Yocwa 9

Bwola pa jo Gibeon me mako larem

1Ka luker ducu ma nene gitye loka Jordan i lobo matye godigodi ki i lobo matye notanota ma orabo nget Nam Mediterranean mukemo Lebanon, ki jo Kit, jo Amor, jo Kanaan, jo Periji, jo Kiv ki jo Jebuc guwinyo lok man, 2gucoke kacel pi lweny ikom Yocwa ki jo Icrael.

3Ento ka jo ma gibedo i Gibeon guwinyo gin ma Yocwa otimo ikom Jeriko ki ikom Ai, 4ci gin ki tung botgi gutiyo ki ryeko mamalo mada. Guyubu peke me wot ki kicaa ma otii me atweya iwi kanagi, ki opiru kongo bwino ma guti woko, ma oyec atata ma kidabogi adaba bene, 5ki war tyen gi ma otii ma kidabogi, ki bongi arukagi ma otii woko; ki pekegi ducu obedo mutwo woko, ma opuri woko bene. 6Gucito kwede bot Yocwa i gony ma i Gilgal, ci guwaco bot Yocwa ki bot jo Icrael ni, “Wan wabino ma waa ki i lobo mabor; pieno walegi ni icike kwedwa kombedi.” 71Ento jo Icrael guwaco bot jo Kiv ni, “Gwok onyo wubedo ikinwa, ci dok watwero cike kwedwu ningning?” 8Gin guwaco bot Yocwa ni, “Wan dong lutici.” Ci Yocwa openyogi ni, “Wun kono wu jo kwene ka? Dok bene wua ki kwene mono?” 9Ci gugamo doge ni, “Wan waa ki i lobo mabor mada, ladit, pi nying Rwot Lubangawu ma wawinyo kitito pire, ki pi gin ducu mayam otimo i lobo Ejipt, 102ki pi gin ducu ma en otimo ikom luker aryo pa jo Amor mayam gitye loka Jordan ca, Cikon rwot me Kecbon ki Og rwot me Bacan mayam bedo i Acitarot. 11Ci ludongowa ki jo ducu ma gibedo i lobowa guwaco botwa ni, ‘Wumak peke me wot i cingwu wek wucit wurwate kwedgi, ci wuwac botgi ni, wan luticwu, wek dong wacike kwedwu.’ 12Mugatiwa ene; wakwanyo ma onongo pud lyet ikare ma wa a ki pacowa me acama i yoo inino ma wacako bino botwuni, ento kombedi, nen, tye madong otwo dok opuri woko bene. 13Wa opiru kongo bwino ducu onongo pud ginyen ikare ma wapiko kongo bwino i igini; dong wunen ba ka guyec woko. Ki ginarukawa ki war mewa dong gutii woko pi wot man mabori.” 14Ludito gugamo pekegi gucamo, ma pe kong gupenyo dog Rwot. 15Ci Yocwa otugi yubu lok me kuc ikin gi, ocike kwedgi pi wekogi makwo; lutela wi lwak bene gukwongo kwong botgi.

16Ka nino okato adek nia ki ikom nino ma gucike kwedgi, lacen guwinyo ni jo meno gitye kacel kwedgi kun gibedo idyegi. 17Jo Icrael gucako wot ci guo i taun madito pa jo meno inge nino me adeke. Gunongo taun madito magi, ma gin aye, Gibeon, Kepira, Beeroth ki Kiriat-jearim. 18Ento jo Icrael pe dong gunekogi, pien lutela wi lwak onongo dong gutyeko kwonge botgi i nying Rwot Lubanga pa Icrael. Ci lwak ducu gucako ngur ikom lutela wi lwak. 19Ento lutela wi lwak ducu guwaco bot lwak ducu ni, “Watyeko dong kwongo kwong botgi i nying Rwot Lubanga pa Icrael, pieno kombedi pe dong watwero timo komgi marac. 20Dong wabitimogi kit man; wabiweko gibedo makwo wek pe wakel kiniga pa Lubanga ikomwa pi kwong ma dong wakwongo botgini.” 21Ci lutela guwaco bot lwak ni, “Wuwek gubed makwo, ento gibibedo lubar yen ki lutwom pii pi lwak ducu.”

22Yocwa olwongogi ci owaco botgi ni, “Pingo wubwola kun wuwaco ni, ‘Wan watye kamabor kwedwu,’ kun kono wutye i dyewa? 23Pimeno kombedi dong kicenowu woko; pi kare ducu wubibedo opii, lubar yen ki lutwom pii i ot pa Lubangana.” 24Gugamo dog Yocwa ni, “Pien onongo dong kitito botwa lok me ada ladit, ni Rwot Lubanga yam ociko latice Moses pi miyowu lobo man ducu, dok ociko ni myero wujwer jo ma gibedo i lobo man woko ki inyimwu; omiyo walworowu matek tutwal, en aye omiyo watimo man pi laro kwowa. 25Ci dong kombedi in aye dong inen giri. Dong watye i cingi, in dong i tim gin ma i neno ni ber dok opore me atima ikomwa.” 26Ci Yocwa otimogi kit man, olarogi ki i cing jo Icrael, pe dong kinekogi. 27Ento cake inino meno Yocwa oketogi me bedo lubar yen ki lutwom pii pi lwak ki pi keno tyer pa Rwot. Gin dong gitye katiyo tic man nio kwede wa onyo ki i kabedo ducu ma Rwot biyero me wore.