Yocwa 8

Jo Icrael gumako Ai

1Ci Rwot owaco bot Yocwa ni, “Pe ilwor, cwinyi pe opoti. Ter jo ma lulweny ducu kacel kwedi, dong wutugi a, wucit wa i Ai. Nen, dong atyeko miyo rwot me Ai i cingi, ki lwake ducu ki taune madit ki lobone. 2Ibitimo Ai ki rwote kit macalo itimo ikom Jeriko ki rwoteni; ento jamine ma kiyako, ki lime makwo, wubitero bedo mewu. Yube me mako taun man kun iturugi atura ki tung kungeye.”

3Yocwa oa malo ki jo ma lulweny ducu pi cito kalweny ikom Ai. En oyero twoni matego ma oteka lweny alip pyere adek ci ocwalogi ki i dyewor. 4Ocikogi ni, “Wubibutu wukane inget taun madit ki tung kungeye. Pe wucit kamabor ki taun madit man, ento wun ducu wubed ma wutere, 5ci an ki jo ducu ma gitye kweda wabinyiko cok ki taun madit man. Kace jo ma kunu gubino woko kalweny ikomwa, ci wan wabiringo woko ki inyimgi, 6ci miyo gin gibibino woko karyemo korwa nio ka gin ducu gukato woko ki i taun madit man, pien gibitamo ni waringo woko ki inyimgi kit mayam watimoni. Ka wan watye karingo woko ki inyimgi, 7wun dong wubia malo ki kama wubutu wukane iyeni, ci wutugi mako taun madit man woko cut, pien Rwot Lubangawu bimiyo i cingwu. 8Ka dong wutyeko mako, ci wubiwango woko ki mac; kitmeno wubicobo gin ma Rwot ociko. Nen, dong acikowu en.” 9Ci Yocwa ocwalogi woko kitmeno, ci guwoto gucito kama kicikogi ni gucikane iyeni. Gubutu ikin Betel ki Ai, inget Ai tung kupotoceng; ento Yocwa obutu kacel ki lwak i dyewor meno.

10Oruune odiko con Yocwa oa malo ocoko mony, ocako cito inyim jo Ai kacel ki ludongo pa Icrael. 11Jo ma lulweny ducu ma gitye kwede gucito gunyiko cok ki taun madit meno, ci gutongo gony inget Ai tung kumalo, kun nota tye ikin gi ki Ai. 12Ci Yocwa otero dano maromo alip abic oketogi gubutu gukane ikin Betel ki Ai inget Ai tung kupotoceng. 13Guketo mony i kabedogi kitmeno kun gony madit tye inyim taun madit tung kumalo ki dul mukane tye inge taun madit tung kupotoceng. Yocwa obutu i nota i dyewor meno.

14Ka rwot me Ai oneno man, ci en ki lwake ducu, dano me taun meno, gurune gucito gulor piny odiko con i lung mukemo Araba kalweny ikom jo Icrael; ento rwot me Ai pe ongeyo ni jo mogo gubutu gukane woko inge taun madit. 15Ci Yocwa ki jo Icrael guporo ngwec ki inyimgi ni dong kiryemogi woko, kun giringo gidok tung tim. 16Kilwongo dano ducu ma i taun madit gucoke kacel kalubu korgi, ka guryemo kor Yocwa gucito kamabor ki taun madit. 17Dano acel mo pe ma odong i Ai nyo i Betel ma pe okato woko karyemo kor jo Icrael. Ci gubwoto wa dog taun madit odong twolo pi ryemo kor jo Icrael.

