cen i kabedone, opongo piny woko libyeny wa iwi tura odoco.

19Ci lwak gua woko ki i Jordan gukato iwi tura inino dwe apar me dwe mukwongo, ci gutongo gonygi i Gilgal iwang lobo Jeriko matye tung kunyango. 20Ci godi apar wiye aryo ma gin gutingo ki i Jordan ni, Yocwa ocibogi i Gilgal. 21Ci owaco bot jo Icrael ni, “Ikare me anyim, ka likwayowu gupenyo wegigi ni, ‘Godi magi kono nyutu gin ango?’ 22Ci wubitito bot lutinowu ni, jo Icrael yam gumol gukato ki i Jordan kany ma lobone otwo woko. 23Pien Rwot Lubangawu omiyo pii me Jordan otwo odwon woko pirwu nio ka wumol wukato loka kany, kit mayam Rwot Lubangawu otiyo ki Nam Makwari, mayam omiyo piine otwo odwon woko pirwa nio ka wamol wakato loka tungcel, 24man otime wek rok ducu ma wi lobo ni onge atir ni cing Rwot tye ki tek; dok bene wek wubed ka lworo Rwot Lubangawu matwal.”