Yocwa 7

Bal pa Akan

1Ento jo Icrael gungayo wang Rwot i lok mamako jami ma onongo kidyero bote. Akan wod pa Karmi, wod pa Jabdi, wod pa Jera ma i kaka pa Juda okwanyo jami mogo ma kidyerogi bot Rwot, omiyo kiniga omako Rwot ikom jo Icrael.

2Yocwa ocwalo dano ki i Jeriko me cito wa i Ai macok ki Bet-aven, inget Betel tung kunyango, ci owaco botgi ni, “Wucit kakiyo lobo kuca.” Jo meno gucito guroto Ai. 3Ka gudwogo bot Yocwa ci gutito bote ni, “Pe iwek mony ducu gucit kunu, ento wek dano alip aryo nyo adek gucit kalweny ikom Ai; pe imii mony ducu guyele gucit kunu, pien jo matye kunu ginok mo.” 4Ma omiyo dano alip adek ki ikin lumony aye gucito kunu; ci guringo woko ki inyim jo Ai. 5Jo Ai guneko jo pyere adek wiye abicel ki ikin gi; guryemo korgi cake ki i dog gang o kwede wa i Cebarim, ci gunekogi i kor got kunu. Ci cwiny jo Icrael obale woko, tekogi okwe woko macalo pii.

6Yocwa oyeco bongone woko, ci opoto piny aryeba cwiny inyim Canduk pa Rwot nio wa otyeno, en ki ludongo pa jo Icrael, kun gionyo apwa iwigi. 7Ci Yocwa owaco ni, “Maa do, ai Rwot Lubanga, pingo ikelo lwak man loka Jordan kany pi miyowa i cing jo Amor wek gutyekwa woko? Twora yam waye giwa bedo loka Jordan kuca! 8Ai Rwot, ka man dok awaco lok ango, ma jo Icrael dong guloke ci guringo woko ki inyim lumerokgini? 9Pien jo Kanaan ki jo ducu ma gibedo i loboni ka gibiwinyo pire, gibicore girumuwa woko dyere, ci gibijwayo nyingwa woko ki iwi lobo. Ci gin ango mono ma dok ibitiyo pi nyingi maditi?”

10Ci Rwot owaco bot Yocwa ni, “A malo, pingo i poto aryeba cwiny kit man? 11Jo Icrael gutimo bal. Gutyeko turu gicikena mayam acikogi kwede. Gin gukwanyo jami mogo mayam kidyerogini. Gukwalo woko, gunginye kwede, ci guketo ikin jamigi. 12En aye lok ma omiyo jo Icrael pe gitwero cung inyim lumerokgi. Gin guloke ci guringo woko ki inyim lumerokgi pien gin kikomgi gudoko gin me ajwera woko. Pe dong abimede kibedo kwedwu, nio wang ma wukwanyo jami ma kidyerogi woko ki ikinwu. 13A malo wek ilony lwak gubed maleng kun iwaco ni, ‘Diki myero wulonye kekenwu wubed maleng, pien Rwot Lubanga pa Icrael owaco kuman ni, jami ma kidyero tye ikinwu, wun jo Icrael. Pieno pe wutwero cung inyim lumerokwu nio wang ma wukwanyo jami ma kidyerogi woko ki ikinwu. 14Diki odiko kibikelowu inyim Rwot kaka ki kaka, ci kaka ma Rwot okwanyo gibibino cok dogola ki dogola; dogola ma Rwot okwanyo bibino ot ki ot; ki ot ma Rwot okwanyo dano matye iye gibibino ki acel acel. 15Ngat ma kikwanyo matye ki jami ma kidyeroni kibiwango woko ki mac. En kacel ki jone ki jamigi ducu, pien oturu gicike pa Rwot, dok otimo gin me lewic i Icrael.’”

16Kitmeno Yocwa oa malo odiko con, okelo jo Icrael cok inyim Rwot kaka ki kaka, ci gukwanyo kaka pa Juda aye. 17En okelo jo pa Juda, ci kikwanyo dogola pa Jera. Okelo dogola pa Jera kun kelo dano ma iye ki acel acel, ka dok kikwanyo ot pa Jabdi. 18Ka dong okelo dano ma i ode ki acel acel, ci kikwanyo Akan wod pa Karmi, lakwar Jera ma i kaka pa Juda. 19Ci Yocwa owaco bot Akan ni, “Woda, mi deyo bot Rwot Lubanga pa Icrael kun itucu bali. Tita kombedi gin ma itimo; pe imunga.” 20Ci Akan ocako dok iye ki Yocwa ni, “Ada, abalo inyim Rwot Lubanga pa Icrael, man aye gin ma atiyo: 21ka aneno bongo maber ma oa ki i Cinar ki ikin jami ma kiyakoni, ki cekel me ryal miya aryo, ki dul jabu ma peke romo cekel pyere abic, pirgi obedo mita, ci akwanyogi. Nen, akanogi i ngom i kemana, ryal tye piny itergi.”

22Ci Yocwa ocwalo lukwena ci guringo i kema pa Akan, gunongo jami meno kikano i kema, kun ryal tye itere piny. 23Gukwanyogi woko ki i kema, gukelogi bot Yocwa ki jo Icrael ducu, ci guketogi piny inyim Rwot. 24Ci Yocwa ki jo Icrael ducu gukwanyo Akan lakwar Jera kacel ki ryal ki bongo ca ki dul jabu, ki awobene ki anyirane, ki twoni dyangine, ki kanane ki romine, ki kemane ki jami ma en tye kwede ducu, gutero wa i nota me Akor.1 25Yocwa owaco ni, “Pingo i kelo ayela ikomwa? Tin dong Rwot bikelo ayela ikomi.” Ci jo Icrael ducu gucelogi ki got. Guwango jamigi ki mac ci kicoro got ikomgi. 26Lacen gucano got ikome madwong ocudu likung ma pud tye wa onyo, ci kiniga pa Rwot malyeti okwe woko. Pieno nying kabedo meno pud kilwongo ni nota me Akor nio wa onyo.