18Ka dong Rwot ociko Yocwa ni, “Tir tong alwiro matye i cingini malo, i kem ki Ai, pien abimiyo woko i cingi.” Yocwa otiro tong alwiro matye i cingeni malo, okemo ki taun madit me Ai. 19Oyotoyot jo ma gukaneni gua malo ki i kabedogi tek Yocwa oryeyo cinge malo, ci gutware guringo gudonyo i taun madit me Ai, ci gumako woko, ka gurune gucwinyo mac owango Ai woko. 20Ka jo Ai guneno tung ngegi, ci nen, yito mac ma wango taun madit meno tye kaduny mutinge wa malo i polo; ci ngwec me laro komgi oloyogi woko, pien onongo jo ma guringo gudok tung timi guloke gudwogo cen kalweny ikomgi. 21Ka dong Yocwa ki jo Icrael ducu guneno ni jo ma gubutu angeci dong gumako taun madit woko, ki yito mac ma wang bene dong duny cito malo, ci gudwogo cen kaneko jo Ai. 22Jo Icrael ma onongo dong tye i taun madit meno gua gubino kalweny bene ikom jo Ai. Kitmeno jo Icrael onongo orumugi dyere, jo mukene ki tungcel ki jo mukene tung mukene. Ci jo Icrael guneko jo Ai nio ka pe gubwoto dano acel mo ma odong makwo nyo ma oringo obwot. 23Ento gumako rwot me Ai makwo, ci gutere bot Yocwa.

24Ka jo Icrael dong gutyeko neko jo Ai ducu ma kinongogi kama obedo barbar nyo i tim kama guryemo iye korgini, nio ka gunekogi ducu ki pala lucwan, ma mo pe odong, ci jo Icrael ducu guloke gudok i Ai, guneko dano mudong iye ki pala lucwan. 25Jo me Ai ducu ma guto inino meno, co ki mon, gin romo alip apar wiye aryo. 26Ci Yocwa pe omedo ki dwoko cinge piny ma nongo oilo ki tong alwirone malo, nio ka kijwero jo ma gibedo i Ai woko liweng. 27Lim makwo aye ki jami mogo ma kiyako ki i taun madit meno aye jo Icrael gutero obedo meggi, macalo lok mayam Rwot ociko ki Yocwa. 28Kitmeno Yocwa owango Ai woko, oweko odong wi odur ma odure lipim matwal, kit matye kwede wa onyo. 29En odeyo rwot me Ai, ongabo malo iwi yat nio wa otyeno. Ka ceng dong cito kapoto, ci Yocwa ociko dano ni gukwanyo kome woko ki ikom yat, ci gubolo piny i dog cel me taun madit meno kama kidonyo kwede i taun madit meno, ka gucano got ikome madwong likung, ma pud tye kenyo nio kwede wa ikare man.

Kicoyo Cik ikom Got Ebal

(Nwo 27:1-26)

301

Yocwa ocano keno tyer iwi got Ebal pi Rwot Lubanga pa Icrael, 312kit mayam Moses latic pa Rwot ociko ki jo Icrael. En olubu lok ma kicoyo i buk me Cik pa Moses ni, “Wucan keno tyer ki got ma pe gipayo komgi, ma dano mo pe otingo nyonyo ikome.” En aye gutyero iye gitum awanga bot Rwot, ci gutumu gityer me berbedo. 32Ci Yocwa okobo coc me Cik pa Moses kun coyogi ikom godi kunu ki inyim jo Icrael kun lubu kit mayam Moses ocoyo. 333Ci jo Icrael ducu, lubedo ki anywali, kacel ki ludongo ki ludito tic ki lungolkopgi, gin ducu gucung inget Canduk pa Rwot tungi ki tungi ki inyim ajwaki ma Lulevi ma gutingo Canduk me Gicike pa Rwot. Nucu dano gucung inyim got Gerijim ki nucu dano gucung inyim got Ebal, kit ma Moses latic pa Rwot okwongo cikogi kwede kit ma myero kilam kwede gum ikom jo Icrael. 34Ka lacen Yocwa okwano lok ducu ma i Cik, wa lok me lamo gum ki lok me ceno dano ducu kikore macalo yam kicoyo ducu i buk me Cik. 35Lok acel mo pe odong ikom lok ducu ma Moses yam ociko ma Yocwa pe okwano inyim kacoke pa jo Icrael ducu, kacel ki mon ki lutino ki lubedo ma gibedo ikin gi.