Yocwa 6

Jo Icrael gumako Jeriko

1Ikare meno onongo Jeriko kicego woko matek tutwal pi lworo jo Icrael; onongo dano mo pe kato woko, dok dano mo pe donyo i iye bene. 2Ci Rwot owaco bot Yocwa ni, “Nen, dong atyeko miyo Jeriko i cingi kacel ki rwote ki twoni oteka lwenye. 3Wubiwot wurumu taun madit meno; lulweny ducu biwot kun rumu taun madit tyen acel inino acel. Ci wubitiyo kitmeno pi nino abicel, 4kun ajwaki abiro bimako obute me tung romi gitelo kwede nyim Canduk me Gicike. Inino me abirone wubiwot wurumu taun madit meno tyen abiro kun ajwaki gikutu obute. 5Ka dong kikutu tung nyogi romi, ci ka wuwinyo dwon obute ma longoni, ci lwak ducu bidange ki dwon gi ma longo mapek; ci cel gogo me taun madit bimuk, poto woko piny ducu, ci lwak gibicore gicito iye kun dano acel acel kemo nyime atir.” 6Ci Yocwa wod pa Nun olwongo ajwaki, owaco botgi ni, “Wuting Canduk me Gicike. Ajwaki abiro gumak obute tung nyogi romi gutel kwede nyim Canduk pa Rwot.” 7Ka dok owaco ki lwak ni, “Wuwot anyim, wuwot wurum taun madit man, wumii jo ma guruku jami lwenygi gukat wa inyim Canduk pa Rwot.”

8Kit ma Yocwa ociko ki lwaki, ajwaki abiro gumako obute tung nyogi romi abiro ci gutelo kwede nyim Rwot kun gicito anyim kacel ki Canduk me Gicike pa Rwot malubu korgi. 9Lumony gutelo nyim ajwaki ma gikutu obute ni, ci lugwok tung angec gulubu kor Canduk, kun obute kikutu kimede kwede ameda. 10Ento Yocwa ociko lumony ni, “Pe wubidange ki wo, kadi wa dwonwu bene pe biwinye, wa lok mo pe bia ki i dogwu, nio kwede wa inino ma abicikowu ni dong wudange ki wo; ka dong wubidange.” 11Kitmeno Yocwa omiyo Canduk pa Rwot ocako wot me rumu taun madit, kun rumu tyen acel keken. Lacen gudok i gony, gubutu kunu.

12Yocwa dok oa malo odiko con, ki ajwaki bene gucako tingo Canduk pa Rwot. 13Ajwaki abiro gumako obute tung nyogi romi abiro gukato kwede inyim Canduk pa Rwot, kun gimede kikutu obute nakanaka. Lumony gutelo nyimgi, ki lugwok tung angec gulubu kor Canduk, kun ajwaki gikutu obute nakanaka. 14Inino me aryone guwoto gurumu taun Jeriko tyen acel ci gudok i gony. Gubedo karumu gangi kitmeno pi nino abicel.

15Ikom nino me abirone gua malo kwarpiny, guwoto gurumu taun Jeriko kit mayam ca tyen abiro; inino meno keken aye gurumu iye taun Jeriko tyen abiro. 16Ikom tyen me abirone en aye ajwaki gucako kutu iye obute, ka Yocwa owaco bot lumony ni, “Wudange, wuwo, pien Rwot dong omiyo taun madit man botwu. 17Ento taun madit man ki gin ducu matye iye ki bidyerogi bot Rwot ci ki bijwero woko ducu. Rakab ma lakweleni keken, ki jo ducu ma gitye i ode, aye gibidong makwo, pien en yam okano lurotpiny ma wacwalo kunu. 18Ento wun aye wugwoke kekenwu ikom gin ducu ma kidyero me ajwera woko, pe dok wukwany gin mo ki ikom gin ma wudyeroni, miyo gony pa jo Icrael bidoko me ajwera woko ducu, ci kelo ayela ikom gony pa jo Icrael. 19Ento ryal ki jabu ducu ki jami me molagu ki me nyonyogu, gin ducu jami maleng pa Rwot; kibiterogi i ot kano lim pa Rwot.” 201

Kitmeno lumony gudange ki woo ki ajwaki gukutu tum obute. Teki lumony guwinyo dwon obute ci gutugi dange ki twon woo mo matek, ci cel taun madit me Jeriko omuk opoto woko piny ducu, ka dong lumony gudonyo i taun madit kun dano acel acel woto tiko nyime atir, ci gumako taun madit man woko. 21Gujwero co wa ki mon lutino ki ludongo ducu, ki dyangi ki romi ki kanagu; gin ducu gutum woko kun kinekogi ki pala lucwan.

Kilaro Rakab

22Ci Yocwa owaco bot jo aryo mayam guroto lobo ni, “Wucit i ot pa dako ma lakweleni, wukele woko ki jone ducu, kit mayam wukwongo boteni.” 23Kitmeno awobe mayam guroto lobo gudonyo i ot, gukelo Rakab woko kacel ki wone ki mine ki omegine ki jone ducu. Ci gutero ludogola pa Rakab ducu, guketogi woko inge gony pa jo Icrael. 24Lacen lumony guwango taun madit me Jeriko woko ki mac, ki gin ducu matye iye; ento guweko ryal ki jabu ki jami me mola ki me nyonyo keken, ma guketogi i ot ma kikano iye lim pa Rwot. 252Ento Rakab ma lakweleni ki jo me ot pa wone kacel ki jone ducu, Yocwa owekogi makwo. Ci gudoko lubedo ikin jo Icrael nio wa onyo, pien Rakab yam okano lukwena ma Yocwa onongo ocwalogi kakiyo piny i Jeriko. 263

Ikare meno Yocwa omiyo dano gukwongo kwong inyim Rwot kun waco ni,

“Cen opot ikom dano ma bitinge pi gero taun madit man me Jeriko odoco.

Latin kayone bito, ci kibiketo gutine iwiye;

ki wode ma cogone bito, ci kibicibo dog cel me taun madit man iwiye.”

27Kitmeno Rwot obedo ki Yocwa, omiyo nyinge oywek oromo i lobo ducu.