Yocwa 5

1Ka luker pa jo Amor ducu ma gibedo loka Jordan ma tung kupotoceng, ki luker pa jo Kanaan ducu ma gitye i dog nam, guwinyo ni Rwot otyeko dwono pii me Jordan otwo woko pi jo Icrael nio ka gumol gukato loka tungcel, ci cwinygi ocako ngabe angaba, ki tipu komgi oto woko lirut, pi lworo jo Icrael.

Liro yalwak manyen i Gilgal

2Ikare meno Rwot owaco bot Yocwa ni, “Yub pala kidi lela mabite ci ilir ki jo Icrael.” 3Ci Yocwa oyubu pala kidi lela mabite, oliro ki jo Icrael i Gibea-aralot. 41Man aye tyen lok ma omiyo Yocwa olirogi: lwak co ducu ma oa ki i Ejipt ki lulwenygi ducu, onongo gutyeko to woko ki i tim ma dong gutyeko a woko ki i Ejipt. 5Jo ma gua ki i Ejipt onongo yam dong kilirogi woko, ento jo ducu ma ki nywalogi ki i wangayo, onongo peya kilirogi. 6Pien jo Icrael gubedo kawot i tim pi mwaka pyere angwen, nio ka jo me rokgi ducu, co ducu ma lumony mayam gua ki i Ejipt, guto gutum woko, pien onongo pe gubedo ka woro dog Rwot. Rwot yam okwongo ni pe ebiye ni gunen lobo mayam en ekwongo bot kwarigi ni ebimiyo botgi, en aye lobo ma maber ma ceko cam mapol. 7Kitmeno jo ma Yocwa oliro obedo lutinogi ma Rwot omiyo gin odongo oleyo katyen gi; pien onongo gin obedo ma pe kilirogi ki i wangayo.

8Ka liro jo Icrael dong otum, ci gubedo i gony nio ka gucang. 9Rwot owaco bot Yocwa ni, “Tin dong akwanyo lewic me lobo Ejipt woko ki ikomwu,” ma omiyo nying kabedo meno pud kilwongo ni Gilgal2 wa onyo.

Kwero Karama me Kato

103

Ikare ma jo Icrael gitye i gony me Gilgal gukwero nino madit me Kato inino dwe apar wiye angwen i otyeno kama obedo barbar macok ki Jeriko. 11Orwone ki inge kwero Kato, inino meno kikome, gin gucako camo cam ma ocek i lobo meno, capat ma tobi peke iye ki bel ma kicelo. 124Inino meno ma gucamo iye cam ma ocek ki i lobonu en aye nino ma manna bene ogik iye; jo Icrael pe dok gumede ki camo manna matwal, ento dong gubedo kacamo cam ma ocek i lobo Kanaan i mwaka meno.

Yocwa ki laco matye ki pala lucwan

13Ka Yocwa onyiko cok ki Jeriko, ci nen, laco mo onongo ocung inyime ma omako pala lucwan i cinge. Ci Yocwa ocito bote, openye ni, “In itye tung botwa nyo tung bot lumerokwa?” 14En ogamo ni, “Pe; ento an aye lawimony pa Rwot ma tin dong abino.” Yocwa oryebe piny i ngom, owore, ci owaco bote ni, “Ladit, an latici, icika ki lok ango?” 15Lawimony pa Rwot owaco bot Yocwa ni, “Luny war woko ki i tyeni, pien kabedo ma icung iyeni kabedo maleng.” Ci Yocwa otimo kitmeno.